İlham Əliyev Ermənistana iki Ekspert qrupu təklif etdi...
Hüseyn İbrahimov: “Prezitentimiz bununla konseptual həll modelini göstərdi”
“Ya siyasi metodologiya əsas götürülməlidir, ya xronologiya götürülməlidir, ya da biz bütövlükdə heç bir xəritə əsasında işimizi qurmamalıyıq. Komissiya yaradılıb. Komissiyanın işini fəallaşdırmaq üçün ekspert qrupları yaradılmalıdır. Getsinlər qarış-qarış o yerləri gəzib o sərhədi müəyyən etsinlər. Çünki bu gün bizim sərhədimiz şərti xarakter daşıyır”.
Bu sözləri Prezident İlham Əliyev yerli televiziya kanallarına müsahibəsində deyib.
Ölkə başçısının sözlərinə görə, anklav kəndlərlə bağlı da ekspert qrupları yaradılmalıdır: “O ki qaldı işğal altında olan kəndlərə, hesab edirəm ki, bizim təklifimiz də çox məntiqlidir. Bildiyiniz kimi, orada anklav və qeyri-anklav kəndlər var. O kəndlər ki, anklav kəndlər deyil, həmin dörd kənd Azərbaycana qeyd-şərtsiz qaytarılmalıdır. O kəndlər ki, anklav kəndlərdir, - çünki Ermənistanın bir anklav kəndi Azərbaycan ərazisindədir, - həmin kəndlərlə əlaqədar ayrıca bir ekspert qrupu yaradılmalıdır və o, müzakirə edilməlidir. Biz hesab edirik ki, bütün anklavlar qaytarılmalıdır. Bu anklavlara gedən yollarda şərait olmalıdır və bu anklavlara orada yaşayan insanlar yerləşdirilməlidir”.
Həm delimitasiya, həm də anklav kəndlərlə bağlı ekspert qruplarının yaradılması təşəbbüsü danışıqlar prosesində prinsipcə yeni bir təklifdir. O baxımdan bunun nə kimi effekti ola bilər?
“Ekspert qruplarının yaradılması mövcud problemlərin optimal həlli baxımından daha uyğun yoldur”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, ekspert qruplarının yaradılması prosesin irəli aparılmasında effektiv ola bilər: “Fikrimcə, ekspert qruplarının yaradılması mövcud problemlərin optimal həlli baxımından daha uyğun yoldur. Çünki bu işlə məhz mütəxəssislər məşğul olmalıdır. Onlar da dünya praktikasına uyğun olaraq məsəlləri həll etməlidilər. Ölkə başçısı vurğuladı ki, 4 kənd qeyd-şərtsiz qaytarılmalıdır. Çünki bu kəndlər anklav deyil. Beynəlxalq münasibətlər tənzimlənməsində ekspert qrupların yaradılması xüsusi üstün çəkiyə malikdir. Ona görə ki, bir sıra mübahisəli məsələlərin həllində bu metod özünü doğruldub. Ona görə də paralel şəkildə bu kimi missiyaların fəaliyyətini təmin etmək lazımdır. Həm sərhədlər delimitasiya olunmalıdır, həm də anklav kəndlərə yol çəkilməsi təmin olunmalıdır. Prezitentimiz bununla konseptual həll modelini göstərdi. Ona görə də qarşı tərəf bunu düzgün dəyərləndirilməlidir. Ermənistan sərhəd məsələsinə önəm versəydi, 30 il əvvəl ərazilərimizi işğal etməzdi. İndidə müxtəlif bəhanələrlə prosesi uzatmaq istəyirlər. Ancaq hesab edirəm ki, vaxt daralır və Ermənistan əvvəl-axır şərtlərimizi qəbul edəcək. Ona görə də hesab edirəm ki, komissiyaların yaradılması və birgə işləməsi, tarixi kartoqrafik xəritələrə istinad olunması ən uyğun variantdır. Siyasi metodologiyaya söykənmədən məsələlərin köklü həli çətindir”.
Vidadi ORDAHALLI
