İrəvan Bakı ilə vasitəçilərsiz danışıqlara meyllənir - ermənilər Qərbin ikiüzlülüyündən şübhələniblər...

Artıq Ermənistanda da qəbul etməyə başlayıblar  ki, Bakı və İrəvan arasında vasitəçilərsiz dialoq daha səmərəli nəticələrə gətirib çıxarmaq, konkret nəticələr vermək iqtidarındadır. Xüsusən də sülh müqaviləsi bu halda daha tez imzalana bilər.

Qeyd edilənlər fonunda Ermənistanda belə bir fikir də hakim olmağa başlayır ki, nəinki Rusiya, heç Qərb də sülh üçün onlara hansısa yardım etməyəcək. Bu səbəbdən ikitərəfli təmaslar daha məqbuldur. Bu xüsusda “armenianreport” portalı yazır: “Daha çoxunu demək lazımdır - artıq İrəvanla Bakı arasında heç bir vasitəçi olmadan müsbət ünsiyyət nümunəsi var. Hərbi əsirlərin mübadiləsi, hamımıza məlum olduğu kimi, Ermənistanla Azərbaycan arasında birbaşa dialoqdan sonra məhz belə baş verdi. Bu hər yerdə, o cümlədən Kremldə göründü və ona görə də indi Rusiya tərəfi mümkün qədər hər şeydə iştirak etdiyini sübut etməyə çalışacaq. O cümlədən, ölkələrimiz arasında sülhün bərqərar olmasında. Bundan əvvəl də, son üç ildə biz Rusiyanın yeganə vasitəçi olması ilə bağlı arqumentlər eşitmişik. Və Rusiya Federasiyasının özünə bu statusda yer etmək istəyini başa düşərək, Ermənistanın maraqlarını müdafiə etmək bizim üçün vacibdir. Bəli, Ermənistan-Rusiya münasibətlərində nəhayət, tostlar və qucaqlaşmalar erası sadə, başadüşülən praqmatizmlə əvəzlənməlidir. Əslində başqa ölkələrlə münasibətlərdə olduğu kimi. Amma Ermənistana qarşı təşkil olunmuş təxribatlar olmamalıdır. Baxmayaraq ki, onlar mövcuddur. Bu xüsusda daha bir təhdid Qərbdə göründü. Bunu hansısa məmur yox, NATO-nun Qafqaz və Mərkəzi Asiya üzrə xüsusi nümayəndəsi Havyer Kolomina edib. O, Gürcüstanın Birinci Kanalına müsahibəsində çox yersiz şeylər deyib. Məsələn, o, Ermənistanın çox aydın şəkildə xarici siyasətini dəyişmək və Moskvadan bir qədər uzaqlaşmaq qərarına gəldiyini bildirməyi məqsədəuyğun hesab edib. “Biz bunu təlqin edirik. Ermənilər öz qərarlarını verməkdə sərbəstdirlər, lakin onlar bunu seçiblər və məncə, onlar artıq bizə yaxınlaşmağa başlayıblar – bu, daha çox əməkdaşlıq tələb edir, daha çox siyasi dialoq tələb edir, NATO-nun daha çox iştirakını tələb edir. Biz tərəfdaşlarımızın, fikrimizcə, regionun sabitliyi üçün faydalı olan istənilən qərarını dəstəkləyirik. Bu bizim üçün çox vacibdir”, - deyə o bildirib. Əminik ki, bu, təsadüfi bir bəyanat deyildi. Kolomina bilirdi ki, Nikol Paşinyan Rusiyaya gedib və ölkəmizin baş nazirinin nəyə görə özünə haqq qazandırmalı olduğunu dəqiq deyib. Bəli, Kolomina bir ad çəkmədi. Amma onun bu addımı təxribat xarakteri daşıyır. O hər şeyi elə təqdim etdi ki, sanki Ermənistanın bütün rəhbərliyi artıq Aİİ və KTMT-dən çıxmaq qərarına gəlib və hər an Aİ və NATO-ya daxil olmağa tələsir. Bu, bildiyimiz kimi, mövcud deyil. Bu, ölkə rəhbərliyinin müxtəlif nümayəndələrinin artıq bir neçə dəfə bəyan etdiyi bir şeydir. Amma Qərbin Ukraynaya etdiklərini xatırlayırıq. O, ona fasiləsiz və güclü maliyyə və hərbi dəstəkdən tutmuş, yaxın gələcəkdə Aİ və NATO-ya zəmanətli üzvlüyə qədər hər şeyi vəd etdi. Amma sonda Qərb Ukraynanı tərk edərək, onu Rusiya ilə baş-başa buraxdı. Bu, artıq Ukraynada başa düşülüb. Nəticədə, Ukrayna Prezidenti Aparatının keçmiş müşaviri Aleksey Arestoviç rusiyalı müxalif jurnalist Yuliya Latıninaya müsahibəsində artıq bəyan edib ki, Ukrayna ilə Rusiya Federasiyası arasında sülh bağlandıqdan sonra Qərbə qarşı birgə iddia qaldırılmalıdır. Bu, Kiyevin mövqeyində yeni, radikal dönüş idi. “İndi biz Avdeevka, Çasov Yar və başqaları üçün yüzlərlə, on minlərlə bir-birimizi öldürəcəyik. Nə üçün? Bundan nə əldə edirik - həm Rusiya, həm də Ukrayna? Hər iki tərəfdən iki regional mərkəz üzərində minlərlə qurban verməklə nə əldə edirik? Tarixən nə əldə etmişik? Vaşinqton və Brüssel regional komitələrindən olan, ətrafımızda durub alqışlayan, bıçaqlı iki meymunun bir-birinin üstünə tullanışını seyr edən dayıları unutmalıyıq? Bu bizə niyə lazımdır? - Arestoviç deyib. Bəli, kimsə deyəcək ki, Arestoviç artıq Kiyevin mövqeyini təmsil etmir və bu, səhv olardı. O, Ukrayna Prezidenti Aparatının göstərişlərini yerinə yetirməyə davam edir, lakin yeni "azad rəssam" statusunda. Amma indi bizim Ukraynanın incəliklərinə vaxtımız yoxdur. Bunu öz məqsədlərinə çatmaq üçün bir yol kimi görüb onlara öyrəşənlərin təxribatlarına uymamaq bizim üçün vacibdir. Bizim məqsədimiz Ermənistanı qorumaq və onun milli maraqlarını müdafiə etməkdir. Ukrayna nümunəsindən istifadə edərək, hər şeyi vəd edən, sonra ölkəni və xalqı tərk edən “müttəfiqlərə” etibar etməyin təhlükəsini görürük”. Qeyd edək ki, “armenianreport” portalında yer alan bu fikirlər indi Ermənistan cəmiyyətində geniş yayılıb. Elə bu fonda İrəvanda da başa düşürlər ki, Bakı ilə birbaşa dialoq ən yaxşı yoldur. Bakının sülhdə maraqlı olduğunu isə Ermənistanda artıq ən yüksək səviyyədə etiraf edirlər. Ermənistan parlamentinin spikeri Alen Simonyan qeyd edir ki, Azərbaycan Cənubi Qafqazda sülhün bərqərar olmasına töhfə verən addımlar atır, İrəvanla Bakı arasında razılaşma mümkündür: “Sülh heç vaxt bu qədər yaxın olmayıb. Biz sülh prosesini irəli aparırıq. Azərbaycan tərəfinin də oxşar yanaşması var. Onlar bu istiqamətdə addımlar atır”. Spiker əlavə edib ki, Ermənistan və Azərbaycan arasında qarşıdan gələn sülh sazişinin əsas prinsipləri artıq razılaşdırılıb: “Bəzi suallar qalır, amma düşünürəm ki, biz bunu danışıqlar yolu ilə həll edə bilərik”.

Samirə SƏFƏROVA