7 fevral seçkisinin imza kampaniyası nələrlə yadda qaldı?..
Hüseyn İbrahimov: “Bütün bunlar ölkədə mövcud olan stabilliyin, sağlam siyasi mühitin göstəricisidir”
Məlum olduğu kimi, 7 fevralda növbədənkənar prezident seçkiləri keçiriləcək. Fevralın 7-də keçiriləcək növbədənkənar prezident seçkiləri ilə bağlı Mərkəzi Seçki Komissiyası tədbirlərini plana uyğun davam etdirir.
Hazırda prezidentliyə namizədliyini irəli sürən şəxslərin imzatoplama kampaniyası, qeydiyyat prosesi davam edir. Həmçinin, yanvarın 7-dən etibarən təbliğat-təşviqat materiallarının yerləşdirilməsi üçün yerlər müəyyənləşib.
Prezident olmaq istəyən namizədlər imza toplayırlar. İndiyə qədər namizədlərin hər biri Seçki Məcəlləsinin tələblərinə uyğun olaraq imza toplayıb. Burada diqqəti çəkən məqam odur ki, imzatoplama kampaniyasında heç bir toqquşma, hansısa insident, hüquqi mübahisə, fövqəladə hadisə baş vermədi. Bütün bunlar və ümumiikdə seçki prosesinin rəvan keçməsi nəyin əlamətidir?
“Əgər əvvəlki seçkilərdə ərazilərimizin dörddə biri işğal altında idisə, indi onların hamısı azad edilib”
Sözügedən məsələ ilə bağlı “Bakı-Xəbər”ə açıqlama verən İdarəçilik Akademiyasının müəlimi, sosioloq Hüseyn İbrahimov hesab edir ki, bütün bunlar ölkədə mövcud olan stabilliyin, sağlam siyasi mühitin göstəricisidir: “Məsələ ondadır ki, Azərbaycan öz tarixinin ən şanlı dövrünü yaşayır. Çünki 30 illik işğala son qoyuldu, ölkənin ərazi bütövlüyü təmin edildi. Ən başlıcası, Xankəndidə Azərbaycanın suverenliyi bərpa edildi. Əgər əvvəlki seçkilərdə ərazilərimizin dörddə biri işğal altında idisə, indi onların hamısı azad edilib. Belə bir siyasi atmosferdə seçki kampaniyasının keçiriməsi həm bütün ictimaiyyətə, həm də prosesdə iştirak edən siyasi qüvvələrə müsbət təsir edib. Fikrimcə, məhz bu səbəbdən bütün proses normal gedir. Bu və ya digər formada hansısa xoşagəlməz hadisə yaşanmır. Əvvəl radikal müxalifətin əsas arqumenti o idi ki, ərazilər işğal altındadır. Hər seçki dönəmində bunu qabardıb təbliğatı bunun ətrafında qururdular. Torpaqlar azad ediləndən sonra artıq bu arqument əldən çıxıb. Ona görə də prosesə təsir göstərə, ölkədəki sabitliyi poza bilmirlər. Digər tərəfdən, mötədil, konstruktiv mövqedən çıxış edən müxalif qüvvələr Prezident İlham Əliyevin böyük liderliyini qəbul edirlər. Onun Qarabağ zəfərində oynadığı böyük rolu müsbət qiymətləndirirlər. Hesab edirəm ki, bütün bunlar ictimai rəydə müsbət qarşılanır. Başqa bir faktor onunla əlaqədardır ki, prezidentlik iddiasında olan heç bir namizədə hansısa problem yaradılmır. Kim istəyirsə namizədliyini verir və tərəfdarları ilə birlikdə imzatoplama kampaniyasını həyata keçirir. Bir sözlə, ölkədə unikal sağlam seçki mühiti var. Siyasi qüvvələr arasında sağlam bir siyasi mədəniyyət formalaşıb”.
Vidadi ORDAHALLI
