Fransa Azərbaycana təkcə Cənubi Qafqazda məğlub olmur ki...
![Image](/uploads/posts/2023-12/1703775825_makron55.webp)
Azərbaycanın addımları Fransanı artıq təkcə Cənubi Qafqazda yox, tədricən qlobal miqyasda daha aciz duruma salmaqdadır. Buna səbəb Fransanın ölkəmizə qarşı ədalətsiz mövqe sərgiləməsi, beynəlxalq hüquqa zidd addımlar atmasıdır. Artıq Qərb dünyasında da etiraf edilir ki, Fransanın Cənubi Qafqaz siyasəti regionda Avropa İttifaqının mənafelərinə cavab vermir.
Bundan başqa, Fransa regionda sülh və əməkdaşlıq mühitinin yaranmasına təhdid törədir. Eyni zamanda Paris öz casus şəbəkələri ilə dağıdıcı fəaliyyət həyata keçirir. Bu fonda indi Fransa Emmanuel Makron hakimiyyətinin düşünülməmiş siyasəti nəticəsində dünya mediasında casus şəbəkəsinin ifşası ilə müzakirə olunur. Dünya mətbuatı uzun illər Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif əməliyyatlara cəlb edilmiş Fransa xüsusi xidmət orqanlarının geniş agentura şəbəkəsinin Azərbaycanda ifşa olunduğunu yazır. Şübhəsiz ki, Azərbaycan Dövlət Təhlükəsizliyi Xidmətinin bu əməliyyatı Fransa xüsusi xidmət orqanlarının son 50 ildəki ən böyük iflası və biabırçılığıdır.
Elə bundan sonra dekabrın 26-da Fransanın Azərbaycandakı səfiri Ann Buayon Xarici İşlər Nazirliyinə çağırılıb. Fransa Səfirliyinin iki əməkdaşının diplomatik statuslarına uyğun olmayan və “Diplomatik əlaqələr haqqında” 1961-ci il Vyana Konvensiyası ilə ziddiyyət təşkil edən fəaliyyətlərinə görə ciddi etiraz bildirilib və onların Azərbaycan hökuməti tərəfindən “persona-non-grata” elan olunduğu Fransa səfirinin diqqətinə çatdırılıb. Beləliklə, Azərbaycan fakt əsasında bu addımı atıb. Bunun ardınca Azərbaycanın Parisdəki səfirliyinin iki əməkdaşı Bakının fransalı diplomatlara qarşı oxşar hərəkətinə cavab olaraq “persona-non-grata” elan edilib. Fransa Xarici İşlər Nazirliyi bildirir ki, rəsmi Paris Azərbaycanın Fransanın Azərbaycandakı səfirliyinin diplomatik heyətinin iki əməkdaşını “persona-non-grata” elan etməsi ilə bağlı qərarını nəzərə alıb. Halbuki, yuxarıda qeyd olunduğu kimi, Azərbaycan öz qərarını əsaslandırıb. Fransa isə, sadəcə, heç bir əsas olmadan, qisasçılıq məqsədilə Azərbaycanın Fransadakı səfirliyinin iki əməkdaşını “persona-non-grata” elan edib. Bu, Fransanın ölkəmiz qarşısında bir daha aciz duruma düşməsinin təzahürüdür. Elə Milli Məclisin deputatı Bəhruz Məhərrəmov da vurğulayır ki, Azərbaycanın Fransadakı səfirliyinin iki əməkdaşının rəsmi Paris tərəfindən "persona non grata" elan olunması ucuz qisasçılıq məqsədi daşıyır və bu fakt üzrə digər hər hansı izahat yolverilməzdir: “Sirr deyil ki, Fransanın Yaxın Şərq, Mərkəzi Asiya, Şərqi Avropa və Cənubi Qafqazdakı qlobal təhdidə çevrilmiş agentura şəbəkəsinin məhz Azərbaycan xüsusi xidmət orqanları tərəfindən çökdürülməsi, Parisin 30 illik işğal, təcavüz və separatizmə dəstəyi fonunda regionda etimadı itirməsi, habelə Bakının Fransanın qəbul etmək istəmədiyi reallıqları daha da gücləndirməsi fonunda Fransa özünün başlatdığı “soyuq müharibə”də Bakıya rüsvayçı formada məğlub olub".
O qeyd edib ki, Vətən müharibəsində və antiterror tədbirlərində hərb meydanında itirilən mövqelərin ardınca istər BMT Təhlükəsizlik Şurası, istər digər platformalarda fiaskosundan sonra da çirkin əməllərindən əl çəkməyən Fransanın ölkəmizdəki səfirliyinin 2 əməkdaşı məhz bu çərçivədə fəaliyyətə, daha dəqiqi, diplomatik statusa uyğun olmayan və “Diplomatik Əlaqələr haqqında” 1961-ci il Vyana Konvensiyası ilə ziddiyyət təşkil edən konkret əməllərinə görə Azərbaycan tərəfindən “persona non grata” elan edilərək ölkədən qovulub: “Həmin diplomatlarla bağlı Azərbaycanın əlində Azərbaycan xalqının mənafelərini hədəfə alan təkzibolunmaz dəlillər var idi. Bəs Fransanın əlində hansı faktlar var? Əgər Azərbaycanın Fransadakı səfirliyinin əməkdaşlarının əməllərində Vyana Konvensiyası ilə ziddiyyət təşkil edən hər hansı pozuntu əlamətləri olsaydı, Paris bunu çoxdan car çəkərdi. Bu mənada, Fransanın cari həmləsi cavab xatirinə atılan ucuz addımdır və Parisin beynəlxalq hüquqla daban-dabana zidd olan davranışlarından doğan çoxsaylı problemlərin mövcud olduğu ikitərəfli münasibətləri daha da gərginləşdirir”. Beləliklə, Fransanın Azərbaycanda casus oyununun ifşası onun Şimali Afrikadan sonra Cənubi Qafqazda aldığı ən böyük zərbə kimi qiymətləndirilir. Emmanuel Makronun idarə etdiyi Fransa Azərbaycana qarşı haqsız mübarizəsində de-fakto məğlub vəziyyətinə düşüb. Diplomatlarla bağlı olaylar da bunu sübut edir. Azərbaycana qarşı siyasi-diplomatik cəbhədə uğursuzluğa düçar olan, Cənubi Qafqazda təsirini itirən Fransa diplomatiya pərdəsi altında hərbi-kəşfiyyat metodlarına əl ataraq məqsədlərinə nail olmağa çalışırdı. Amma artıq bu da mümkün deyil. Fransanın Cənubi Qafqazda geosiyasi dividendlər qazanmaq cəhdləri uğursuzluğa düçar olub. Bakıda Fransa kolonializmini ifşa edən beynəlxalq konfranslar da Fransanın qlobal siyasətdə yeri və roluna zərbədir. Paris ucuz qisasçılıq yolları ilə buna qarşı çıxmağa can atdıqca özünü daha miskin duruma salır.
Samirə SƏFƏROVA