Erməni mediası ATƏT-in olmayan MQ-nin olmayan həmsədrliyini ölməyə qoymur...
Azər Həsrət: “...Bu absurddur, ictimai rəylə monipulyasiya cəhdidir, amma heç bir işə yarayan deyil”
Keçmiş Qarabağ münaqişəsinin həlli üçün faktiki olaraq heç bir iş görməyən, 30 il turist səfərləri ilə ermənilərin maraqlarını müdafiə edən ATƏT-in Minsk qrupunun ölü bir qurum olduğu məlumdur. Qarabağ problemini Azərbaycan özü öz gücünə həll etdi, burada sözügedən qurumun heç bir rolu olmadı.
Lakin buna baxmayaraq, Ermənistan mətbuatı mütəmadi olaraq ATƏT-in Minsk qrupunu, onun “həmsədrlər”ini davamlı reklam edir. Erməni mətbuatı məlumat yayıb ki, yanvarın 8-də Ermənistanın xarici işlər naziri Ararat Mirzoyan ABŞ-ın Qafqaz üzrə danışıqlar üzrə baş müşaviri, ATƏT-in Minsk qrupunun amerikalı həmsədri Lui Bononu qəbul edib.
Gerçəyi bilə-bilə Ermənistan mediasının bu cür təqdimat etməsi gülməli görsənir. ATƏT-in Minsk qrupunun heç bir funksiyası olmadığı halda erməni mediasının bunu xüsusi təqdim etməsi, olmayan həmsədrləri daim gündəmdə saxlaması suallar doğurur. Erməni mediasının maraq və məqsədi nədir ki, hər dəfə bu şəkildə təqdimatlar edir?
“Zatən, ATƏT-in Minsk qrupu deyilən bir nəsnə yoxdur”
Siyasi şərhçi Azər Həsrət “Bakı-Xəbər”ə “Əlbəttə, bu absurddur, ictimai rəylə manipulyasiya cəhdidir, amma heç bir işə yarayan deyil. Zatən, ATƏT-in Minsk qrupu deyilən bir nəsnə yoxdur. Onun mövcudluğu dönəmində görəcəyi iş Azərbaycanla Ermənistan arasında münasibətləri normallaşdırmaq, Qarabağ problemini kökündən həll etmək idi. Göründüyü kimi, Qarabağ məsələsi kökündən həll edilib, Azərbaycan dövləti öz gücü, öz imkanları çərçivəsində bunu həll edib, Minsk qrupunun mandatı da artıq qüvvədən düşmüş olub. Bu baxımdan, ATƏT-in Minsk qrupu deyilən bir qurum yoxdur. ABŞ kimi böyük bir dövlət özünü belə xırda manipulyasiyalara alət etməməlidir”- deyə bildirdi.
A.Həsrətin sözlərinə görə, ermənilər hər xırda məsələdən istifadə etməyə çalışırlar, ancaq ABŞ-a belə cılız manipulyasiyalar əsla yaraşmır. O hesab edir ki, Azərbaycanla nəsə danışmaq istəyirlərsə buyurub gəlib danışsınlar, amma durub bu cür xırda təbliğatla beyinləri qarışdırmağa cəhd göstərmək o boyda qlobal gücə əsla yaraşmır. “Görünür, ABŞ indi elə bir vəziyyətə düşüb ki, hətta “suda boğulan saman çöpündən yapışar” misallı belə xırda, cılız manipulyasiyalara getməyə məcbur olur”-deyə A.Həsrət vurğuladı.
A.Həsrət hesab edir ki, erməni mediasının ATƏT-in Minsk qrupunu “diri saxlamaq” cəhdi onların hər şeydən sui-istifadə etmək cəhdindən irəli gəlir, gərək ABŞ buna yol verməsin.
İradə SARIYEVA
