60 ölkənin iqtisadçıları çox pis iqtisadi proqnoz verdi - Azərbaycana da aiddir...
Xalid Kərimli: “Ölkədə iqtisadi baxımdan 2023-cü ilə nəzərən bu ilin daha yaxşı il olması gözlənilir”
Dünyanın müxtəlif ölkələrindən olan 60-dan çox iqtisadçı arasında keçirilən sorğunun nəticələrinə görə, 2024-cü il qlobal iqtisadiyyat üçün təhlükəli ola bilər.
Belə ki, qlobal iqtisadiyyat geosiyasi gərginlik, yüksək faiz dərəcələri və süni intellekt təhlükəsi fonunda risqlə üzləşə bilər. Sorğuda iştirak edənlərin təxminən 56 faizi 2024-cü ildə qlobal iqtisadi vəziyyətin daha da pisləşəcəyini deyib.
Xarici ekspertlər regionlar arasında əhəmiyyətli fərqlərin olacağını proqnozlaşdırır. Belə ki, sorğu iştirakçılarının əksəriyyəti Çin və ABŞ iqtisadiyyatında artım gözləyir, Avropada isə çox zəif artım.
Maraqlıdır, qeyd edilən iqtisadi böhranın Azərbaycana təsiri necə olacaq?
“Qlobal iqtisadi göstəricilərin aşağı düşməsinə əsas səbəb dünyanın bir çox yerində davam etməkdə olan müharibələrdir”
Iqtisadçı Xalid Kərimli "Bakı - Xəbər"ə açıqlamasında qeyd etdi ki, dünyada geosiyasi vəziyyətin hansı səviyyədə pisləsəcəyi hələ tam bəlli deyil: "Beynəlxalq Valyuta Fondu və Dünya Bankı 2024-cu ilin iqtisadiyyatı üçün bildiriblər ki, iqtisadi artım sürəti aşağı olacaq. Burda iqtisadi böhran yox, iqtisadi artımın zəifləməsindən söhbət gedir. İnkişaf etmiş və inkişaf etməkdə olan ölkələrdə iqtisadi böyümə baş verəcək, ancaq bu daha aşağı sürətlə artacaq. Heç bir beynəlxalq təşkilat qlobal iqtisadi böhrandan danışmır”.
Iqtisadçının sözlərinə görə, qlobal iqtisadi göstəricilərin aşağı düşməsinə əsas səbəb dünyanın bir çox yerində davam etməkdə olan müharibələrdir. Avropanın iqtisadi artımı çox zəifləyib, ümumi iqtisadi inkişafın geriləməsinin səbəbi də budur: “Hazırkı Ukrayna-Rusiya müharibəsindən iqtisadi baxımdan Avropa daha çox zərər çəkir. Digər bir səbəb Çində daşınmaz əmlak bazarında olan problemlərdir. Bunun gələn il daha çox şiddətlənəcəyi güman edilir. Bu da qlobal iqtisadi göstəricilərə mənfi təsir göstərəcək”.
X.Kərimli onu da əlavə etdi ki, Azərbaycanda bu il üçün 2,4 faizlik iqtisadi artım proqnozlaşdırılır. Neft sektorunda 1,7 faizlik azalma, qeyri-neft sektorunda 4,6 faizlik yüksəlmə gözlənilir: “İqtisadi baxımdan 2023-cü ilə nəzərən bu ilin daha yaxşı il olması gözlənilir. İnfiliyasiya hazırda 9,4 faizdir. Hansısa dəyişiklik olmasa, bu il üçün bu göstəricinin 5,3-5,5 faiz aralığında olması ehtimal olunur. Vətəndaşlar inflyasiyanın aşağı düşməsini qiymətlərin aşağı düşməsi kimi qiymətləndirir, amma bu doğru yanaşma deyil. İnflyasiya qiymət səviyyəsinin artmasıdır. Yəni inflyasiyanın sürətinin azalmasından söhbət gedir”.
Günel CƏLİLOVA
