Müharibə veteranları nə qədər təqaüd alır - artım müzakirələri gedir...
Aydın Hüseynov: “Müharibə veteranı və hərbçilərin sosial təminatı dövlətin diqqətindədir”
Qarabağda qazanılan zəfərdən sonra bu qələbə sevincini Azərbaycan xalqına yaşadan şəhid və qazi ailələri dövlətin qayğısı ilə əhatə olunur.
Bu il şəhid ailələri və müharibə ilə əlaqədar əlilliyi olan şəxslərə ən azı 1500 mənzil və fərdi evin verilməsi nəzərdə tutulub ki, onlardan artıq 1300-ü təqdim edilib.
Həmçinin il ərzində 100 avtomobil müharibə ilə əlaqədar əlilliyi olan şəxslərə təqdim edilib.
Ümumilikdə, Vətən müharibəsindən sonra dövlət başçısının göstərişi ilə şəhidlərimizin ailə üzvləri və müharibə iştirakçıları ilə bağlı geniş sosial dəstək tədbirləri nəticəsində 126 min şəxsə dəstək yönümlü 322 min xidmət göstərilib.
İkinci Qarabağ müharibəsindən sonra həmin sosial dəstək paketi çərçivəsində şəhid ailələri və müharibə ilə əlaqədar əlilliyi olan şəxslərin mənzillə təminatı proqramı da beş dəfə genişlənib.
Qeyd edək ki, son zamanlar Vətən müharibəsi iştirakçılarına ödənilən vəsaitin artırılıb-artırılmayacağı müzakirə olunur. Məlumat üçün bildirək ki, hazırda həmin şəxslərə 80 manat məbləğində vəsait ödənilir. Müharibə veteranlarının təqaüdü artırıla bilərmi?
“Vətən müharibəsi şəhidlərinin ailə üzvləri və qazilərin sosial müdafiəsi ilə bağlı bir sıra güzəştlər də nəzərdə tutulub”
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov “Bakı-Xəbər”ə açıqlamasında qeyd etdi ki, Azərbaycanın ərazi bütövlüyünün təmin olunmasında sağlamlığını itirmiş qəhrəman qazilərimizin, müharibə veteranlarımızın, şəhid ailələlərinin etibarlı və fasiləsiz sosial müdafiəsi, mənzil-məişət şəraitlərinin və sosial şəraitlərinin yaxşılaşdırılması dövlətimizin xüsusi diqqət mərkəzindədir: “Cənab Prezident İlham Əliyevin diqqət və qayğısı sayəsində şəhid ailələrinin, müharibə əlillərinin və veteranların sosial vəziyyəti və maddi şəraitinin yaxşılaşdırılması, mənzillə təminatı istiqamətində ardıcıl mühüm addımlar atılır. Eləcə də əlilliyi olan, sağlamlıq məhduddiyətinə malik veteranların da sosial müvainətləri artırılır. Müharibə veteranı olan, ancaq sağlamlığında problem olmayan şəxslərin də sosial müdafiəsi ilə bağlı addımlar atılır, onların da müavinətlərinin artırılması istiqamətində təkliflər nəzərdən keçirilir”.
Millət vəkili bildirdi ki, 44 günlük Vətən müharibəsində əldə edilmiş Zəfərdən sonra dövlətimiz ərazi bütövlüyümüzün təmin olunmasında fədakarlıq göstərmiş bütün hərbçilərə və onların ailələrinə davamlı olaraq mühüm imtiyazlar, güzəştlər etməkdədir. “Son 2 ildə dövlət başçısı tərəfindən bir sıra mühüm fərman və sərəncamlar imzalanıb. Vətən Müharibəsi Qəhrəmanı” adı verilmiş şəxslər üçün nəzərdə tutulan güzəşt və imtiyazların əhatə dairəsi genişləndirilib, Vətən müharibəsi şəhidlərinin ailə üzvləri və qazilərin sosial müdafiəsi ilə bağlı bir sıra güzəştlər də nəzərdə tutulub. Şəhid ailələrinə Prezident təqaüdü, şəhidin pensiya hüququ olduqda ailə üzvlərinə ailə başçısını itirməyə görə pensiya, pensiya hüququ olmadıqda isə ailə başçısını itirməyə görə hər bir ailə üzvünə müavinət müəyyən edilib, onlar digər sosial qayğılarla əhatə olunurlar. Eləcə də, qazilərimiz üçün dövlətin kifayət qədər sosial dəstəyi vardır. Onlara Prezident təqaüdü və aylıq müavinətlər ödənilir, mənzil və avtomobil təminatı davamlı olaraq yerinə yetirlir”.
A.Hüseynov onu da əlavə etdi ki, müharibə veteranları və hərbçilərin pensiya təminatı, müavinətlərinin artrırılması istiqamətində də ardıcıl addımlar atılır. 2021-ci ildən hərbi qulluqçuların aylıq vəzifə maaşlarına müəyyən edilən müddəti əlavələrin ödənilməsi təmin edilib. Belə ki, Azərbaycan Ordusunun Ermənistanla dövlət sərhədində və Azərbaycanın Qarabağ bölgəsində Rusiya Federasiyası sülhməramlı kontingentinin yerləşdirildiyi zonaya bitişik ərazilərdə hərbi xidmət keçən hərbi qulluqçuların aylıq vəzifə maaşlarına 100 faiz həcmində müddətli əlavələr təyin edilib: “İşğaldan azad edilmiş və hazırda infrastruktur qurulmayan ərazilərdə hərbi xidmət keçən hərbçilərin aylıq vəzifə maaşlarına isə 50 faiz həcmində müddətli əlavələr təyin olunub. Hərbçilərə qarşı bu sosial qayğının davamı olaraq Müdafiə və Daxili İşlər nazirliklərinin, Dövlət Sərhəd Xidmətinin həqiqi hərbi xidmət hərbi qulluqçularının aylıq vəzifə maaşları 2024-cü il yanvarın 1-dən etibarən 20 faiz artırılıb”.
Günel CƏLİLOVA
