Baş Plan Bakıda 400 min yeni iş yeri vəd edir - İnanaqmı?..
Aydın Hüseynov: “Baş Plana əsasən, yeni şəhər iqtisadiyyatı konsepsiyası minlərlə iş yerinin yaranmasına səbəb olacaq”
Məlum olduğu kimi, Bakı şəhərinin 2040-cı ilə qədər olan Baş Planı təsdiq edilib. Planda paytaxtın gələcək inkişafının planlaşdırılması baxımından mühüm prioritetlər və tədbirlər müəyyənləşib.
Paytaxtın 212,3 min hektarlıq bütün inzibati ərazisini əhatə etməklə növbəti 20 il ərzində şəhərin əsas inkişaf prioritetlərini özündə əks etdirən Baş Planda güclü və dayanıqlı inkişafı təmin edəcək mütəşəkkil çoxmərkəzli şəhər, ərazilərdən kompleks istifadə nəticəsində formalaşan dayanıqlı şəhər mühiti, mədəni və tarix-memarlıq irsinin qorunması, ərazi zonalaşdırılması, əsaslı tikinti, nəqliyyat və sosial infrastrukturlar, kommunal sistemlər, ətraf mühitin təmizlənməsi və ərazilərin abadlaşdırılması tədbirləri, habelə post-sənaye dövrünə keçidi təmin edəcək yeni şəhər iqtisadiyyatı qurucluğu kimi hədəflər yer alıb. Eyni zamanda, çoxsahəli iqtisadi strategiyanın tətbiqi çərçivəsində Bakı şəhərində 372 min yeni iş yerinin açılması da nəzərdə tutulur. Bu sayda yeni iş yerinin açılması nə dərəcədə realdır?
“Bakının Regional Bilik Mərkəzinə çevrilməsi üçün yüksək dəyər yaradan yeni sahələr və inkişaf etməkdə olan iqtisadi sektorlar da yaradılacaq”
Mövzu ilə bağlı fikirlərini bildirən Milli Məclisin deputatı Aydın Hüseynov “Bakı-Xəbər”ə açıqlamasında qeyd etdi ki, Bakının Baş Planı 4 prioritet hədəfə - şəhərin dayanıqlı inkişafı, ətraf mühitin regenerasiyası, şəhərin memarlıq siması və tarixi irsə qayğı və yeni şəhər iqtisadiyyatı prinsiplərinə əsaslanır. Baş Plana əsasən, müasir infrastrukturların yaradılması, o cümlədən metro və dəmir yolu şəbəkəsinin inkişafı, küçə-yol şəbəkəsinin təkmilləşdirilməsi və genişləndirilməsi, ictimai nəqliyyat marşrutlarının təkmilləşdirilməsi və genişləndirilməsi də əsas prioritetlərdəndir: “Həmin işləri görmək üçün isə böyük həcmdə tikinti-bərpa, qurucluq, istehsal, emal, xidmət və s. kimi sahələrə kəskin ehtiyaclar yaranacaq. Təkcə metro və dəmiryol sistemlərinin yaradılmasında on minlərlə işçiyə tələb yaranacaq. Bundan başqa, nəqliyyat və tikinti sektorunda əlavə tədbirlərə minlərlə işçi lazım olacaq, yeni qurulacaq xidmət sahələrində saysız hesabda işçi qüvvəsi cəlb olunacaq. Bütün bunlar yeni iş yerlərinin meydan çıxması deməkdir”.
A.Hüseynovun sözlərinə görə, Baş Planda həm də paytaxtda yeni sənaye və xidmət, turizm sahələrinin yaradılması nəzərdə tutulub. İqtisadiyyatın şaxələndirilməsi üzrə milli proqramlara uyğun olaraq, yeni şəhər iqtisadiyyatı konsepsiyası çərçivəsində mərhələli yanaşmanın tətbiqi təklif edilir ki, bu da Bakının iqtisadiyyatının əsasını təşkil etməklə formalaşmış sahələrin konsolidasiya edilməsi və modernləşdirilməsinə səbəb olacaq. Eyni zamanda, Bakının Regional Bilik Mərkəzinə çevrilməsi üçün yüksək dəyər yaradan yeni sahələr və inkişaf etməkdə olan iqtisadi sektorlar da yaradılacaq. Bu da elmtutumlu iqtisadiyyatın tələblərinə uyğun olaraq böyük işçi qüvvəsini formalaşdıracaq.
Günel CƏLİLOVA
