3 mühüm əməliyyat - Xankəndi bu səbəbdən asan azad edildi...
Ramil Məmmədli: “Strateji yüksəkliklərin götürülməsi Xankəndiyə nəzarətin bərpa olunmasında olduqca önəmli rol oynadı”
23 aprel hadisələri çox önəmli bir tarixdir. Bütün sərhədlərə biz nəzarət etməyə başlamışdıq və bir daha göstərdik ki, bu torpaqların sahibləri bizik. Bunu Prezident İlham Əliyev yerli televiziya kanallarına müsahibəsində deyib.
Aprelin 23-nə qədər də bir neçə dəfə Ermənistana və yerli separatçılara bunun (Qarabağın) bizim torpağımız olduğunu nümayiş etdirdiyimizi, “Fərrux”, “Sarıbaba-Qırxqız”, “Qisas” əməliyyatlarının tərəfimizdən aparılmış önəmli hərbi əməliyyatlar olduğunu xatırladan dövlət başçısı diqqətə çatdırıb: “Bu əməliyyatlar nəticəsində o vaxt nəzarətimizdə olmayan Qarabağ bölgəsinin strateji təpələri, yüksəklikləri biz tərəfdən götürülmüşdür və 19-20 sentyabr əməliyyatı üçün bunun çox böyük əhəmiyyəti var idi. Yəni, o əməliyyatlar, sadəcə olaraq, kortəbii seçilməmişdi, məqsədyönlü əməliyyatlar idi”.
Ümumilkdə, bu əməliyyatlar sonradan Xankəndinin tutulmasında hansı rolu oynadı?
“Bütün bunlar 19-20 sentyabr antiterror əməliyyatlarının uğurla keçməsində və tez başa çatmasına həlledici təsir göstərdi”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında qeyd etdi ki, sadalanan strateji yüksəkliklərin götürülməsi Xankəndinə nəzarətin bərpa olunmasında olduqca önəmli rol oynadı: “Əvvəla, 10 noyabr 2020-ci il razılaşmasından sonra Ermənistan tərəfi müxtəlif davamlı təxribatlara əl atmağa başladı. Azərbaycan Ordusu isə bu təxribatların qarşısının alınması üçün müxtəlif dövrlərdə antiterror əməliyyatları həyata keçirib. “Fərrux”, “Sarıbaba-Qırxqız”, “Qisas” əməliyyatları bu baxımdan xüsusi əhəmiyyət kəsb edir. Həmin antiterror əməliyyatları nəticəsində “Sarıbaba”, “Qırxqız”, “Fərrux” və bir sıra adsız yüksəkliklər işğaldan azad edilib. Binlardan birincisi “Fərrux” əməliyyatı olub. Rusiya sülhməramlıları Qarabağa yerləşəndən sonra erməni separatçıları elə hesab edirdilər ki, ordumuz Qarabağda əməliyyat keçirməyə cəsarət etməz. Ancaq 2022-ci ilin martın 24-də “Fərrux” yüksəkliyinin götürülməsi bütün bu gözləmtiləri darmadağın etdi. Qarabağın şərqində yerləşən “Fərrux” yüksəkliyinin azad edilməsi həm Ağdam şəhərini atəş altında olma riskini aradan qaldırdı, həm də Əskəran-Xocalı-Xankəndi istiqamətində vizual nəzarətin təmin olunmasına şərait yaratdı. Bu, erməni separatçılarına dərs omadı və onlar yenə də təxribatlarını davam etdirdilər. Bu zaman ordumuz 2022-ci ilin 3-4 avqustunda Laçın-Şuşa istiqamətində əməliyyat keçirərək “Sarıbaba” Qırxqız” yüksəkliklərini nəzarətə götürdü. O vaxt Laçın-Xankəndi yoluna Rusiya sülhməramlıları nəzarət edirdilər. Ermənilər bundan istifadə edərək Qarabağa qanunsuz silah daşıyırdılar. Məhz “Sarıbaba” yüksəkliyinin azad olunması bizə imkan verdi ki, həmin yol vasitəsi ilə qanunsuz silah daşımalarını vizual olaraq qeydə alaq, oradakı prosesləri nəzarətdə saxlayaq. Bununla da Azərbaycan Ordusu daha strateji və taktiki məntəqələri öz nəzarəti altına alaraq, Xankəndinin nəzarətə götürülməsi üçün əlverişli zəmin formalaşdırdı. Nəticədə Qarabağda demək olar bütün strateji yüksəkliklər nəzarətimizə keçdi. Ondan sonra 12 dekabrda QHT-lərimiz aksiya keçirərək Xankəndinə silah daşınmasının qarşısını aldılar. 2023-cü ilin 23 aprelində isə Laçın yolunun başlanğıcında sərhəd-nəzarət məntəqəsi qurulması ilə ərazi bütövlüyümüz tam təmin olundu. Bütün bunlar 19-20 sentyabr antiterror əməliyyatlarının uğurla keçməsində və tez başa çatmasına həlledici təsir göstərdi”.
Vidadi ORDAHALLI
