ABŞ Konqresi Ukraynaya 60 milyard yardımdan açıq imtina etdi...
Ramil Məmmədli: “Bir sözlə, ABŞ bu yükü tam olaraq Avropanın üzərinə qoyur”
ABŞ Konqresinin Nümayəndələr Palatasının spikeri Mayk Conson müsahibəsində bu ilin fevralına qədər Ukraynaya yardımın təsdiqlənməsi məsələsinə dair sualları cavablandırıb.
Konqres sədri, Ukraynaya yardım cəmi 60 milyard dollar təşkil etdiyi halda, ABŞ-ın 34 trilyon dollarlıq federal borcunu xatırlatmağı lazım bilib və iddia edib ki, Ukraynaya yardımın məbləği kifayət qədər ciddidir. Bununla yanaşı, Conson fevral ayına qədər Ukraynaya yardımın təsdiqlənib-təsdiqlənməyəcəyinə dair suala birbaşa cavab verməkdən yayınıb və "başqasının təhlükəsizliyini təmin etməzdən əvvəl ABŞ sərhədlərinin təhlükəsizliyini təmin etməliyik" cavabını verib. Bütün bunlar ABŞ-nin Rusiya işğalına məruz qalmış Ukraynanı yarı yolda qoymaq üzrə olduğuna dair təsəvvür yaradırmı?
Hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki, bundan əvvəl ABŞ parlamentinin hər iki palatası ölkənin federal hökumətinin maliyyələşdirilməsinin 45 gün, yəni ötən il noyabrın 17-dək uzadılmasını nəzərdə tutan qanunu təsdiqləmişdi və ABŞ prezidenti Co Bayden qərarı imzalayıb. Sənəddə Ukraynaya yardım nəzərdə tutulmayıb, bu səbəbdən senator Maykl Bennet təşəbbüsün qəbulunu gecikdirib. O, Senat rəhbərlərindən qanunvericilərin yaxın günlərdə Kiyev üçün ayrıca yardım layihəsini qəbul etməli olacağına dair öhdəlik götürməyi tələb etdi.
Sonra bildirildi ki, Ağ Ev Amerika qanunvericilərindən Kiyev hakimiyyətinə vəsaitin ayrılmasını nəzərdə tutan ayrıca qanun layihəsi təqdim etməyi gözləyir.
Ötən ilun avqustun ayında Vaşinqton administrasiyası Konqresdən ABŞ-da sentyabrın 30-da başa çatacaq 2023-cü maliyyə ilində federal büdcədən Kiyevə təcili hərbi yardım üçün 13 milyard dollar, Ukrayna və digər ölkələrə iqtisadi və təhlükəsizlik yardımı üçün isə 8,5 milyard dollar məbləğində əlavə xərc tələb etmişdi. Göründüyü kimi, ABŞ dolayı yollarla olsa da, Ukraynaya yardımı ləngidir. İndiyədək Ukraynaya hərbi yardımın əsas yükünü ABŞ öz üzərinə götürüb, on milyardlarla dollar ayırıb. İndi avropalılar bu rolu öz üzərinə götürməyi planlaşdırır.
Almaniya hökuməti bu il hərbi yardımı ikiqat artıracaq, Avropa Birliyi rəsmiləri iqtisadi və hərbi yardımın yeni növləri üzərində işləyirlər. Qitənin digər ölkələri də bu il ərzində hərbi yardımı davam etdirəcəklərinə söz veriblər. Görünən budur ki, ABŞ Ukraynanın qələbəsinə inamını tamamilə itirib, ona görə də Kiyevi Moskva ilə danışıqlara sövq edir.
Ukraynalılar münaqişənin ikinci qışına dözdükcə, Bayden administrasiyası, görünür, Ukraynanın qələbəsi haqqında düşünməkdən vaz keçdi. Bunun əvəzində Vaşinqton hesab edir ki, hər iki tərəf danışıqlar aparmalıdır.
Dövlət Departamentinin mətbuat xidmətinin rəhbəri Metyu Miller brifinqdə deyib ki, ABŞ Ukraynaya hərbi dəstək verməyə davam edəcək, lakin 2022-2023-cü illər səviyyəsində deyil.
Onun sözlərinə görə, gələcəkdə Kiyevə ABŞ və müttəfiqlərindən maliyyə ayrılmasına ehtiyac olmayacaq, çünki Qərbin məqsədi Ukraynanın özünü hər şeylə, o cümlədən silahla təmin etməsidir. Bir sözlə, ABŞ bu yükü tam olaraq Avropanın üzərinə qoyur”.
Məhəmmədəli QƏRİBLİ
