Yaponiyada güclü zəlzələ Rusiyanı qorxutdu - xəbərdarlıq sistemi işə düşdü, təxliyələr başladı
Yaponiyada yerli vaxtla saat 16.06-da 5,7 bal gücündə, saat 16.10-da isə 7,4 bal gücündə zəlzələ baş verib. Böyük zəlzələlərdən sonra sunami xəbərdarlığı edilib.
Dalğaların 5 metrə qədər çata biləcəyi xəbərdarlığı edən dövlət televiziyası NHK canlı yayımda çağırış edərək “Böyük sunami, dərhal qaçın” xəbərdarlığı edib. Sahil bölgələrinin sakinlərinə mümkün qədər tez hündür yerlərə və ya hündür binaların yuxarı mərtəbələrinə çıxmaq çağırılıb.
NHK televiziyası 1,20 metr hündürlüyündə sunaminin İşikava prefekturasının Vacima şəhərinin sahillərinə çatdığını bildirib. Ölkədə 36 mindən çox evə elektrik enerjisinin verilişi dayandırılıb, insanların təhlükəsiz ərazilərə köçürülməsinə başlanıb.
Zəlzələlərdən sonra Rusiyanın Saxalin vilayəti üçün də sunami xəbərdarlığı edilib. Saxalinin Fövqəladə Hallar Nazirliyinin verdiyi açıqlamada Saxalinin qərb hissələrinin sunami dalğalarının təsirinə məruz qala biləcəyi bildirilib. Açıqlamada müəyyən ərazilərdə xəbərdarlıq sisteminin işə salındığı və bu ərazilərdə əhalinin təhlükəsiz yerlərə köçürülməsinə başlanıldığı bildirilib.
TAHİR
