Cənubda molla rejiminin ölüm cəzasına qarşı hərəkat başladı...
Məcid Cavadi Araz: “Çox vaxt siyasi məhbuslara narkotik və başqa suçlar yaxıb onları qondarma ittihamlarla edama məhkum edirlər”
Molla rejiminin ölüm hökmünü adi hala çevirildiyi məlumdur. Bu ölkədə hər il onlarla şəxs edam cəzasına məhkum edilir. Bunlar arasında Cənubi azərbaycanlı siyasi, mədəni fəallar da var ki, onlar da Tehran rejiminin ölüm cəzasına tuş gəlirlər.
Qan donduran ölüm hökmünün ləğv edilməsi üçün molla rejiminə çağırışlar artır. İran Yazıçılar Birliyi bəyan edir ki, ölüm hökmləri ləğv edilməlidir.
Azad İran Telegram kanalının yaydığı məlumata görə, İran Yazıçılar Birliyi bugünlərdə yaydığı bəyanatda İran hökumətinin Məhkəmə-Ədliyyə Sisteminin çıxardığı hökmlərin ləğv edilməsini və siyasi fəaliyyət və ya fikir ifadəsinə görə həbs edilən məhbusların azad edilməsini istəyib.
Məlumata görə, bəyanatda ölüm hökmlərinin ləğv edilməsinə toxunularaq yazılıb: “Onlar siyasi_məhbuslardır və umumiyyətlə həbs edilməməli idilər. Çünki, etiraz, siyasi fəaliyyət hüququ və söz azadlığı hər bir insanın əsas hüquqlarındandır”.
Azərbaycan ölüm hökmünü ləğv edən ölkə kimi həm müsəlman aləminə, həm də xristian dünyasına bir nümunədir.
“Edam cəzasının tez bir zamanda İranda da ləğv edilməsini istəyirik”
Azərbaycan Milli Dirəniş Təşkilatının sözçüsü Məcid Cavadi Araz "Bakı-Xəbər"ə şərhində bildirdi ki, İran Yazçılar Bikrliyi keçən həftənin şənbə günü bununla bağlı bəyanat yayıb: “İranda siyasi edamların durdurulmasını və ümumiyyətlə edam hökmünün ləğb edilməsini istəyiblər. Bəyanatda edam hökmü ilə qarşı – qarşıya olan siyasi fəalların adlarını çəkərək rejimə çağırış ediblər ki, bu edam hökmləri ləğv olunsun. Göstərilib ki, edam hökmü ilə heç vaxt etirazçıların ağzına qıfıl vurmaq və xalqların etiraz səsini susdurmaq olmaz. Bu, orta çağa aid mürtəce və irticaçı bir uyğulamadır ki, artıq bu cəza aradan qaldırılmalı və tamamilə ləğv edilməlidir. İran dünyada edam cəzasının ən çox tətbiq edildiyi ölkələrdən biridir. Orada bəlkə də Çindən daha çox edam cəzası həyata keçirilir. Edam cəzaları bir çox səbəblə uyğulanır. Amma elə siyasi məhbuslar və siyasi suçlar üçün də edam cəzası həyata keçirilir. Bilirik ki, çox vaxt siyasi məhbuslara narkotik və başqa suçlar yaxıb onları qondarma ittihamlarla edama məhkum edirlər. Bu da gizlin qalmır. Xüsusən də Məhsa Əmini etirazlarından sonra edamların sayı daha da artıb. O qədər artıb ki, artıq Tehran bu edamların sayını açıqlamır. Əvvəllər istər Tehranda, istərsə də vilayətlərdə ədliyyə sistemləri edam olunanların sayını açıqlayırdı. Amma Məhsa olayından sonra edam sayları o qədər artıb ki, artıq saylar açıqlanmır”.
Edam edilənlərin sayı açıqlanmadığı üçün də ortada statistikanın olmadığını deyən M.C.Araz vurğuladı ki, amma gün yoxdur kimlərəsə ölüm hökmü verildiyi, yaxud edam hökmü tətbiq edildiyi barədə məlumat yayılmasın. “Təbii, biz də Güney Azərbaycan təşkilatları, Güney Azərbaycan xalqı olaraq düşünürük ki, bu edam hökmü tamamilə zalımca, insanlığa qarşı cinayətkar bir uyğulamadır. Bunun durdurulması lazımdır. Molla rejimi Güney Azərbaycanda da zaman-zaman bu edam hökmünü uyğulayır. Azərbaycanda və Türkiyədə artıq ölüm hökmü tamamilə ləğv olunub. Bütün modern dünyada bu hökm tarixə qovuşub. Amma irticaçı, faşist, şovinist Tehran rejimi hələ çox sayda insanı edam edir və israrla da bu cəzanı tətbiq etməyə davam edir. Edam cəzasının tez bir zamanda İranda da ləğv edilməsini istəyirik”-deyə M.C.Araz qeyd etdi.
Əli TURABOV
