İrəvandan yeni absurd ittiham - "Xankəndidə partlayışı Azərbaycan törədib"...
Mübariz Göyüşlü: “Azərbaycan dövlətini bu məsələdə ittiham etməyin özü cinayətdir”
Sentyabın 25-də Azərbaycanın Qarabağ iqtisadi rayonunda, Xankəndi yaxınlığında yanacaq anbarının partlaması səbəblərini araşdırmaq üçün Ermənistanda İstintaq Komitəsi yaradılıb. Ermənistanın qanunsuz olaraq belə bir komitə yaratması az imiş kimi, İstintaq Komitəsinin sədri Argişti Kərəmyan Azərbaycana şər də atır.
O iddia edir ki, guya Qarabağda yanacaq anbarında baş vermiş partlayış nəticəsində 218 nəfər həlak olub, 21 nəfər itkin düşmüş hesab olunur, nəməlum meyitlərin sayı isə 3-dür. Hadisənin baş verməsində Azərbaycanı günahkar çıxarmağa çalışan Kərəmyan iddia edib ki, bu işdə günahkar “insanların kütləvi köçünə məcburi şərait yaratmış Azərbaycandır, məsuliyyəti Azərbaycan daşıyır”, guya onlar “Azərbaycanın siyasətinə görə bu vəziyyətə düşüblər”.
Kərəmyan iddia edir ki, sentyabrın 25-də Qarabağda benzin anbarı partlayarkən 218 adam ölüb. Bu rəqəm nə qədər dəqiq ola bilər? Partlayış zamanı ermənilər orada yox idilər, nə bildilər nə qədər adam ölüb?
“Bu partlayışda erməni izini itirmək üçün Azərbaycana böhtan atırlar və ortaya saxta ölü sayı çıxarırlar”
Müasir İnkişaf Birliyinin sədri Mübariz Göyüşlü “Bakı-Xəbər”ə şərhində bildirdi ki, İstintaq Komitəsinin sədrinin açıqladığı fikirlər tamamilə absurddur. “Onun iddiası tamamilə əsassızdır və o biabırçı, dəxli olmayan səbəblər gətirir. Hesab edirəm ki, bu, ermənilərin növbəti iftira kampaniyasıdır, indiyə qədər həyata keçirdikləri təxribatların davamıdır. Bir tərəfdən sülhdən, sülh sazişinin imzalanmasından, mehriban qonşuluq əlaqələrinin qurulmasının vacibliyindən danışırlar, özlərini dünyaya sülhsevər kimi göstərib təkliflər verirlər, başqa bir tərəfdən də bu cür yalan, uydurma xarakterli məlumatlar yayırlar. Bu partlayışı ermənilərin özlərinin törətməsi ilə bağlı başdan şübhələr var. Bu ayrıca bir araşdırma mövzusudur ki, bu nə idi, bunu kim kimə qarşı təşkil etmişdi, səbəb nə idi. Əgər bunu Azərbaycan etmişdisə və bizim etnik təmizləmə aparmaq niyyətimiz vardısa, onda nə üçün dövlətimiz ora təcili surətdə yanğınsöndürən maşınlar, təcili tibbi yardım göndərdi, zərərçəkmişlərin köməyinə getdi? Hadisə baş verən kimi, ora təcili surətdə yardım göndərildi. Ona görə də Azərbaycan dövlətini bu məsələdə ittiham etməyin özü cinayətdir”-deyə M.Göyüşlü bildirdi.
M.Göyüşlü vurğuladı ki, bu iddialar və əsassız ittihamlar bu toplumun hələ də xəstə təfəkkürdən xilas ola bilməməsinin göstəricisidir. Onların hələ də zərərli ideyalar burulğanında qaldıqlarını deyən müsahibimiz vurğuladı ki, onlar hər zaman ölənlərin sayını şişirtməklə məşğul olublar. “O qədər xəstə təfəkkürə malikdirlər ki, hətta 1915-ci ildə Osmanlı Türkiyəsində 1 milyon yarım erməninin “qətlə yetirildiyini” deyirlər və bu yalançı rəqəmi dünyada Türkiyəyə qarşı rəsmiləşdirmək istəyirlər. Onlar Birinci və İkinci Qarabağ müharibəsində ölən və yaralanan ermənilərin də sayını şişirdibər. xüsusən də mülki şəxslərin “soyqırıma” məruz qaldığını iddia edirlər. Yanacaq anbarının partladılması nəticəsində ölənlərin sayının da şişirdilməsi bunun tərkib hissəsidir. Onlar çalışırlar ki, Azərbaycana beynəlxalq səviyyədə təzyiqlər artsın, Azərbaycanın təcrid olunmasını istəyirlər”-deyə bildirən M.Göyüşlü hesab edir ki, ermənilər bu yolla Azərbaycana psixoloji təzyiq göstərmək istəyirlər. O qeyd etdi ki, ermənilərin bu cəhdləri alınmayacaq və onlar məsuliyyəti öz üzərlərindən atmaq üçün Azərbaycanı hədəf seçiblər: “Birincisi, o komitənin yaradılması qanunsuzdur. Azərbaycan torpağında baş verən hadisəni onlar niyə araşdırmalıdır? Dediyim kimi, başdan hər kəsdə şübhə vardı ki, yanacaq anbarını erməni separatçılarının, terrorçularının özləri partladıb. Bu partlayışda erməni izini itirmək üçün Azərbaycana böhtan atırlar və ortaya saxta ölü sayı çıxarırlar. Bu isə absurddur”.
İradə SARIYEVA
