Moskvaya qarşı sərt tənqidlər İrəvanda nə tez unuduldu?...
Aydın Hüseynov: “Mirzoyanın fikirləri qeyri-ciddi və reallıqla uzlaşmayan bir yanaşmadır”
Ermənistanın xarici işlər naziri Ararat Mirzoyan İrəvanın Moskvanın hərəkətlərini ən yüksək səviyyədə tənqid etməsi ilə bağlı iddialarla razılaşmır.
Mirzoyan İrəvanda İranın xarici işlər naziri Hüseyn Əmir Abdullahyanla birgə keçirdiyi mətbuat konfransında jurnalistlərin verdiyi suala cavab olaraq deyib: “Siyasətdə, xüsusən də Ermənistan-Rusiya münasibətlərində ifadələrə diqqətli olmaq və primitiv qiymətləndirmələrə əsaslanmamaq lazımdır. Əgər Ermənistanın Rusiyanı ən yüksək səviyyədə tənqid etdiyini deyirsinizsə, misallar gətirin. Belə bir bəyanat reallığa uyğun deyil”.
Mirzoyanın sözlərinə görə, İrəvanın dəfələrlə bəyan etdiyi KTMT-nin effektivliyi ilə bağlı problemlər olub və var: “Amma Arasiya İqtisadi İttifaqının işi ilə bağlı yerinə yetirilməyən gözlənti olmayıb. Biz hesab edirik ki, Aİİ Ermənistana münasibətdə effektiv fəaliyyət göstərməkdə davam edir”.
Əslində A.Mirzoyan yaxın tarixdə baş verənləri görməzdən gələrək ağ yalan danışır. Ən azından, son bir ildə erməni rəsmilərinin Rusiyanın ünvanına dediyi kəskin fikirləri, təhqirləri necə görməzdən gəlmək olar? Məsələn, Paşinyan KTMT-nin Ermənistanla öhdəliklərini yerinə yetirmədiyini deyib. Bu ilin sentyabrında Ermənistan parlamentinin sədri Alen Simonyan Rusiya XİN sözçüsü Mariya Zaxarovanın erməni rəsmilərinə yönəlik tənqidinə cavabında onu katibə adlandırıb: “Hansısa qurumdakı hansısa katibənin sözlərini şərh etmək fikrində deyiləm”. Üstəlik, erməni mediasında Zaxarova çox vaxt alçaldılaraq “maşa” kimi təqdim olunur. Digər tərəfdən, Zaxarova Paşinyanı verdiyi açıqlamalarından dolayı məsuliyyətli olmağa dəvət edib. Ermənistanın Maltada Ukrayna üzrə konfransda iştirakını İrəvanın nümayişkaranə anti-Rusiya jesti kimi qiymətləndirib.
Bütün bunlar tənqid deyil bəs nədir?
“Bütün bunlar Ermənistan rəsmilərinin necə riyakar olduğunu göstərir”
Məsələ ilə bağlı “Bakı-Xəbər”ə açıqlama verən millət vəkili Aydın Hüseynovun fikrincə, bütün bunlar Ermənistan rəsmilərinin necə riyakar olduğunu göstərir: “Nə dərəcədə riyakar olasan ki, bir belə baş verənləri görməzdən gələsən. Ermənistan rəsmiləri, mediası 2020-ci ildə baş verən 44 günlük müharibədən sonra dəfələrlə Rusiyanın ünvanına tənqidlər səsləndiriblər. Bütün tənqidlərin mahiyyəti də o olub ki, Rusiya gərək Azərbaycanla müharibə aparaydı. Ruslar gəlib ermənilərin yerinə vuruşaydılar. Xüsusən də 2022-ci ilin sentyabr döyüşlərindən sonra Ermənistandan Rusiyaya yönəlik tənqidlər daha da artıb. İstər bəyanatlar səviyyəsində, istərsə də rəsmi şəxslərin açıqlamalarda biz bunu görürük. Elə bu günlərdə baş nazir Nikol Paşinyan yerli telekanallara müsahibəsində Rusiyanın ünvanına bir sıra tənqidi fikirlər səsləndirdi. Konkret olaraq qeyd etdi ki, ondan əvvəl Rusiya prezidenti Putin Qarabağın Azərbaycanın tərkib hissəsi olduğunu bəyan edib. Özü də Rusiyanın bu mövqeyinə ikrahla yanaşdı. Ondan əvvəl Ermənistan parlamentinin sədri Alen Simonyan dəfələrlə Rusiyanın, bu ölkənin bəzi rəsmilərinin ünvanına olduqca sərt fikirlər səsləndirib. O zaman necə olur ki, xarici işlər naziri Mirzoyan bütün bunları görmür və ya eşitmir? Məsələnin paradoksal tərəfi odur ki, Ermənistan təmsil olunduğu KTMT-nin tətbirinə qatılmır, amma Avrasiya İqtisadi İttifaqının iclasında iştirak edir. Çünki iqtisadi baxımdan böyük ölçüdə Rusiyadan asılı olan bir ölkədir. Görünən odur ki, bu ölkənin konkret xarici siyasət kursu yoxdur. Bu baxımdan Mirzoyanın fikirləri qeyri-ciddi və reallıqla uzlaşmayan bir yanaşmadır”.
Vidadi ORDAHALLI
