“Zenit”in üç idmançısı - Zeynəb respublika birincisi, Leyla və Şəlalə respublika üçüncüsü oldu... - FOTO
Azərbaycan idmanında qızlarımızın öz yeri var. Cəsarətini qılınc, qalxan tutan, cəng meydanında heç də kişilərdən geridə qalmayan ulu nənələrimizin ruhundan alan qızlarımız idmanın bütün sahələrində uğur qazanıblar, dünya, Avropa, olimpiya çempionatlarında, xaricidə və regionda keçirilən idman yarışlarıda hər zaman fərqlənirlər.
Üç qızdan danışmaq istəyirəm, onlar Ümummilli Lider Heydər Əliyevin 100 illik yubileyinə həsr olunan taekvondo üzrə Respublika çempionatında fərqləndilər, qələbə qazanıb adlarını yaddaşlara yazdılar. Azərbaycan Taekvondo Federasiyası, Gənclər və İdman Nazirliyinin birgə təşkilatçılığı ilə 24-28 dekabr tarixlərində keçirilən respublika birinciliyi və çempionatında "Zenit" Bədən Tərbiyəsi İdman Cəmiyyətinin üç yetirməsi - Zeynəb Səfərəliyeva I, Leyla Əliyeva III, Şəlalə Şabanlı III yerləri tutdular. 13 yaşlı Zeynəb Səfərəliyeva bütün rəqiblərini məğlub edərək yeniyetmələr üzrə Azərbaycan çempionu oldu, adını respublika çempionatının qaliblərinin sırasına yazdırdı. 5 yaşından idmanın taekvondo növü ilə məşğul olan Z.Səfərəliyevanın məşqçisi Avropa çempionu, tanınmış idman ustası Fatma Əliyevadır. Zeynəb ligdə ikinci, üçüncü yerləri tutub, əvvəlki dövrdə respublika üçüncüsü olub.
Səfərəliyeva Zeynəb Yusif qızı Bakı şəhərində yaşayır və 129 saylı orta ümumtəhsil məktəbinin 8-ci sinif şagirdidir. 13 yaşlı Z. Səfərəliyevanın gələcəkdə daha böyük yarışlarda iştirak edib birincilik qazanacağına əmin olan məşqçisi F. Əliyeva deyir ki, tələbəsinin daha böyük uğurlar əldə etməyə güclü potensialı var. Zeynəbin Respublika birincisi olmasını böyük sevinclə qarşılayan F. Əliyevanın sözlərinə görə, əldə edilən qələbə gərgin zəhmətin, davamlı məşqin, nizam-intizamlı davranışın göstəricisidir. Məşqçisi inanır ki, Zeynəb daha uca zirvələr fəth edəcək.
76 komandanın və onlarla yeniyetmənin mübarizə apardığı taekvondo respublika çempionatında fərqlənən idmançılardan biri də “Zenit” Bədən Tərbiyəsi İdman Cəmiyyətinin idmançısı 14 yaşlı Leyla Əliyevadır. Gənclər arasında Azərbaycan çempionatında III yeri qazanan Leyla 44 kq da döyüşüb. 2009-cu il doğumlu Leyla Əliyeva indiyə qədər bir sıra idman yarışlarında qalib olub, lig yarışlarında II yer tutub, respublika üçüncüsü olub. Bir çox yarışlarda qələbə qazanıb. Bakı şəhərində yerləşən 244 nömrəli orta məktəbin 8 b sinif şagirdi Leyla Əliyeva da uşaqlıqdan taekvondo ilə məşğul olur. Məşqçisi isə Avropa çempionu, tanınmış idman ustası Fatma Əliyevadır. Leylanın gələcəkdə daha böyük uğurlar qazanacağına əmin olduğunu deyən F. Əliyevanın sözlərinə görə, Leyla məşğul olduğu idman sahəsini çox sevir və məşqlərdə həvəslə iştirak edir.
Böyüklər arasında Respublika çempionatında III yer qazanan Şəlalə Şabanlı "Zenit" Bədən Tərbiyəsi İdman Cəmiyyətini təmsil edib.
“Zenit” Bədən Tərbiyəsi İdman Cəmiyyətinin Taekvondo bölməsinin baş məşqçisi, Əməkdar məşqçi Ramil Həsənovun tələbəsi olan Ş. Şabanlı 2006-cı ildə doğulub. Artıq orta məktəbi bitirən və hazırda məşqlərini davam etdirən Ş.Şabanlı əvvəlki illərdə yeniyetmələr arasında Respublika çempionu olub.
Məşqçisi R.Həsənov olan Ş.Şabanlının hədəfi daha böyük və nüfuzlu idman yarışlarında qalib gəlib Azərbaycanın Bayrağını ucalara qaldırmaqdır. İdmançılar və məşqçilər bizimlə söhbətlərində bildirdilər ki, "Zenit” Bədən Tərbiyəsi İdman Cəmiyyəti Respublika Şurasının sədri Fazil Hadıbəyov taekvondo idman növü ilə məşğul olan idmançılara böyük qayğı və diqqət göstərir. F.Hadıbəyovdan razılıq edən müsahiblərimiz qeyd etdilər ki, onlar hər cür diqqətlə əhatə olunublar.
Hər birimiz əminik ki, Zeynəb də, Leyla da, Şəlalə də öz qələbələri ilə Azərbaycan Bayrağını qaldırıb, himnimizi səsləndirəcəklər...
Bu üç cəsur qızın adı yaxın gələcəkdə nəinki Azərbaycanda, eləcə də bütün dünyada duyulacaq. Səsiniz hər zaman yüksəklərdən gəlsin, qızlar! Sizə qələbə çox yaraşır.
İradə SARIYEVA
