Blinken - Fidan görüşü Ermənistanı ağıllı mövqelərə çəkə bilsə...
Sahil Kərimli: “Əlbəttə ki, ABŞ dövlət katibinin Türkiyəyə son səfəri zamanı bölgəmizdə gedən proseslər də ciddi müzakirə mövzusu olub”
İstanbulda Türkiyənin xarici işlər naziri Hakan Fidan ilə ABŞ dövlət katibi Entoni Blinken arasında görüş olub. Görüşdən sonra heç bir açıqlama verilməyib.
Türkiyə Xarici İşlər Nazirliyi təxminən iki saatlıq danışıqların nəticələrinə əsasən bildirib ki, Hakan Fidan və Entoni Blinken danışıqlarda Qəzzada nizamlanma və İsveçin NATO-ya üzv olmaq ərizəsini müzakirə ediblər: “Görüşdə nazirlər Qəzzadakı müharibə və humanitar böhranı, İsveçin NATO-ya üzvlüyü prosesini, ikitərəfli və regional məsələləri müzakirə ediblər”.
Danışıqlardan sonra E.Blinken Türkiyə prezidenti Rəcəb Tayyib Ərdoğanla görüşüb.
E.Blinken oktyabrın 7-də HƏMAS-ın İsrailə hücumundan sonra bölgəyə dördüncü səfərini edir. ABŞ dövlət katibi İstanbuldan sonra Yunanıstana, oradan isə İordaniya, Qətər, BƏƏ, Səudiyyə Ərəbistanına, İsrailə, Fələstinə və Misirə gedəcək.
Çox maraqlıdır, Blinkenin Türkiyədəki təmaslarında Azərbaycan-Ermənistan münasibətləri, sülh prosesi ilə bağlı məsələlər, Ermənistanın bundan sonra Türkiyə ilə necə münasibətlər quracağı ilə bağlı müzakirələrin aparılma ehtimalı varmı?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, qardaş Türkiyə daim Ermənistan-Azərbaycan münasibətlərinin normallaşdırılması istiqamətində mümkün olan bütün səyləri göstərib: “44 günlük Vətən müharibəsi zamanı və ondan sonrakı dövr ərzində də qardaş ölkə Azərbaycanın haqqlı mövqeyini qətiyyətli şəkildə müdafiə edib. Türkiyə Cənubi Qafqazda sülhə və təhlükəsizliyə tövhə verən əsas ölkələrdən biridir. Əlbəttə ki, ABŞ dövlət katibinin Türkiyəyə son səfəri zamanı bölgəmizdə gedən proseslər də ciddi müzakirə mövzusu olub. Türkiyə birmənalı olaraq Azərbaycanın ədalətli mövqeyini ABŞ tərəfinə çatdırıb və Ermənistanın sülh müqaviləsi imzalaması üçün bütün mümkün imkanlar üzərində danışıqlar aparılıb. Hazırda Ermənistan bölgədə sülhə nail olmaq üçün heç də konstruktiv mövqe tutmur. Bu bütün dünyaya məlumdur. Təəssüf ki, Ermənistanı dəstəkləyən, İrəvana havadarlıq edən ABŞ və Avropa dairələri var. Qərb daim Cənubi Qafqazda sülhü və təhlükəsziliyi alqışlayan bəyanatlar versə də, yürüdülən real siyasətdə bunun əksini görürük. Bu amillər də Ermənistanla Azərbaycan arasında münasibətlərin normallaşması prosesinə ciddi zərbə vurur. Blinkenin Türkiyəyə səfəri zamanı aparılan danışıqların bir hissəsi də bu istiqamətə yönəlib. Şübhə yoxdur ki, qardaş Türkiyə həmişə olduğu kimi yenə Azərbaycanın mövqeyini - sülhü, təhlükəsizliyi və gələcək rifahı dəstəkləyib. Bu isə təkcə Azərbaycana yox, bölgəmizdə yerləşən bütün ölkələrin maraqlarına xidmət edən amildir”.
Məhəmmədəli QƏRİBLİ
