Ermənistan Zəngəzur dəhlizində avtomobil yolundan xüsusilə qorxur...
Elşad Musayev: “Biz Ermənistanı Zəngəzur dəhlizinin açılmasına məcbur etməliyik”
Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Almaniyanın “Berliner Zeitung” qəzetinə müsahibəsində qeyd edib ki, Ermənistan Zəngəzurdan Naxçıvana avtomobil yolunun açılmasına razılıq vermir:
“Sovet dövründə və hətta ölkələrimizin müstəqilliyinin ilk illərində istismarda olan dəmir yolu ilə keçməli olan ən qısa marşrutla sonuncu yük qatarı 1992-ci ildə keçib. Ermənistan dəmir yolu əlaqəsini bərpa etmək istədiyini bəyan etsə də, paralel avtomobil magistralın tikintisini rədd edir. Əvəzində bizə uzun, əlverişsiz və hava şəraitindən asılı olan şimal marşrutu təklif olunur. Bu, bir daha Ermənistanın nəqliyyat əlaqələrini açmaq istəmədiyini nümayiş etdirir”.
Maraqlıdır, Ermənistan niyə bu qədər məhz Mehridən keçən avtomobil yolunun açılmasına qarşı çıxır?
“Mehridən keçən avtomobil yolunun məsafə baxımından Naxçıvana daha yaxın olduğunu bildiklərindən buna qarşıdılar”
Sözügedən məsələyə aydınlıq gətirən Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bununla bağlı bir sıra məqamlara toxundu: “Ermənistanın kommunikasiya xətlərinin açılmasına belə pozucu mövqedən yanaşmasında gizli heç nə yoxdur. Məsələ ondadır ki, Ermənistan nəinki avtomobil yolunun, heç dəmir yolunun da açılmasında əslində maraqlı deyil. Çünki Ermənistanın arxasında duran qüvvələr də Zəngəzur dəhlizinin açılmasında maraqlı deyillər. Ona görə də hər dəfə müxtəlif bəhanələr tapırlar. Bundan əvvəl, ümumiyyətlə dəmir yolunun açılmasına qarşı çıxırdılar, buna etiraz edirdilər. İndi isə dəmir yolunun açılmasına razılıq verirər, avtomobil yolunun açılmasına qarşı çıxırlar. Onlar Mehridən keçən avtomobil yolunun məsafə baxımından Naxçıvana daha yaxın olduğunu bildiklərindən buna qarşıdılar. Yaxşı bilirlər ki, bu yol bizim üçün daha əlverişlidir. Sabah başqa bəhanə ilə çıxış edəcəklər. Yəni yollara kimin nəzarət edib-etməyəcəyini gündəmə gətirəcəklər. Zatən 10 noyabr 2020 razılaşmasında Zəngəzur dəhlisinə Rusiya FTX-nin nəzarət etməsi öz əksini tapıb. Ancaq buna baxmayaraq, erməni tərəfi buna qarşıdır. Bir şeyi bilmək lazımdır ki, biz Ermənistanı Zəngəzur dəhlizinin açılmasına məcbur etməliyik. O cümlədən, biz sülhə Ermənistanı məcbur etməliyik. Yəni bu məcburetmə mexanizmi mütləq işləməlidir. Ermənilər görməlidilər ki, onlar bir bəhanə ortalığa atan kimi Azərbaycan Ordusu mütləq hərəkətə keçəcək. Məsələn, Qazaxın 7 kəndi işğal altındadır. Azərbaycan vaxt verməlidir ki, filan müddət ərzində məsələ həll olunmalıdır. Həll olunmayacaqsa, o zaman məsələ güc yolu ilə həll ediləcək. Qoşunlarımız bizə məxsus olan ərazilərdə mövqelənməlidilər. Çünki Azərbaycan müharibədə qalib tərəfdir. Qalib tərəf olaraq danışıqlarda öz mövqeyini ortaya qoymalıdır. Çünki biz düşmənə güzəştə gedə bilmərik. Ona görə ki, Ermənistana güzəştə getdikcə onların iddialarının, bəhanələrinin sayı daha da artacaq. Biz unutmamalıyıq ki, Ermənistan hər vasitə ilə sülh müqaviləsini uzatmağa çalışır. Bunda onların məqsədlərindən biri revanş götürmək üçün güc toplamaqdır. O üzdən, Azərbaycan tələblərində sərt və qərarlı olmalıdır”.
Vidadi ORDAHALLI
