Delimitasiyada ermənilərin “xəritə taktikası” alt-üst edildi...
İbrahim Rüstəmli: “Bizə aid olan ərazilər Ermənistanın nəzarətində qala bilməz”
Prezidenti İlham Əliyev yerli televiziya kanallarına verdiyi müsahibədə Ermənistanın iki ölkə arasında sərhədlərin 1970-ci illərdəki xəritələrə dayanaraq müəyyən olunması, eləcə də qoşunların mövqelərdən “güzgü prinsipi” əsasında geri çəkilməsi təklifinin birmənalı olaraq rədd edildiyini bildirib.
Ölkə başçısı vurğulayıb ki, sərhədlərin 1970-ci illərin xəritələrinə uyğun olaraq müəyyənləşdirilməsinin hər hansı metodoloji və siyasi əsasları yoxdur. Dövlət başçısının sözlərinə görə, əgər siyasi əsaslara istinad etsək, istinad nöqtəsi kimi ya Azərbaycan Xalq Cümhuriyyətinin yaranması dövrü, ya da sovetləşmə dövrü əsas götürülməlidir: “Bu olar siyasi metodologiya. Əgər biz xronoloji metodologiyaya üstünlük versək, onda gəlin baxaq, XX əsrin əvvəlində xəritələr nə idi, gəlin bu xəritələr üzərində işimizi quraq. Yəni, siz 1960-cı, 1950-ci, 1940-cı illəri kənara qoyursunuz və məhz 1970-ci illərə istinad etmək istəyirsiniz. Məhz buna görə ki, bizim tarixi torpaqlarımız artıq onlara verilmişdi. Ona görə biz buna qəti surətdə etiraz etmişik və edirik. Əfsuslar olsun ki, 1970-ci illərin xəritəsini, əsas götürmək istəyən təkcə Ermənistan deyil, həm də onun “Ermənistan plyus” qruplaşmasıdır. Biz buna heç vaxt razılıq verə bilmərik”.
“Erməni tərəfi bütün o ərazilərə sahib çıxmaqdan ötrü 70-ci illər xəritəsi əsasında delimitasiyanın aparılmasına can atır”
Sözügedən məsələni “Bakı-Xəbər”ə şərh edən hərbi ekspert İbrahim Rüstəmli hesab edir ki, Prezidentin bununla bağlı yanaşması ədaləti özündə əks etdirir: “Əvvəla, delimitasiya ilə bağlı beynəlxalq qaydalar var. Həmin qaydalara uyğun olaraq da işlər aparılmalıdır. Ən azından delimitasiya üçün əsas götürüləcək xəritələr yalnız Ermənistanın istəyi ilə müəyyən edilə bilməz. Delimitasiya prosesi hər iki tərəfin qəbul edəcəyi dövrün xəritələrinə əsasən aparılmalıdır. Ancaq biz görürük ki, erməni tərəfi burada hiyləgər siyasi oyun oynayır. Məsələ ondadır ki, tarixi Azərbaycan ərazilərində qondarma Ermənistan dövləti yaradılanda ərazisi 9 min kvadrat kilometr idi. Sonra bölşeviklər mərhələli şəkildə 20 min kvadrat kilometr ərazini bizdən qopararaq Ermənistana birləşdirdilər. Bununla bağlı referendum keçirilmədi, Azərbaycan xalqının rəyi nəzərə alınmadı. Sonrakı dövrlərdə də hektar-hektar ərazilərimizi SSRİ rəhbərliyi ermənilərə peşkəş etdi. İndi Ermənistan bütün o ərazilərə sahib çıxmaqdan ötrü 70-ci illər xəritəsi əsasında delimitasiyanın aparılmasına can atır. Ona görə də qətiyyən delimitasiya 70-ci illər xəritəsi əsasında aparılmamalıdır. Prezident doğru olaraq bunu rədd edir. Bizə aid olan ərazilər Ermənistanın nəzarətində qala bilməz. Çünki reallıqdan qaçmaq mümkün deyil. Ermənistan Azərbaycana aid əraziləri mütləq geri qaytarmalıdır. Əks təqdirdə bu, onlara baha başa gələcək”.
Vidadi ORDAHALLI
