Lənkəranda işıq dirəkləri hələ də ağacdır, onları da qar aşırdı...
İlqar Hüseynli: “Lənkəranda yaşananlar rayonun enerji təsərrüfatının necə bərbad olmasının göstəricisidir”
Məlum olduğu kimi, qar yağması ilə əlaqədar Lənkəranın işıq təchizatında ciddi problemlər yaranıb. Bəzi kəndlərə 4 gündən sonra işıq verilib. Lənkəranın bir çox ərazilərində ağacların aşması nəticəsində elektrik naqilləri qırılıb və hələ də bərpa olunmayıb.
Rayonun Zövlə, Göyşaban, Sütəmurdov, Boladı kəndlərində və Gərmətük qəsəbəsinin bir hissəsində hələ də elektrik xətti bərpa edilməyib.
Burada təəccüb doğuran məqam odur ki, Lənkəran şəhərinə yaxın olan kəndlərin əksəriyyətinin işıq dirəkləri hələ də ağacdandır. Qar məhz ağac dirəkləri aşırdığı üçün belə acınacaqlı vəziyyət yaranıb. Halbuki, hər il büdcədən ölkənin elektrik xətlərinin yenilənməsi, təmir və bərpası üçün milyonlar ayrılır. Belə olan halda hansı əsrdə yaşayırıq? İndiyə qədər işıq dirəklərinin ağacdan olması nə deməkdir?
“Burada korrupsiya elementləri ilə bağlı da şübhələnmək üçün ciddi əsaslar var”
Sözügedən məsələ ilə bağlı fikirlərini “Bakı-Xəbər”lə bölüşən ekspert İlqar Hüseynli bununla bağlı ciddi problemlərin olduğunu qeyd etdi: “Əvvəla, təbii hadisələr dünyanın əksər ölkələrində baş verir. Hətta ən inkişaf etmiş ölkələrdə belə, qar və külək elektrik enerjisi kəsintilərinə səbəb olur. Bəzən şəhər infrastrukturu sıradan çıxır. Ancaq yanvarın 14-də Azərbaycana yağan qar böyük fəlakətlərə səbəb olacaq yağıntı deyildi. Yəni bu, elektrik enerjisi təsərrüfatını iflic edə biləcək gücdə deyildi. Lənkəranda yaşananlar rayonun enerji təsərrüfatının necə bərbad olmasının göstəricisidir. Lənkəran və digər rayonlarda hələ də ağac dirəklərin qalması o deməkdir ki, həmin dirəklərin böyük hissəsi çürüyüb, möhkəmliyini itirib. Adicə küləyin, ağırlığın təsirindən onların aşması gözlənilən idi. Ağac dirəklərdən istifadənin tarixi yarım əsrdən çoxdur. Əksər ölkələr bundan tamamilə imtina edib. Ağac dirəklər beton və dəmir dirəklərlə əvəz olunub. Lakin təəssüflər olsun ki, bizdə hələ də ağac dirəklər qalmaqdadır. Bu, sırf məsuliyyətsizlik və təsərrüfatsızlıqdır. İşıq idarəsinin bölgədəki fəaliyyətinə biganə münasibətinin göstəricisidir. Burada korrupsiya elementləri ilə bağlı da şübhələnmək üçün ciddi əsaslar var. Necə ola bilər ki, ağac dirəklər hələ də qalmaqdadır? Lənkəran həm turizm bölgəsidir, həm də Azərbaycanın böyük şəhərlərindən biridir. Belə bir regionun acınacaqlı durumla üz-üzə qalması qəbuledilməzdir. Çox güman ki, elektrik xətlərinin yenilənməsi ilə bağlı ayrılan vəsaitlər təyinatı üzrə xərclənmədiyi üçün beə vəziyyət yaranıb. Digər tərəfdən, bilavasitə elektrik şəbəkənin Cənub bölgəsi üzrə Lənkəran rayonuna tabe olan ərazilərdə qurum işçilərinin öz işinə məsuliyyətsiz yanaşması belə xoşagəlməz vəziyyət yaradıb. Ona görə də təcili olaraq bu problemlər köklü həll olunmalıdır. Əks təqdirdə yenə bənzər qar-külək olarsa, oxşar problemlər ortaya çıxacaq”.
Vidadi ORDAHALLI
