Seçki Müşahidə və Təhlil Qrupu Koalisiyasının üzvləri prezidentliyə namizədlər Zahid Oruc və Fazil Mustafa ilə görüşüblər
Seçki Müşahidə və Təhlil Qrupu Koalisiyasının üzvləri ayrı-ayrılıqda prezidentliyə namizədlər Zahid Oruc və Fazil Mustafa ilə görüşüblər. Görüşlər zamanı namizədlərin seçki kampaniyasına hazırlığı, prosesin gedişatı, ümumi seçki mühiti, rəqəmsal səsvermə imkanları və media münasibətləri kimi məsələlər ətrafında geniş müzakirələr aparılıb. Koalisiya üzvləri seçki debatlarında prezidentliyə namizədlər tərəfindən alternativ fikirlər səsləndirmə gözləntilərini ifadə ediblər.
Zahid Oruc seçki hazırlıqlarının ardıcıl şəkildə davam etdirildiyini, siyasi debatların, sağlam alternativ fikir və ideyaların səsləndirilməsinin vacibliyini vurğulayaraq, seçkilərə qatılmasının məqsəd-məramını açıqlayıb. Dövlətimizin və dövlətçiliyimizin inkişafına, xalqımızın rifahına yönəlik platforması haqqında geniş məlumat verən namizəd, Koalisiya üzvlərinin suallarını cavablandırıb. O, ilk seçki debatı zamanı səsləndirdiyi və özünün idealı hesab etdiyi “Azərbaycan möcüzəsi”nə inandığını bir daha diqqətə çatdırıb.
Prezidentliyə namizəd Fazil Mustafa isə görüş zamanı, öz növbəsində, “Bir həyati və 50 vacib məsələ” adlandırdığı seçki platformasının diqqət çəkən məqamlarını nəzərə çatdırıb. Qeyd edib ki, özündə müstəqillik dövründə əldə etdiyimiz nailiyyətləri ehtiva edən platforma, eyni zamanda xalqımızın rifahı naminə həll edilməli olan taleyüklü problemləri də əhatə etdir. İlk növbədə təhsillə bağlı xoşagəlməz məqamları önə çəkən namizəd, bütün problemlərin kökündə məhz bu problemin dayandığını bildirib. Qazandığımız zəfər fonunda Qarabağ İnstitunun yaradılmasının vacibliyini vurğulayıb.
Seçki zamanı təmsil etdiyi Böyük Quruluş Partiyasının ölkə üzrə 6500 nəfər müşahidəçi ilə iştirak edəcəyini, eləcə də seçki öncəsi ictimaiyyət nümayəndələri ilə təmasların davam etdiriləcəyini nəzərə çatdırıb. Görüş əsnasında koalisiya üzvlərini maraqlandıran bir sıra suallar cavablandırılıb.
Qeyd edək ki, 7 fevral 2024-cü il tarixinə təyin edilmiş Azərbaycan Respublikasının Prezidentinin növbədənkanar seçkilərinin monitorinqinin həyata keçirilməsi məqsədilə yaradılmış “Seçki Müşahidə və Təhlil Qrupu” koalisiyasına Rafiq İsmayılovun rəhbərlik etdiyi Vətəndaş Cəmiyyəti Uğrunda Mərkəz, Mirvari Qəhrəmanlının rəhbərlik etdiyi Neftçilərin Hüquqlarının Müdafiə Təşkilatı və Osman Gündüzün rəhbərlik etdiyi “Multimedia” İnformasiya Sistemləri və Texnologiyaları Mərkəzi daxildir. Koalisiya 20 dekabr 2023-cü il tarixində təsis edilib.
Mətləb Salahov
