Separatçı Qarabağ ermənilərini İrəvandan qovacaqlar - əsəblər tarımlanıb...
Bəhruz Quliyev: “Bütün bunlar onu göstərir ki, Ermənistan hakimiyyəti Qarabağ separatçılarından bezib”
Ermənistanda ən yüksək səviyyədə Qarabağ separatçılarına ertirazlar artır. Deputat Gevorq Papoyan bəyan edib ki, biz imkan verə bilmərik Qarabağı təmsil edən bəzi adamlar erməni gəncliyini yoldan çıxartsın:
“Həmin adamlar uzun illər bu yalanlar altında Qarabağı talan ediblər. Qarabağı birinci tərk edənlər də yerli məmurlar oldu. Onlar qorxaq dovşanlar kimi aradan çıxdılar. İndi isə gəlib Ermənistanda özlərini vətənpərvərlər kimi təqdim etmək istəyirlər. Onlar növbəti dəfə xalqı aldada bilməyəcəklər. Onlar illərdir Qarabağda böyük pullar qazanıblar. İndi Ermənistana niyə gəliblər? Gəliblər ki, Ermənistana bomba qoysunlar və ölkəmizi məhv etsinlər”.
Digər deputat Qaqik Melikonyan isə Qarabağdan köçmüş ermənilərə xəbərdarlıq edərək bildirib ki, ölkəni sakit buraxsınlar: “Ermənistanda oturan Şahramanyan özünün hakimiyyətini yaratmaq niyyətindədir. Amma o başa düşmür ki, Ermənistanın öz hakimiyyəti mövcuddur. Qarabağı təslim etməyindən utanmır, hələ bir Ermənistanda təxribatlarla da məşğuldur. Ölkəni sakit buraxsınlar. Qarabağdan qaçıb bura sığınan adam Ermənistanda özünü qəhrəman kimi aparır. Bütün bunlar Azərbaycanla sülh müqaviləsinin bağlanması ərəfəsində edilir. Təsəvvür edirsinizmi, onun bu hərəkəti nəyə gətirib çıxara bilər? Güman edirəm ki, bunların arxasında Rusiya dayanıb”.
“Rəsmi İrəvan artıq qeyri-müəyyənlikdən müəyyənliyə keçməlidir və yekun qərarı verməlidir”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev hesab edir ki, sülh prosesinin bu həlledici mərhələsində İrəvanın konkret nəticələrə nail olmaq üçün səmimi yanaşması zəruridir: “Ermənistan artıq qeyri-müəyyənlikdən müəyyənliyə keçməlidir və yekun qərarı verməlidir. Ermənistan özü üçün Azərbaycanla sülh sazişinin imzalanmasının bütün faydalarını tam dərk etməli, eləcə də, sülh prosesini pozmağa və ölkəmizlə hərbi qarşıdurmaya qayıtmağa yönəlmiş bütün zərərli illüziyalardan və hiylələrdən imtina etməlidir. Sərhədlərin müəyyənləşdirilməsi məsələsi, onun mürəkkəbliyi və vaxt aparması nəzərə alınaraq sonrakı mərhələdə həll oluna bilər. Təbii ki, Fransa və ABŞ-ın həyatına inteqrasiya olunmuş diasporlar bu ölkələrin xüsusi xidmət orqanlarının nəzarəti altındadır və müvafiq olaraq Ermənistan xalqının mənafeyinə, onların öz xalqları ilə harmonik yanaşı yaşamalarına qarşı oynayırlar. Ən başlıcası odur ki, “Qarabağ klanı”nın Ermənistanda təsir imkanları tam aradan qalxsın. İctimai rəyə təsir imkanları olmasın”.
Media Qrupunun rəhbəri onu da əlavə etdi ki, bütün bunlara baxmayaraq, artıq rəsmi İrəvan reallığı dərk etməyə başlayıb: “Bunun nəticəsidir ki, Ermənistan parlamentinin spikeri Alen Simonyan müsbət siqnallarla çıxış edir. Tərəflər arasında birbaşa danışıqlara önəm verir. Bütün bunlar onu göstərir ki, Ermənistan hakimiyyəti Qarabağ separatçılarından bezib. Regionda sülhdə maraqlı olduğunu bəyan edən Ermənistan Fransa kimi dövlətlərin təhriki ilə ciddi siyasi iradə nümayiş etdirə bilmir. İrəvanda revanşist əhvali-ruhiyyə güclənir. Bu isə regionda yeni gərginliyə rəvac verməklə yanaşı, həm də Ermənistan daxilində ikitirəliyi, perspektivdə vətəndaş müharibəsi ehtimalını artırır. Görünən odur ki, Paşinyan və onun komandası bütün bunlardan ehtiyat edir”.
Vidadi ORDAHALLI
