Qumar erməni ordusunu bürüdü - Məsələ parlamentə çıxdı...

Azərbaycan Silahlı Qüvvələrinin 44 günlük müharibə zamanı məhv etdiyi Ermənistan ordusunda hələ də acınacaqlı vəziyyət hökm sürür. Ermənistanın “Past” nəşri yazır ki, verilən vədlərə baxmayaraq, ordu yarıtmaz durumdadır, bu səbəbdən də yenə çoxsaylı itkilər var: 

“Bu yaxınlarda, məlum olduğu kimi, erməni hərbi qulluqçu Benyamin Manuçaryan tərxis olunmaq ərəfəsində döyüş mövqeyindən dislokasiya yerinə gedərkən çovğun zamanı qarın altında qalıb və dünyasını dəyişib”.

Nəşr qeyd edib ki, baş verən hadisə nə qədər erməni cəmiyyətinin bir hissəsi olsa da, ölkədəki hakim rejim belə hadisələrə biganə qalır: “Vaxtilə bugünkü rejimin lideri Nikol Paşinyan əsgərin orduda, xüsusən də qeyri-döyüş şəraitində ölməsi ilə bağlı istənilən hadisəni özünün əsas çıxışına çevirirdi. Söhbət, hətta “keçmiş” Nikol Paşinyandan getmir. Söhbət “müxalifətdə işləyən” və “xalq tribunası” hesab edilən Paşinyandan gedir. Amma indi vəziyyət başqadır. İl yeni başlayıb, amma artıq Ermənistan ordusunda azı 4 itki var və heç kim buna görə cavab verməyib”. Bir neçə gün öncə isə Ermənistan ordusunun Basarkeçərdə yerləşən mövqelərində iki zabitin qətlə yetirilməsinin təfərrüatı məlum olub. Ermənistan müdafiə nazirinin müavini Arman Sarkisyan bu xüsusda qeyd edib: “İlkin məlumatlara görə, qətl qumar borcuna görə baş verib. Hazırda araşdırma aparılır”. Qeyd edək ki, yanvarın 9-da leytenant Mikael Danielyan və zabit Karen Karapetyan Basarkeçərdə yerləşən mövqelərdə öldürülüblər. Parlamentin müdafiə və təhlükəsizlik məsələləri üzrə daimi komissiyasının sədr müavini Armen Xaçatryan da baş verənlərlə bağlı maraqlı açıqlama verib. O bildirib ki, Ermənistan Silahlı Qüvvələrində qumar oyunları ilə bağlı ciddi problemlər var. Deputat bu sahənin ciddi nəzarətə götürülməli olduğunu vurğulayıb: “Heç kimə sirr deyil ki, narkotrafik və narkomaniyadan sonra bizim ən böyük problemimiz qumar oyunlarıdır. Bir çox ailə bundan əziyyət çəkir. Müvafiq qanun layihəsini dəstəkləyirəm, çünki bu, silahlı qüvvələrdə bu sahəyə nəzarət etməyə imkan verəcək. Deməliyəm ki, orduda qumarla bağlı ciddi problem var... Hərbi qulluqçuların xidmət zamanı qumar oyununa cəlb edilməsi açıq-aydın çox böyük mənfi nəticələrə gətirib çıxarır”. Erməni hərbi ekspert Hayk Nahapetyan bu fonda qeyd edir: “Orduda dinc şəraitdə ölənlərin sayı Ermənistan Silahlı Qüvvələrinin nizam-intizamından və əhval-ruhiyyəsindən xəbər verən ciddi göstəricidir. İki zabitin ölümü isə qeyri-döyüş itkisidir və eyni ordu korpusunda bu, özlüyündə vəziyyətə nəzarət etmədiklərini göstərir. Bildiyimə görə, bu hərbi hissənin komandiri vəzifəyə yeni təyin olunub və baş verənləri onun üzərinə yıxmağa çalışsalar, başqaları məsuliyyətdən yayınacaq”.  Qeyd edək ki, erməni hərbi qulluqçular tərəfindən hərbi hissədə, xidmət yerində və hərbi vəzifə borclarını yerinə yetirərkən qumar oyunlarında iştirak etmə və ya bu oyunları təşkil etməyə görə cinayət qanunvericiliyində məsuliyyət müəyyən ediləcək. Artıq  bu barədə Ermənistan parlamentində dövlət və insan hüquqları məsələləri üzrə daimi komissiyada müzakirələr aparılıb. Yeni qanun layihəsinin həmmüəllifi olan hakim partiyanın üzvü Karine Acemyan bu məqsədlə Ermənistan cinayət qanunvericiliyində dəyişikliklər edilməsini təklif edib. O, qumar sahəsində əmlak, əmlak hüququ, qiymətli kağızlar və ya başqa üstünlüklərin əldə edilməsi ilə müşayiət olunan bu oyunların çağırış hesab olunmaqla, erməni cəmiyyəti üçün problem olduğunu bildirib. Komissiya üzvləri qumar oyunlarının qadağan olunmasının Ermənistan silahlı qüvvələrində cinayət sayının artmasına səbəb olacağına diqqət çəkib. Ancaq qanun layihəsinin müəllifi olan Acemyan isə əksinə, bunun cinayətkarlığın azalmasına səbəb olacağını iddia edib.

Orduda qumar və digər neqativ halları Ermənistan parlamentində sual-cavab zamanı baş nazir Nikol Paşinyan da etiraf edib.  O vurğulayıb ki, hərbi qulluqçulara qanunvericilik səviyyəsində mərc oynamağı qadağan etməyi əmr edib: “Hərbi qulluqçuların qeyri-döyüş şəraitində həlak olmasının səbəbləri dərindir, lakin biz tədbirlər görürük. Mən tapşırdım ki, hərbi qulluqçulara qanunvericilik səviyyəsində mərc etmək qadağan olunsun. Biz institusional qərar verməliyik”.Orduda baş verən hadisələrə toxunan Paşinyan daha sonra bildirib: “2018-ci ilə qədər orduda qeyri-döyüş şəraitində 1000-ə yaxın insident baş verib və bunun səbəbləri çox dərin olub. Biz müdafiə nazirilə sonuncu məsləhətləşmədə danışdıq, dedim ki, bəli, gedin, qanunvericilik aktlarını düzəldin, hərbi qulluqçulara mərc etməyi qadağan edin. Çünki insan tələyə düşəndə, on milyonlarla borc toplayanda, sonra həmin borc sahiblərinin təzyiqindən bezir və nəsə etmək qərarına gəlir. Bəli, əlbəttə ki, bu bizim məsuliyyətimizdir, lakin biz institusional həllər təqdim etməliyik. Ya da zəng edəndə deyirlər ki, süfrə açılıb, uşağımızı necə istəyirsiniz gətirin, yerinə çatdırın. Bunun üçün də hər cür vasitədən istifadə edirlər”. İndi belə bir ordu ilə Azərbaycana qarşı revanşdan danışan ermənilərin istəkləri sadəcə gülməlidir.  Hayk Nahapetyan da qeyd edir ki, Ermənistan ordusunda baş verən hər şey sistemli bir hadisədir: “Qərarları əsasən müdafiə naziri verir, o, rəsmi olaraq hər şeyə cavabdehdir. Suren Papikyanın hərbi karyerasına nəzər salsaq, çox şey görmərik. İnsanın biliyi yoxdursa, hansısa məsələ ilə bağlı ona bir neçə təklif verilirsə, üstəlik biliyi, təcrübəsi, sübut olunmuş nəticələri yoxdursa, o necə ən təsirli qərarı verə bilər? Müvafiq şəxslər vəziyyətə nəzarət etmir. Onların vəzifəsi ordumuzu tamamilə dəyişməkdir: taktika, strategiya, şəxsi heyət, silahlar və bütün digər standartlar NATO ordusunun standartlarına çatdırılmalıdır. Ona görə də bu köhnə nizam sökülməlidir. Amma bu baş vermir”.

Samirə SƏFƏROVA