Polisimiz qarlı gündə də tanındı...
Şəmsəddin Əliyev: “Polis əməkdaşları yolda xəsarət alanlara, çətinlik yaşayanlara əl uzatdı”
13-14 yanvar tarixində Bakıya yağan qar yollarda hərəkəti çətinləşdirdi, bəzi küçələrdə sıxlıq yarandı və təbii ki, saatlarda yolda qalan sürücülər oldu. Eyni zamanda, piyadalar da hərəkət zamanı çətinliklərlə üzləşdilər.
Belə anlarda həm sürücülərin, həm də piyadaların köməyinə Daxili İşlər Nazirliyinin Post-Patrul Xidmətinin və Yol Patrul Xidmətinin əməkdaşları gəldi. Polislər qarlı-şaxtalı havada əzmkarlıqla xidmət apararaq, hərəkət iştirakçılarına köməklik göstərdilər. Yolda qalan maşınları itələyən, yolu keçə bilməyən piyadalara kömək edən, sürüşkən yolları müəyyən edərək qum və duz səpilməsini təmin edən, yolayrıclarında sıxlığın qarşısını almaq üçün hərəkəti tənzimləyən məhz polislər idi. Hətta iş o yerə çatmışdı ki, polis işçiləri fərdi şəkildə əllərinə duz paçkası alıb, buzlanmış yola səpirdilər. Bununla bağlı sosial şəbəkədə görüntülər belə var.
Onu da deyək ki, yolda qalan sürücülərə kömək edərkən onlara qarlı havada hərəkətlə bağlı tövsiyələr belə verirdilər.
“Polis əməkdaşları tək cinayətkarlıqla deyil, fövqəladə hal, hərbi vəziyyət zamanı da vətən övladının rahatlığı, asayişi üçün çalışır”
Polisə Dəstək İctimai Birliyinin sədri Şəmsəddin Əliyev “Bakı-Xəbər”ə açıqlamasında qeyd etdi ki, polisin fəaliyyəti çox genişdir. Onlar tək cinayətkarlıqla deyil, fövqəladə hal, hərbi vəziyyət zamanı da vətən övladının rahatlığı, asayişi üçün çalışır. Polisin konkret iş saatı yoxdur. Bu peşənin sahibləri 8 saat deyil, minimum14 saat xidmətdə olur: “Polislərimiz çox böyük fədakarlıq göstərərək, hətta həyatlarını belə risqə atırlar. Biz dəfələrlə bu cür halların şahidi olmuşuq. Məsələn, hər hansı bir binada, ticarət mərkəzində yanğın baş verən zaman, avtomobil qəzası və ya digər hadisələrdə Azərbaycan polisinin nə qədər böyük vətənpərvərlik nümayiş etdirdiyinin şahidi oluruq.
Məlumdur ki, bu günlərdə paytaxt Bakı ərazisinə qar yağdı. Qarın yağmasına sevinənlərlə yanaşı, çətinlik yaşayanlar da oldu. Polis əməkdaşları yolda xəsarət alanlara, çətinlik yaşayanlara əl uzatdı. Istər sürücü, istərsə də piyadalara lazımi köməklik göstərdi.
Bütün bunlar o deməkdir ki, Azərbaycan polisi hər zaman vətəndaşını qoruyur. Azərbaycan polisi bütün hərəkətləri ilə Avropa polisinə nümunədir. Sizin qəzet vasitəsilə mən yeni ildə polis əməkdaşlarına fəaliyyətlərində uğur arzu edirəm”.
Günel CƏLİLOVA
