“Bolt" sürücüləri təzə qanunsuzluğa başlayıblar - "tıxacdır, artıq verməlisən"...
Son günlər bəzi taksi şirkətlərinin mənzil başına çatdıqdan sonra ilkin qiymətdən daha çox məbləğ göstərməsi barədə şikayətlər səslənir. Əsasən də "Bolt" taksi şirkətinin pik saatlarda belə qanunsuzluqlara yol verdiyi deyilir.
Taksi sürücüləri tıxacda qaldığını bəhanə edərək sərnişindən artıq puı tələb edir. Bu da həmin taksi xidmətindən istifadə edən sərnişinlərin haqlı narazılığına səbəb olur.
Rövşən Həsənov: “Nəzarət zəif olduğuna görə taksi şirkətləri istədiyi addımı ata bilir”
Nəqliyyat eksperti Rövşən Həsənov bildirdi ki, taksi qiymətlərində tariflərin qaldırılması, yəqin ki, yaxın zamanlarda müşahidə olunacaq. Bu qədər ucuz qiymətə gedilə bilməz: “Mən də artımın tərəfdarı deyiləm, amma reallıqda baxanda görürük ki, müəyyən məsafə var ki, onu avtubusla qət etdikdə taksi ilə qət edilən məsafəyə bərabərdir. Heç bir fərqi yoxdur. Nəzarət zəif olduğuna görə taksi şirkətləri istədiyi addımı ata bilir. Qeyd edim ki, qiymət artımı keyfiyyətin artmasına təsir göstərən vasitə deyil.
Onu da deyim ki, taksi minik avtomobilləri ilə daşımalarda qiymətlər tələb və təklif əsasında müəyyən olunur. Mövcud vəziyyətdə bəzi taksi sifarişi operatorları öz maliyyə imkanları hesabına qiymət dempinqi tətbiq edirlər ki, bu da haqsız rəqabət mühitinin formalaşmasının başlıca səbəbidir. Nəticədə, taksi fəaliyyətinin iqtisadi cəhətdən səmərəliliyi aşağı düşür, sürücülər əmək qanunvericiliyində nəzərdə tutulan müddətdən daha artıq işləmək məcburiyyətində qalırlar. Təbii ki, belə olan halda nəqliyyat vasitələri saz, normal vəziyyətdə olmur. Bu da birbaşa xidmət keyfiyyətini aşağı salır və təhlükəsizlik risqlərini artırır".
Həmsöhbətimiz onu da əlavə etdi ki, ölkədə hər hansı qiymət artımı yoxdur. Nə yanacağın, nə də digər yanacaq daşıyıcılarının qiyməti artıb. Belə bir halda taksilərin qiyməti artırması düzgün deyil.
Elxan Əliyev: “Sürücü sərnişindən əlavə heç bir ödəniş tələb edə bilməz, ilkin razılaşdırılmış qiymət nədirsə, o ödənilməlidir”
Sosial sahə üzrə ekspert Elxan Əliyev bildirdi ki, son zamanlar taksi, xüsusilə də “Bolt” taksi şirkəti ilə bağlı narazılıqlar artır: “Taksi müəyyən olunan məkana çatmamış geri qayıdır Sərnişinlərlə qeyri-etik danışırlar və s. hadisələr baş verir. Sürücünün məkana çatanda müəyyən olunan məbləğdən artıq pul tələb etməsi düzgün deyil. Bu qanunuzdur. Sürücü sərnişindən əlavə heç bir ödəniş tələb edə bilməz. İlkin razılaşdırılmış qiymət nədirsə, o ödənilməlidir. Bu halla üzləşən sərnişinlər aidiyyəti qurumlara şikayət etməlidir. İstənilən halda, gediş haqqının artması taksi xidmətindən istifadə edənlərin sayını azalda bilər”.
Günel CƏLİLOVA
