Ermənistanın Azərbaycanla Vaşinqton görüşünə dərhal razılaşmasının səbəbləri var...
Bəhruz Quliyev: “Danışıqlarda üçüncü tərəfin vasitəçiliyi hər iki dövlətin maraqlarına cavab verməlidir”
Ermənistan Milli Təhlükəsizlik Şurasının katibi Armen Qriqoryan bəyan edib ki, Birləşmiş Ştatlar Ermənistan və Azərbaycan xarici işlər nazirləri arasında daha bir görüşün keçirilməsi üçün səylərini davam etdirir:
“İrəvan Bakı ilə Vaşinqtonda üçtərəfli formatda görüşün keçirilməsinə razılıq verib. Ermənistan Vaşinqtonda görüş keçirməyə razılıq verib. Bütün tərəflər arasında yekun razılıq əldə olunandan sonra Ermənistan bu görüşə getməyə hazırdır”.
Qriqoryan onu da bildirib ki, Azərbaycan və Ermənistan xarici işlər nazirlərinin daha bir görüşünün keçirilməsi məsələsi Ermənistan xarici işlər naziri Ararat Mirzoyanla ABŞ-ın Cənubi Qafqaz üzrə xüsusi nümayəndəsi Luis Bono arasında danışıqların əsas mövzusu olub: “Görüşün məqsədi Vaşinqtonda üçtərəfli formatda danışıqları davam etdirmək və Ermənistanla Azərbaycan arasında sülh sazişinin imzalanması istiqamətində irəliləyişə nail olmaqdır”.
Maraqlıdır, Ermənistan ABŞ-ın vasitəçiliyi ilə danışıqların aparılmasına niyə belə həvəslidir və buna niyə belə tez meyllənir? Rəsmi İrəvanın bunda marağı nədən ibarətdir və Vaşinqtonda bu görüşün baş tutma ehtimalı nə qədərdir?
“Əgər normal, qərəzsiz, tərəfsiz vasitəçilik missiyasını ABŞ üzərinə götürsə, Azərbaycan tərəfi buna biganə qalmaz”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev buna bir neçə prizmadan yanaşdı: “Ümumən, Azərbaycan Ermənistanla sülh danışıqlarına həmişə hazırdır və bu təşəbbüs həm də regional problemlərin həlli istiqamətində atılan addımdır. ABŞ-ın Cənubi Qafqazda sülh təşəbbüsünə gəldikdə isə, Birləşmiş Ştatlar öz maraqlarını da hər hansı formada ortaya qoyur. Bəllidir ki, son vaxtlar ABŞ Azərbaycana qərəzli münasibət sərgiləyir. Hətta Dövlət Departamentinin son hesabatında ölkəmizə qarşı haqsız və həqiqətə uyğun olmayan nüanslar yer aldı. Yəni ABŞ-ın ölkəmizə qarşı qərəzli münasibəti olduğu bir dövrdə regionda sülh danışıqlarının aparılmasına vasitəçilik etmə cəhdi Vaşinqtonun maraqlarına xidmət edir. Biz istənilən formatda danışıqlara hazırıq. Hətta Ermənistanla da birbaşa sülh danışıqları aparmaq olar və bunda hansısa qəbahət görmürəm. Hərbçilərin dəyişdirilməsi məsələsi də göstərdi ki, birbaşa təmas da mümkündür. Regional məsələlərin həlli, inkişafı naminə ikitərəfli formata da baxmaq olar. Danışıqlarda üçüncü tərəfin vasitəçiliyi isə hər iki dövlətin maraqlarına cavab verməlidir. İndiyədək Azərbaycan tərəfi regionda sülhə nail olmaq üçün bütün formatda, müxtəlif yerlərdə görüşlər keçirib və davam etməkdədir. Əgər ABŞ öz maraqlarına uyğun olaraq Qafqazda olsun deyə danışıqlara ev sahibliyi etmək istəyirsə, ölkəmizə qarşı münasibətləri bir daha gözdən keçirməlidir. Əgər normal, qərəzsiz, tərəfsiz vasitəçilik missiyasını üzərinə götürsə, Azərbaycan tərəfi buna biganə qalmaz. Nəticədə nəzərdə tutulan Vaşinqton görüşü baş tutacaq. Əks təqdirdə qərəzli münasibəti illərlə ATƏT-in Minsk Qrupunun fəaliyyətində gördük və bunun acı nəticəsi də bizə bəllidir”.
Vidadi ORDAHALLI
