“Reuters” agentliyindən Bakıda COP29 tədbirinə təxribat...
Elşən Mustafayev: “Yaxşı olardı ki, dünyada tanınan media qurumu öz xəbər siyasəti ilə məşğul olsun”
Dünyaca məşhur “Reuters” agentliyi “Mübarizədə” başlıqlı məqalədə Azərbaycana qarşı açıq “qara piar” kampaniyasına başlayıb.
Məqalədə qeyd edilir ki, BMT-nin İqlim Dəyişikliyi Konfransının (COP29) güya erməniləri Dağlıq Qarabağdan köçürməyə məcbur edən Azərbaycanda keçirilməsi beynəlxalq ictimaiyyətə Bakının aqressiv davranışını təşviq edən “yanlış siqnal” verir:
“Ötən il Azərbaycan silahlı qüvvələri uzun mühasirədən sonra 100 mindən çox ermənini Dağlıq Qarabağın mübahisəli ərazisindən çıxarıb. İnsan haqları təşkilatları bu hərəkətləri soyqırım adlandırıb. Ölkəyə COP 29-a ev sahibliyi etmək icazəsi verməklə bu cür davranışı təşviq etmək beynəlxalq ictimaiyyətə yanlış siqnal göndərir”.
“Reuters” BMT-ni mühüm forumlara ev sahibliyi edən ölkələrin seçilməsi üçün daha sərt meyarlar tətbiq etməyə çağırıb
Məqalənin müəllifi Pol Polman qeyd edir: “Azərbaycanda COP 29-un keçirilməsi qanunsuz saxlanılan erməni siyasi məhbuslar, o cümlədən Artsaxın keçmiş dövlət naziri Ruben Vardanyan azad edilsə, məqbul olardı”.
“Reuters” agentliyinin bu təxribatı necə dəyərləndirilə bilər?
Beynəlxalq məsələlər üzrə ekspert Elşən Mustafayev “Bakı-Xəbər”ə açıqlamasında bildirdi ki, COP-a ev sahibliyi, bir qayda olaraq, BMT-nin beş regional qrupu arasında rotasiya edir: “Hər regional qrup, üzvlərindən bu konfransı təşkil edəcək bir ölkəni irəli sürmək üçün konsensusla qərar qəbul etməlidir.
2024-cü il COP29-a ev sahibliyi etmək növbəsi Şərqi Avropa regional qrupuna düşmüşdü. Sözügedən qrupa daxil olan ölkəmiz konfransın Azərbaycanda keçirilməsi ilə bağlı namizədliyini irəli sürmüşdü. Azərbaycanla yanaşı, Ermənistan və Bolqarıstan da namizədliklərini vermişdilər. Dekabrın 7-də Azərbaycan Respublikası Prezidentinin Administrasiyası və Ermənistan Baş nazirinin Aparatı arasında aparılmış birbaşa danışıqların nəticəsi olaraq verilmiş birgə bəyanatda Ermənistan Azərbaycanın xeyrinə öz namizədliyini geri çəkib. Bundan sonra Bolqarıstan da öz namizədliyini geri götürüb.
Beləliklə, dekabrın 9-da Şərqi Avropa regional qrupu Azərbaycanı 2024-cü ildə COP-a ev sahibliyi edəcək ölkə kimi müəyyənləşdirib.
Azərbaycanın dünyanın ən böyük və mühüm dövlətlərarası tədbirlərindən biri olan COP29-a 2024-cü ildə ev sahibliyi etməsi ölkəmizin növbəti nüfuzundan xəbər verir. Ancaq dünyanın tanınmış media resursu olan “Reuters”in bu fəaliyyəti çox gülünc görünür. Bir daha subut olunur ki, Azərbaycana qarşı açıq təxribat var. Hətta bu məsələyə media qurumlarını da qatıblar. Məqalədə yazılır ki, güya Azərbaycan erməni “siyasi” məhbuslarını həbsdə saxlayır. Onlar “siyasi” məhbus yox, terrorçudurlar. Azərbaycan xalqına qarşı cinayətlər törədiblər. Təbiidir ki, belə adamların yeri elə məhbəs olmalıdır.
Belə yazılarla həmin tədbirin keçirilməsini təxirə salmaq mümkün olmayacaq. Sadəcə, bu üsullarla ölkəmizə təzyiq etdiklərini düşünürlər. Məqalədə qeyd olunur ki, Azərbaycan erməniləri Qarabağdan qovub. Ancaq hamı bilir ki, ermənilər Qarabağı könüllü tərk ediblər. Yaxşı olardı ki, dünyada tanınan media qurumu öz xəbər siyasəti ilə məşğul olsun. Belə yazılar bu media qurumunun imicinə böyük zərbədir”.
Məhəmmədəli QƏRİBLİ
