7 fevral seçki qərarının 3 səbəbi rəsmi açıqlandı - yekun, yeni mərhələ və...
Ramil Hüseynov: “Əliyev çox böyük bir prosesi uğurla tamamladı”
Ölkə başçısı İlham Əliyev yerli televiziya kanallarına müsahibəsində fevralın 7-nə təyin edilən növbədənkənar prezident seçkilərini şərtləndirən əsas amilləri açıqlayıb.
Prezident bunun, ilk növbədə, sentyabr hadisələrindən sonra yeni dövrün başlanğıcı ilə əlaqədar olduğunu bildirib. O qeyd edib ki, ikinci səbəb müstəqil həyatımızda ərazilərimizin hər bir yerində keçiriləcək birinci seçkilərin məhz prezident seçkiləri olmasının vacibliyidir.
Dövlət başçısı digər səbəbi isə bu cür izah edib: “Mənim Prezident kimi fəaliyyətimin 20 ili tamamlandı. Bu da bir dövrdür və bunu da biz bir yekun kimi qəbul etməliyik. 20 ildən sonra yenidən prezident seçkilərinin keçirilməsi təbii ki, bu xronoloji dövrü də əsaslandırmış olur”.
Bütün bu deyilənlərin fonunda, 7 fevral seçkilərinin 3 səbəbi necə əsaslandırıldı?
“Həqiqətən də Xankəndidə suverenliyimizin bərpa olunması yeni dövrün başlanğıcı idi”
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, Prezidentin arqumentləri reallığı əks etdirir: “Həqiqətən də Xankəndidə suverenliyimizin bərpa olunması yeni dövrün başlanğıcı idi. Bu, Azərbaycan tarixində olduqca önəmli hadisədir. İşğaldan əvvəl belə, Bakının Xankəndiyə nəzarəti indiki səviyyədə deyildi. Çünki SSRİ tərkibində idik və ermənilər Moskva amilindən istifadə edərək öz bildiklərini edirdilər. Həm də bolşeviklərin Qarabağa Muxtar Vilayət statusu verməsi ermənilərin öz mənfur niyyətlərini pərdələməyə imkan verirdi. Ona görə də Xankəndiyə nəzarətin bərpası fövqəladə böyük hadisə idi. Digər tərəfdən, bəli, müstəqilikdən üzü bəri biz bütün ölkə ərazisində seçki keçirə bilməmişdik. 1988-ci ildə Qarabağda erməni separatizmi başlayandan sonra ora Bakının nəzarəti aradan qalxdı. Daha sonra ərazilərimiz işğal olundu. Ona görə də Qarabağda suvernliyimizin tam bərpa olunması bütün ölkə ərazisində seçkilərin keçirilməsi baxımından mühüm əhəmiyyət kəsb edir. Nəzərə alsaq ki, prezident seçkiləri, digər seçkilərlə müqayisədə daha böyük əhəmiyyətə malikdir, o baxımdan suverenliyimizin tam bərpasından sonra birinci bu seçkilərin keçirilməsi çox önəmlidir. Ən nəhayət, İlham Əliyev 2003-cü ildə prezident seçiləndə ərazi bütövlüyümüzün bərpa ediləcəyinə və bu istiqamətdə bütün imkanlardan istifadə edəcəyinə söz vermişdi. Nə qədər çətin və hətta müəyyən mənada tam real görünməyən missiyanı Əliyev yerinə yetirdi. Halbuki, digər postsovet ölkələrində separatizmlə bağlı yaranan problemlər öz həllini tapmayıb. Moldovada, Gürcüstanda, Ukraynada bu problem hələ də qalır. O üzdən, Əliyev çox böyük bir prosesi uğurla tamamladı”.
Vidadi ORDAHALLI
