Türkiyə bankları Rusiya ilə əlaqələri kəsdi - Baydenin 22 dekabr həmləsi nəticə verir...
Arzuxan Əlizadə: “Türkiyə banklarının məhdudiyyətləri Rusiya maliyyə sektoruna təsirsiz ötüşməyəck”
Türk bankları Rusiya bankları ilə işləməkdən imtina etməyə başlayıb. Bu barədə “Kommersant” qəzeti maliyyə bazarındakı mənbələrə istinadən məlumat yayıb.
Nəşr yazır ki, 2024-cü il yanvarın 1-dən isə Rusiyadan Türkiyəyə şirkətlərin pul köçürmələri dayanıb. Hətta bəzi banklar qəbul edilmiş əməliyyatların qadağan olunmuş mallarla bağlı olduğunu əsas gətirərək vəsaitləri geri qaytarıblar. Türk bankları Rusiyanın, demək olar ki, bütün kredit təşkilatları ilə əlaqələrini kəsib, həmçinin müqavilələri rəsmi bağlamadan ödənişlərin işlənməsini dayandırıb: “Lakin Türkiyə bankları Rusiyadakı törəmə xarici banklar üçün istisna edib”.
Mənbə qeyd edib ki, vəziyyət ABŞ Prezidenti Baydenin dekabrın 22-də Ukraynadakı müharibədə Rusiyaya yardım edən xarici şirkətlərə qarşı ikinci dərəcəli sanksiyalar haqqında fərman verməsindən sonra kəskin şəkildə pisləşib. Fərman Vaşinqtona Rusiyaya qarşı sanksiyaları pozduqlarına görə xarici bankları Amerika maliyyə sistemindən ayırmağa imkan verir.
Bütün bu deyilənlərin fonunda, Türkiyə banklarının Rusiya ilə əməkdaşlığı məhdudlaşdırması nə vəd edir? Bunun sonu nə ilə nəticələnə bilər? Bu, Rusiyaya nə vəd edir? O cümlədən, siyasi planda Rusiya-Türkiyə münasibətlərinə nə vəd edir?
“Düşünmürəm ki, bu, iki ölkə münasibətlərinə siyasi baxımdan mənfi təsir etsin”
Sözügedən məsələni “Bakı-Xəbər”ə şərh edən AMİP sədri Arzuxan Əlizadə buna bir neçə aspektdən yanaşdı: “Əvvəla, Ukrayna müharibəsi başlayandan Türkiyə Rusiyaya qarşı sanksiyalara qoşulmayıb. Ona görə ki, Türkiyə tərəflər arasında vasitəçidir. Taxıl sazişi, əsirlərin dəyişdirilməsi və digər məsələlər məhz Ankaranın vasitəçiliyi ilə öz həllini tapıb. O üzdən, Türkiyə Rusiyaya qarşı sanksiyalara qoşulmir. Türkiyə banklarının məhdudiyyətləri Rusiya maliyyə sektoruna təsirsiz ötüşməyəck. Ona görə ki, Rusiya Türkiyə bankları vasitəsilə müəyyən maliyyə əməliyyatları aparırdı. Bu minvalla qismən sanksiyaların təsirindən yayınırdı. Üstəlik, iki ölkə arasında böyük ticarət dövriyyəsi var. Ancaq Türkiyənin də öz milli maraqları var. Bu səbəbdən Türkiyə öz iqtisadi maraqlarını Rusiyaya görə sonadək zərbə altına qoya bilməz. Türkiyə iqtisadiyyatına, maliyyə sektoruna ABŞ-ın təsiri böyükdür. ABŞ Türkiyə banklarını maliyyə sistemindən ayırsa, bu, ölkə iqtisadiyyatı üçün ciddi problemlər yaradar. Zatən Türkiyə iqtisadiyyatında bir sıra problemlər var, inflyasiya səviyyəsi çox yüksəkdir. Ona görə də bütün bunları nəzərə alaraq Rusiya bankları ilə əməkdaşlığı məhdudlaşdırıblar. Düşünmürəm ki, bu, iki ölkə münasibətlərinə siyasi baxımdan mənfi təsir etsin. Çünki Rusiya tərəfi də sanksiyaların Türkiyə iqtisadiyatına ciddi mənfi təsir edə biləcəyinin fərqindədir. Məsələn, Çin Rusiya ilə çox yaxın əlaqələrə malik olsa da, bəzi məhdudiyyətləri nəzərə alır. Çünki ABŞ və Avropa İttifaqı ilə olduqca böyük ticarət dövriyyəsinə malikdir. İstəmir ki, zərbə altına düşsün. Türkiyə də bu baxımdan doğru olanı edir”.
Vidadi ORDAHALLI
