Prezident Qarabağdan və Zəngəzurdan olmayanlara özəl bir şans açdı...
Vüqar Bayramov: “Digər bölgələrdən olan vətəndaşlar da həmin ərazilərdən torpaq alıb, ev tikmək, məskunlaşmaq hüququna malikdir”
Tarixi qələbədən sonra Qarabağ və Şərqi Zəngəzur iqtisadi rayonları ərazisində dövlətimizin başçısının tapşırığı ilə icra olunan və işğaldan azad edilmiş rayon və kəndlərin sosial-iqtisadi inkişafında mühüm rol oynayacaq yol infrastrukturu layihələri uğurla icra olunur. Artıq həmin layihələrin bir neçəsi uğurla başa çatdırılıb.
Görülən işlərin nəticəsi olaraq keçmiş məcburi köçkünlər mütəmadi olaraq öz yurdlarına geri dönür. Bununla yanaşı, əslən Qarabağdan olmayan vətəndaşlar da həmin gözəl ərazilərdə yaşamaq istəyir.
Bu günlərdə Prezident İlham Əliyev yerli televiziya kanallarına müsahibəsində bu məsələyə toxundu. O qeyd etdi ki, Qarabağda və Şərqi Zəngəzurda ancaq o bölgədən çıxmış insanlar yaşamamalıdır: “Azərbaycanın istənilən yerindən insanlar orada yaşamaq üçün imkanlara malik olmalıdır. Təbii ki, məsələn, Bakıdan, ya Sumqayıtdan oraya gedib yaşamaq istəyən getsin, ev alsın özünə, mənzil alsın, torpaq alsın, ev tiksin və orada yaşasın. Yəni, onun üçün dövlət, təbii ki, heç bir ev tikən deyil”.
Məsələyə münasibət bildirən millət vəkili Vüqar Bayramov baki-xeber.com-a açıqlamasında bildirdi ki, Qarabağda və Şərqi Zəngəzurda yaşamaq, iş qurmaq istəyən vətəndaşların sayı kifayət qədər çoxdur: “O ərazilərdən olan vətəndaşlara dövlət tərəfindən pulsuz ev tikilir və həmin şəxslərə təqdim olunur. Digər bölgələrdən olan vətəndaşlar da həmin ərazilərdən torpaq alıb, ev tikmək, məskunlaşmaq hüququna malikdir. Məlumat üçün deyim ki, bu tip müraciətlər həddindən artıq çoxdur. Məskunlaşma prosesi sürətləndikcə müraciətlərin sayı daha da artacaq”.
Millət vəkili onu da əlavə etdi ki, işğaldan azad olunan ərazilərdə investiya qoymaq, iş qurmaq istəyən şəxslər də elə bölgələrdə yaşamaq istəyir.
Günel CƏLİLOVA
