İrəvanla sazişdə beynəlxalq zəmanətçilər məsələsi tam aydınlaşdı...
Yeganə Hacıyeva: “Çünki onların məhsuldarlığı və işinin keyfiyyət əmsalı sıfra bərabərdir”
Sülh müqaviləsinin imzalanması üçün əsas şərtlər indi yaradılmışdır. Ermənistan istəyir ki, bu sülh müqaviləsinin zəmanətçiləri olsun. Biz hesab edirik ki, buna heç bir ehtiyac yoxdur. Bu fikirləri Prezident İlham Əliyev yanvarın 10-da yerli televiziya kanallarına müsahibəsində söyləyib.
Bunun iki suveren dövlət arasında imzalanacaq sülh müqaviləsi olacağını vurğulayan dövlət başçısı deyib: “Biz orada heç bir zəmanətçilərə ehtiyac duymuruq və əgər bu, ikitərəfli formatda imzalanacaqsa, imzalanmalıdır. Əgər kimsə kömək etmək istəyirsə, biz buna da etiraz etmirik. Ancaq bu kömək elə olmalıdır ki, məcburi olmasın”.
Prezident deyir ki, sülh müqaviləsinin imzalanmasında heç bir zəmanətçiyə ehtiyac duymuruq. Bunu necə anlamaq olar?
Politoloq Yeganə Hacıyeva “Bakı-Xəbər”ə açıqlamasında bildirdi ki, əvvəlcə biz beynəlxalq zəmanətin nə olduğunu bilməliyik: “44 günlük Vətən müharibəsindən sonra Azərbaycanla Ermənistan arasında olan danışıqlarda nizamlayıcı qismində tərəflər vardı. İlk vaxtda bu, Risiya idi, sonra isə prosesə Avropa Birliyi qoşuldu. 2022-ci ildə Şarl Mişelin iştirakı ilə Brüssel formatında görüş oldu. Həmin ikin may ayında isə ABŞ təşəbbüsü ələ aldı. Daha sonrakı proseslərdən bəlli oldu ki, üçtərəfli bəyanatın şərtləri yerinə yetirilmir. Bir sözlə, diplomatik səylər həmin öhdəliklərin yerinə yetirilməsi üçün kifayət etmədi. Əvvəlki vasitəçilər olan ATƏT-in dönəmində deyilirdi ki, Ermənistan işğalçı olduğu üçün şərtləri diqtə edir, konstruktivliyə meyllənmir. Ancaq müharibədən sonra da gördük ki, Ermənistan ənənəvi mövqeyini davam etdirir. Həmin vaxt zəmanətçilər həmsədr olan ölkələr: Rusiya, Fransa və ABŞ idi. Proseslər göstərdi ki, onların heç biri nəzarətçi ola bilmir. Rusiya sülhməramlılarının gözü qarşısında ermənilər açıq-açkar separatçılıq edirdi. Sonra Azərbaycan hərbi təzyiqlə həmin separatizmin kökünü kəsdi. ABŞ da sonrakı mərhələlərdə səmimi görünmədi. 907-ci Düzəlişi yenidən gündəmə gətirdilər. Bu yaxınlarda isə ABŞ Dövlət Departamenti Azərbaycanda dini mühitin güya qənaətbəxş olmadığı ilə bağlı bəyanata imza atdı. Bu da sübut etdi ki, ABŞ da zəmanətçi ola bilməz. Çünki neytrallığı açıq şübhə doğurdu. Fransa isə açıq-aşkar ermənipərəstdir və bunu heç gizlətmir də. “Qızıl zəmanət” verən tərəf olmadığı üçün biz bunu istəmirik. Çünki onların məhsuldarlığı və işinin keyfiyyət əmsalı sıfra bərabərdir. Avropa Birliyi rəsmiləri isə erməni tezisləri ilə danışır. Adlarını çəkdiklərimizin zəmanətinə güvən yoxdursa, ölkə başçısının dediyi yol xəritəsi ilə hərəkət etmək ən məqbul variantdır”.
Məhəmmədəli QƏRİBLİ
