"Bakı İrəvana təcavüz edə bilər" - BBC-nin “peyğəmbərliyi"...
“BBC zaman-zaman Azərbaycana qarşı dezinformasiyalar yaymaqda “şücaət” göstərib”
Azərbaycanla heç cür ulduzu barışmayan BBC daim antiazərbaycan mövqeyi tutub. Yayımladığı “2024-cü ili hansı xoşagəlməz sürrprizlər gözləyir? Bakı erməni torpaqlarına təcavüz edə bilər” sərlöhvəli məqalədə BBC iddia edir ki, 2024-cü ildə təhlükəli və partlayışa səbəb ola biləcək situasiyaların arasında müharibədən sonra yaranmış vəziyyət də var, Azərbaycan öz esklavı olan Naxçıvan Muxtar Respublikası ilə əlaqələrini bərpa etməyə can atır.
“...Partlayışa səbəb ola biləcək situasiyalar arasında Ermənistanla Azərbaycan arasında qarşıdurma da var ki, bu qarşıdurmada Bakı Qarabağ müharibəsindəki qələbədən sonra öz uğurlarını möhkəmləndirməyə və Azərbaycanın əsas hissəsini öz eksklavından ayıran Ermənistan torpaqlarına təcavüz etməyə cəhd edə bilər” - deyə BBC iddia edib. Münəccimlik eşqinə düşən ermənipərəst BBC Azərbaycanın Ermənistana “təcavüz edəcəyini” iddia edir. Qaşınmayan yerdən qan çıxarmağa çalışan bu media orqanı bir dəfə də olsun Ermənistanın Azərbaycana təcavüzünü pisləmədi, indi ermənidən çox erməni olub Azərbaycan barədə dezinformasiya yayır.
“BBC-nin bu yanaşması kökündən yanlışdır, Azərbaycanın atdığı addımlarla heç uyuşmur, yaxından-uzaqdan dövlətimizin mövqeyi ilə kəsişmir...”
Siyasi və Hüquqi Strateji Araşdırmalar Mərkəzinin rəhbəri, politoloq Xəyal Bəşirov “Bakı-Xəbər”ə bildirdi ki, BBC-nin münəccimlik etməsi gülüncdür. “Əslində, belə qərəzli münəccimlik edənlər çoxdur. Yaxşı olardı ki, ədalətli, obyektiv, neytral münəccimlik edəydilər. Amma mən bunu münəccimlikdən daha çox, hazırkı dönəmdə Azərbaycanın uğurlarının, qələbələrinin, inkişafının fonunda antiazərbaycan mövqeyi tutmaqda yarışa girən tərəflərdən biri kimi təşəbbüslərin ortaya qoyulması hesab edərdim. Sanki BBC də antiazərbaycan yarışına girib. Proqnoz verməyin, münəccimlik etməyin özünün qaydaları var, o da nəyəsə əsaslanmalıdır, orada nəyəsə istinad edilməlidir. Əsaslandırma olmadan, konkret əsaslı istinad olmadan belə fikirlərin səsləndirilməsi qərəzin yönəldildiyi tərəf üçün elə bir təsirə malik olmur. Əksinə, bu mövqeyi bildirən BBC kimi media qurumlarının, digər beynəlxalq aləmdə fəaliyyət göstərən təşkilatların və dövlətlərin imicinə xələl gətirir” - deyə qeyd edən X.Bəşirov hesab edir ki, Azərbaycanın İkinci Qarabağ müharibəsindən sonra formalaşdırdığı yeni reallıqları həzm edə bilməyən, qəbul etmək istəməyən tərəflər çoxdur, bunlardan biri də məhz BBC-dir. “BBC zaman-zaman Azərbaycana qarşı dezinformasiyalar yaymaqda “şücaət” göstərib. Keçən əsrin 90-cı illərinin əvvəllərində azərbaycanlıların özlərinin dədə-baba yurdlarını vəhşiliklər, vandallıqlar, ölümlər qarşısında tərk etmək məcburyyətində qaldığını əks etdirən o görüntüləri gizlədən BBC Azərbaycan ərazilərindən könüllü köçüb gedən, Azərbaycanın çağırışlarına baxmayaraq komfort şəraitində çıxıb gedən ermənilərin görüntülərini “etnik təmizləməyə məruz qalanlar”, “vəhşilik qurbanları” kimi qələmə verirlər ki, guya onlar məcburən ev-eşiklərini tərk ediblər. Bu da antiazərbaycan mövqeyidir. BBC həqiqətən də 90-cı illərin əvvəllərində Azərbaycanın 1 milyona yaxın insanına qarşı törədilən o vəhşilikləri zamanında öz ekranlarından göstərsəydi, daha ədalətli, şəffaf informasiya versəydi biz onun addımlarını tərəddüdlə qarşılamazdıq, qərəzsizliyinə şübhə etməzdik. Amma bilirik ki, bunu etməyən BBC bu gün Azərbaycana qarşı dezinformasiya püsgürməyə cəhd göstərir. Eyni zamanda belə münəccimliyin edilməsi, siyasi proqnozların verilməsi özü də çox ciddi arqumentlər tələb edir”. X.Bəşirov qeyd etdi ki, BBC-nin heç bir arqumenti yoxdur. X.Bəşirov vurğuladı ki, 44 günlük müharibə zamanı Azərbaycan bunu etmədi və dövlətimiz Ermənistandan fərqli olaraq təcavüzkar deyil. Onun sözlərinə görə, Ermənistan dəfələrlə Azərbaycana qarşı təxribatlar törədib, ən ciddi təxribatlardan biri isə 12-14 sentyabr tarixlərində sərhədboyu ərazlərdə olmuşdu. Azərbaycan Murov dağından başlayaraq Araz çayına qədər sərhədboyu ərazilərdə strateji yüksəklikləri nəzarətə götürdü. Həmin o dönəmdə bizim əlimizdə kifayət qədər imkan, əsas vardı ki, Ermənistan Azərbaycana qarşı təxribat törədib, biz Ermənistanın təxribatlarına cavab olaraq bu gün BBC-nin münəccimlik etdiyi məsələni o zaman həyata keçirə bilərdik. Niyə etmədik? Yaxud 19-20 sentyabr tarixlərində Azərbaycan 23 saatlıq antiterror tədbirləri həyata keçirdi. Həmin o dönəmdə də biz onu edə bilərdik. Biz bunu etmədik. Yəni bu gün antiazərbaycan mövqeyini fərqli formalarda ifadə edən o təxribatçı, Cənubi Qafqazda sülhün tərəfdarı olmayan o qüvvələrin iddia etdiyi o məqamları reallaşdırmağa dəfələrlə imkanımız olsa da, biz bunu etməmişik, Azərbaycan buna getməyib. Ona görə getməyib ki, Azərbaycanın davası, mübarizəsi, müharibəsi yalnız və yalnız öz ərazi bütövlüyünü təmin etməklə bağlı olub. Azərbaycanın apardığı mübarizə beynəlxalq səviyyədə ərazilərimizin tanınması və qarşılıqlı şəkildə bu ərazi bütövlüyünə hörmətlə yanaşılması ilə əlaqədar olub. Ona görə də bizə qarşı səsləndirilən bu dezinformasiyanın heç biri bizə yapışmır. Bu, əslində Azərbaycanla bağlı heç bir şeyi dəyişmir, əksinə, bir daha BBC-nin beynəlxalq səviyyədə nə dərəcədə dezinformasiya siyasəti ilə məşğul olduğundan, kimlərinsə maraqlarına xidmət edən bir media qurumu olduğundan xəbər verir. Biz bir daha belə qurumların çirkin kampaniyalarını ifşa etmiş oluruq. Ona görə düşünürəm ki, BBC-nin bu yanaşması kökündən yanlışdır, Azərbaycanın atdığı addımlarla heç uyuşmur, yaxından-uzaqdan dövlətimizin mövqeyi ilə kəsişmir, əksinə, bizim mövqeyimizlə daban-dabana ziddir. Düşünürəm ki, Azərbaycana qarşı belə əsassız ittihamlar səsləndirməklə əslində belə qüvvələr kimlərinsə maraqlarının təsiri altına düşənlərdir. Bunlar isə Azərbaycanın qazandığı qələbənin, Cənubi Qafqazda formalaşdırdığı reallıqların, Qafqaz evi yaratmaqla bağlı Prezident İlham Əliyevin təşəbbüslərinin üzrindən xətt çəkmək, onu kölgə altına almaq cəhdləri ilə bağlıdır. Hesab edirəm ki, bu, prosesi müəyyən qədər uzada bilər, amma prosesin qarşısını ala bilməz. Azərbaycan 2020-ci ilin 27 sentyabrından Cənubi Qafqazda start verdiyi sülh prosesinə tam şəkildə nail olacaq...” - deyə X.Bəşirov əlavə etdi.
İradə SARIYEVA
