İrəvan hökumətində qərbçilərin iddiası - Bakı ilə danışıq ancaq Qərbdə olmalıdır...
Məhəmməd Əsədullazadə: “Ermənistan Qərbin sülh müqaviləsində zəmanət verən tərəf olmasını istəyir”
Ermənistan parlamentinin Xarici əlaqələr daimi komitəsinin sədri Sarkis Xandanyan açıq bəyan edib ki, onlar danışıqların Qərb müstəvisində aparılmasının tərəfdarıdırlar:
“İrəvan hesab edir ki, Ermənistan-Azərbaycan münasibətlərinin normallaşmasına dair Bakı ilə danışıqlar Qərb platformalarında davam etdirilməlidir. Artıq qurulmuş danışıqlar formatlarını davam etdirmək bizim üçün çox vacibdir. Bilirsiniz ki, Vaşinqtonda xarici işlər nazirlərinin görüşləri formatı, eləcə də Avropa İttifaqının vasitəçiliyi ilə ölkə liderləri arasında danışıqlar formatı artıq müəyyən olunub. Bu, danışıqlara legitimlik qatır”.
Xandanyan onu da qeyd edib ki, Ermənistan gələcək sülh müqaviləsində əvvəllər razılaşdırılmış prinsiplərin möhkəmləndirilməsinə önəm verir. Bu prinsiplər olmasa, sənəd İrəvanın gözlədiyi dəyərlərə malik olmayacaq.
“Nə Fransa, nə də Vaşinqton İrəvana birbaşa danışıqlarla bağlı təzyiq göstərir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, Ermənistan Qərbin sülh müqaviləsində zəmanət verən tərəf olmasını istəyir: “Ona görə də Qərb platformasına xüsusi üstünlük verir. Yəni Vaşinqtonla Brüsseli önə çəkməyə çalışır. Təbii ki, ötən 3 il ərzində Azərbaycan Brüssellə Vaşinqtonun vasitəçiliyinə etimad göstərib. Avropa Şurası Prezidenti Şarl Mişelin vasitəçiliyi ilə konstruktiv müstəvidə bir neçə dəfə danışıqlar keçirilib. Mişel vasitəçi olaraq tərəfsiz mövqe sərgiləyib. Ancaq problem ondadır ki, lokal xarakterli antiterror əməliyyatlarından sonra Azərbaycana münasibətdə həm Vaşinqton, həm də Avropa İttifaqının mövqeyində çox ciddi ədalətsizliklər özünü göstərdi. Ona görə də Azərbaycan Qranada və Vaşinqton görüşlərindən imtina etdi. Çünki Fransanın pozucu siyasəti və digər səbəblərdən Vaşinqtonla Brüssel Azərbaycana qarşı qərəzli yanaşma sərgilədilər. Bütün bunlar isə praktiki olaraq sülhə mane olmağa başladı. Ermənistan rəhbərliyi məqsədyönlü şəkildə bundan sui-istifadə etməyə başladı. Hesab edirdilər ki, Azərbaycana təzyiqlər artacaq və nəticədə rəsmi Bakı geri addım atacaq. Ancaq bu baş vermədi. Azərbaycan Ermənistana təklif etdi ki, ikitərəfli danışıqlara önəm verilsin. Lakin Ermənistan bundan israrla imtina edir. Çünki nə Fransa, nə də Vaşinqton İrəvana birbaşa danışıqlarla bağlı təzyiq göstərir. Ona görə ki, iki tərəf arasında sülh sazişi imzalansa Fransa ilə ABŞ-ın regionda mövqeləri zəifləyə bilər. Ermənistandan alət kimi istifadə edə bilməyəcəklər. Bütün hallarda Azərbaycanın şərtləri daha unikaldır. Yoxsa Ermənistanın şərtləri əsas götürülsə, sülh müqaviləsi bağlanmaya bilər. Nəticədə proses dalana dirənəcək və bu da Ermənistanın əleyhinədir. Çünki Azərbaycan tərəfi danışıqlarda Ermənistana 5 təməl prinsip göndərib. Məhz həmin prinsiplərlə sülh müqaviləsi bağlanmalıdır. Ancaq yenə də rəsmi İrəvan manipulyasiya etməyə çalışır. Hesab edirəm ki, Ermənistan mövcud reallıqları qəbul etməlidir”.
Vidadi ORDAHALLI
