Seçkiqabağı bu partlayışlar, yanğınlar nə deməkdir?..
Elşən Həsənov: “Təxribatın ola biləcəyi variantı da diqqət mərkəzində saxlanmalı və çox ciddi şəkildə araşdırılmalıdır”
Yanvarın 15-də Bakı şəhəri, Binəqədi rayonu, A.Kunanbayev küçəsinin yaxınlığında sexdə partlayışla əlaqədar TƏBİB-in tabeliyindəki tibb müəssisələrində 16 nəfərin müalicəsi davam etdirilir.
TƏBİB-dən bildirilib ki, hazırda Nərimanov Tibb Mərkəzinin nəzdində olan Yanıq Mərkəzində müalicə alan 12 nəfərdən 3-nün vəziyyəti ağır stabil, digərlərinin vəziyyətləri isə orta ağır olaraq qalır. Kliniki Tibbi Mərkəzin müvafiq şöbələrində isə 4 nəfərin müalicəsi davam etdirilir. Onlardan 1-nin vəziyyəti ağır stabil, digərlərinin vəziyyəti orta ağır qiymətləndirilir.
Mebel sexində baş vermiş partlayışla bağlı hadisə yerində aparılan axtarış-xilasetmə işləri nəticəsində 7 nəfərin meyiti dağıntılar altından aşkarlanaraq çıxarılıb.
Elə həmin gün Fövqəladə Hallar Nazirliyinin “112” qaynar telefon xəttinə Sumqayıt şəhəri, Yəhya Məmmədov küçəsində yerləşən yataqxana binasında partlayışın baş verməsi barədə məlumat daxil olub. Dərhal əraziyə FHN-in Dövlət Yanğından Mühafizə Xidməti və Sumqayıt Regional Mərkəzinin qüvvələri cəlb olunub. Hadisə yerində əməliyyat şəraitinin qiymətləndirilməsi zamanı ikimərtəbəli yataqxana binasının 2-ci mərtəbəsində ümumi sahəsi 50 kv.m olan mənzildə, ilkin ehtimala görə, qaz sızması nəticəsində yanğınla müşayiət olunmayan partlayışın baş verdiyi müəyyən edilib. Hadisə nəticəsində mənzilin arakəsmə divarları uçub, pəncərə çərçivələri yerindən çıxıb, 4 nəfər xəsarət alıb. Fövqəladə Hallar Nazirliyinin qüvvələri tərəfindən hadisə yerində müvafiq təhlükəsizlik tədbirləri görülüb.
Partlayışda xəsarət alan 4 nəfərdən 3-nün vəziyyəti orta ağırdır.
Seçkiqabağı dönəmdə ard-arda belə hadisələrin baş verməsi təsadüfdür, yoxsa təxribat?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, baş vermis partlayışlar haqqında məlumatlar nə qədər üzücü xəbərdirsə, bunun nəticəsində insanların həlak olması, yaralanması xəbəri ölçüyəgəlməz dərəcədə ağırdır:
“Düzdür, bu dəqiqə dünyada elə proseslər gedir ki, hər an hansısa bir ölkədə təxribatların və bu qəbildən olan digər pozucu əməllərin sayı, gündəlik olaraq onlarla ölçülür. O cümlədən, öz ərazi bütövlüyünü təmin etmiş Azərbaycanda da belə halların baş verə biləcəyi istisna deyil. Ümumiyyətlə, istənilən ölkədə qarışıqlıq, vahimə yaratmaq, əndişə toxumu səpmək və s. pozuculuq hərəkətləri məqsədilə bu cür üsullara tez – tez əl atılır. Məhz seçkiqabağı dövr ərzində respublikanın iki şəhərində - ölkə paytaxtı Bakı və Bakıya yaxın ərazidə yerləşən Sumqayıt şəhərlərində partlayışların baş verməsi, düşündüyüm qədər, hərtərəfli olaraq araşdırılmalıdır.
Əlbəttə ki, soyuq hava şəraitində təbii qazla işləyə bilən istilik cihazlarından istifadə qaydalarının pozulması və bunun nəticəsində hadisənin baş verməsi ehtimalını da nəzərə almaq lazımdır. Amma hər hansı bir halda təxribatın ola biləcəyi variantı da diqqət mərkəzində saxlanılmalı və çox ciddi şəkildə, artıq qeyd etdiyim kimi araşdırılmalıdır.
İnsan həyatının dəyəri ölçüyəgəlməzdir. Ölkə vətəndaşının hər hansı birinin qəza nəticəsində həlak olması və ya sağlamlığına ziyan dəyməsi genofondumuza dəyən ziyandır. Hadisənin hansı şəraitdə və hansı səbəblərdən baş verməsindən asılı olmayaraq, vətəndaşların təhlükəsizliyini qorumalı olan təşkilatlar fəaliyyətlərini daha düzgün şəkildə qurmalı, mütəmadi olaraq reydlər keçirərək şübhəli halları və qanun pozuntularını qeydə almalı, bu cür hadisələörin baş verə bilmə ehtimalını sıfırlayaraq öncədən tədbirlər planı hazlrlamalıdırlar. Əlbəttə ki, bu işdə vətəndaş fəallığı da lazımi səviyyədə öz sözünü deməlidir.
Bir daha baş vermis hadisə ilə bağlı həlak olanların ailələrinə baş sağlığı verir, yaralılara şəfa diləyirəm. Aidiyyəti orqanlara isə deyəcəyim bir söz var – ehtiyat igidin yaraşığıdır. İgidliyinizin üzərinə şübhə kölgəsi düşməməsini istəyirsinizsə, ehtiyatı da əldən verməyin”.
Məhəmmədəli QƏRİBLİ
