Pakistanla İranın müharibə təhlükəsi reallaşır...
Turab Rzayev: “İran üçün heç də xoş olmayacaq”
İran İslam İnqilabı Keşikçiləri Korpusu (SEPAH, İran Silahlı Qüvvələrinə daxildir) “Ceyş əl-Ədl” qruplaşmasının Pakistandakı qərargahlarına zərbələr endirib.
İran mediasının məlumatına görə, zərbələr raket və dronlar vasitəsilə vurulub. Beləliklə, SEPAH ilk dəfə Pakistan ərazisini vurmuş olub.
Məlumatda qeyd olunub ki, zərbələr Pakistanın Bəlucistan əyalətinin Kühi-Səbz ərazisində endirilib, belə ki, orada təşkilatın əsas qərargahlarından biri yerləşib.
Pakistan İranı onun hava məkanını və suverenliyini pozmaqda ittiham edib.
İran səfiri ölkə ərazisinin atəşə tutulması ilə bağlı Pakistan Xarici İşlər Nazirliyinə çağırılıb. Nazirliyin bəyanatına görə, bu insident ciddi nəticələrə səbəb ola bilər.
Baş verən bu insident iki ölkə arasında müharibəyə səbəb ola bilərmi?
Politoloq Turab Rzayev “Bakı-Xəbər”ə açıqlamasında bildirdi ki, bu kifayət qədər böyük və risqli addımdır: “Mən düşünürəm ki, İranın bu zərbəsi və Pakistanın ona cavabı regionda çox şeyi dəyişə bilər. Pakistan çox güclü nüvə dövlətidir, kəşfiyyatı olduqca güclüdür. Pakistan son dönəmdə İranın, Amerikanın, Hindistanın güclü dəstəyinə baxmayaraq, Əfqanıstanda dövlət dəyişikliyi edə bildi. Talibanın oradakı uğuru həm də Pakistanın uğurudur. Ümumiyyətlə, belə bir dövlətlə İranın bu qədər açıq münaqişəyə gətirəcək fəaliyyətə imza atması bizim üçün çox düşündürücüdür. Eyni zamanda İran rəhbərliyinin bu addımı da çox qəribə görünür. İran özü hazırda mühasirə altındadır. İraqda, Suriyada, Yəməndə İrana yaxın qruplaşmalara zərbələr endirilir. İranın sərhəd komandirləri öldürülür. Belə bir halda İran mümkün qədər qonşuları ilə sülh münasibəti qurmağa, ABŞ və İngiltərənin ona qarşı hansısa bəhanə ilə müharibəyə çalışmasının qarşısını almağa çalışmalı idi. Ancaq İranın Pakistana bu zərbəsi əslində tam əks effekt verəcək. İrana qarşı hər hansı potensial hərbi əməliyyatda Pakistan İran tərəfdən mövqe almayacaq, tam neytral qalacaq. Ya da ABŞ-a dəstək verə bilər. Pakistan hakimiyyəti İranın bu hərəkətindən çox narazıdır. İndiyə qədər Pakistan müsəlman dünyasında iki ən əsas ölkədən biri idi. Türkiyə ilə birlikdə İranın dağıdılmasına qarşı çıxış edirdi. İndi görünür ki, bu mövqe dəyişə bilər. Bu da İran üçün heç də xoş olmayacaq”.
Bəzi analitiklər hesab edir ki, İranın qonşu dövlətlərin ərazilərini bombalamaqda bir məqsədi də əzələ nümayişidir. Sanki bununla da İran region dövlətlərinə demək istəyir ki, istənilən dövlətin ərazisini bombalamaq, istədiyini etmək imtiyazına malikdir. Hər halda, Pakistanın kəskin etirazı var və güclü orduya malik olan bu dövlətin bu cür açıq təcavüz aktlarına cavab vermək imkanlarının olduğunu İran bilməmiş deyil.
Pakistanın Xarici İşlər Nazirliyinin saytında yerləşdirilmiş bəyanatda deyilir ki, İran silahlı qüvvələrinin Pakistanın hava məkanını əsassız şəkildə pozmasını və Pakistan ərazisi daxilində iki günahsız uşağın ölümü, üç qızın isə yaralanması ilə nəticələnən zərbəni qətiyyətlə pislənilir. Pakistanın suverenliyinin bu şəkildə pozulması tamamilə qəbuledilməzdir və ciddi nəticələrə səbəb ola bilər.
Qeyd olunub ki, Pakistan və İran arasında bir neçə rabitə kanalının mövcudluğuna baxmayaraq, bu qanunsuz əməlin baş verməsi daha da narahatedicidir. Pakistanın sərt etirazı artıq İranın Xarici İşlər Nazirliyinin müvafiq yüksək vəzifəli rəsmisinə ünvanlanıb:
“Bundan əlavə, İranın müvəqqəti işlər vəkili Pakistanın suverenliyinin belə açıq şəkildə pozulmasını qəti şəkildə pislədiyimizi və bunun nəticələrinə görə məsuliyyətin tamamilə İranın üzərinə düşəcəyini bildirmək üçün Xarici İşlər Nazirliyinə çağırılıb”.
Vurğulanıb ki, terrorizm koordinasiyalı fəaliyyət tələb edən bütün region ölkələri üçün ümumi təhlükədir. Bu cür birtərəfli hərəkətlər mehriban qonşuluq münasibətlərinə uyğun gəlmir və ikitərəfli etimadı ciddi şəkildə sarsıda bilər.
Məhəmmədəli QƏRİBLİ
