Putinin Əliyevə təbrikində ən ilginc elementlər - ölkədən kənarda da qazanılan hörmət...
Mirkazım Seyidov: “Dövlətlərin münasibətlərinin müttəfiqlik səviyyəsinə gəlməsində İlham Əliyevin müstəsna xidmətləri olub”
Rusiya Federasiyası Prezidenti Vladimir Putin Azərbaycan Prezidenti İlham Əliyevə təbrik məktubu ünvanlayıb. Təbrik məktubunda qeyd olunur:
"Doğum gününüz münasibətilə səmimi təbriklərimi qəbul edin.
Siz haqlı olaraq həmvətənləriniz arasında və ölkə hüdudları xaricində böyük hörmətə maliksiniz. Sizin rəhbərliyinizlə dost Azərbaycan iqtisadi və sosial sahələrdə əhəmiyyətli uğurlara nail olur, regional və beynəlxalq məsələlərdə mühüm rol oynayır. Sizin ölkələrimiz arasında müttəfiqlik münasibətlərinin möhkəmlənməsinə töhfəniz misilsizdir.
Konstruktiv dialoqun və sıx birgə əməkdaşlığın davam etdirilməsinə şad olardım.
Sizə möhkəm cansağlığı, səadət və rifah arzulayıram. Fürsətdən istifadə edərək, ailənizə səmimi salamlarımı çatdırmağınızı xahiş edirəm".
Standart, diplomatik məzmunlu bir təbrik mətninə bənzəmir. Böyük bir ölkənin liderinin İlham Əliyev şəxsiyyətinə verdiyi səmimi qiymət həm də reallıqdan doğur. İlham Əliyevin ölkə hüdudlarından kənarda belə böyük hörmətə sahib olması hansı keyfiyyətlərə görədir? Təbrikdə diqqət çəkən bir məqam da var. Putin bizim Prezidentin müsbət işləri kimi ölkələrimiz arasındakı münasibətləri müttəfiqlik səviyyəsinə gətirib çıxarılmasını qeyd edir. Bəllidir ki, Rusiyanın Təhlükəsizlik Doktrinasında ölkələrin Moskva ilə hansı münasibətlərdə olduğu açıq qeyd olunur. İndiyə kimi biz strateji tərəfdaş, Ermənistan isə strateji müttəfiq kimi qiymətləndirilirdi.
Müstəqil siyasətçi Mirkazım Seyidov “Bakı-Xəbər”ə açıqlamasında bildirdi ki, eyni mahiyyətli bəyannamə Rusiya ilə Ermənistan arasında 2000-ci ildə imzalanıb: “Rusiya ənənəvi olaraq Ermənistanı müttəfiq adlandırsa da, Azərbaycanı vacib tərəfdaş olaraq qiymətləndirirdi və bunu regional siyasi kursda əsas element olaraq qəbul edirdi. 2022-ci ilin fevralın 22-də Moskvada Prezident İlham Əliyev və Vladimir Putin tərəfindən “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə” imzalanıb.
Rusiya Azərbaycanın böyük, qüdrətli qonşusudur, Rusiyada 2 milyona yaxın soydaşımız yaşayır, həmçinin bu iki ölkə arasında tarixən sıx əlaqələr, əməkdaşlıq münasibətləri olub. Rusiya Prezidenti özü də bəyanatında açıq şəkildə qeyd edir ki, ölkəsi ilə Azərbaycanı möhkəm dostluq və əməkdaşlıq ənənələri bağlayır, bu dövlətlərin münasibətlərinin müttəfiqlik səviyyəsinə gəlməsində İlham Əliyevin müstəsna xidmətləri olub. Bu cür fəaliyyət bütünlükdə Rusiya-Azərbaycan əlaqələri kompleksinin gələcək inkişafına təkan verəcək. Azərbaycan Prezidenti ilə imzalanan Birgə Bəyanat, həmçinin hökumətlərarası və qurumlararası sanballı sazişlər paketi məhz buna istiqamətlənib".
Politoloqun sözlərinə görə, bütün bunlar onu göstərir və onu deməyə əsas verir ki, bəzi kənar cəhdlərə baxmayaraq, Azərbaycan-Rusiya münasibətlərində artıq yenidən gərginlik, qarşıdurma yaratmaq mümkün olmayacaq, strateji müttəfiqlik münasibətləri yüksələn xətt üzrə inkişaf edəcək və bundan da qazanan hər iki dövlət, hər iki xalq olacaq: “Eyni zamanda, Rusiyanın danışıqlar, sülh prosesinə verdiyi və verəcəyi töhfələrlə öz müsbət həllini tapmış olacaq. Rusiya Prezidenti özü də bəyanatlarında və ünvanladığı təbrik məktubunda açıq şəkildə qeyd edir ki, ölkəsi ilə Azərbaycanı möhkəm dostluq və əməkdaşlıq ənənələri bağlayır, bu dövlətlərin münasibətləri qarşılıqlı faydalı tərəfdaşlıq xarakteri daşıyır, mehriban qonşuluq və bir-birinin marağına hörmət prinsiplərinə əsaslanır. Azərbaycan Prezidenti ilə imzalanan sazişlər məhz buna istiqamətlənib. İlham Əliyevin dünya səviyyəsində bir lider kimi qəbul edilməsi isə onun təcrübəsinə, zəngin biliyinə, cəsarətli addımlarına və verdiyi sözlərin hamısına əməl etməsinə əsaslanır. Bəli, bu gün qəbul edilir ki, İlham Əliyev dünyanın nüfuzlu ölkə başçıları ilə eyni sırada addımlayır. Fürsətdən istifadə edib, cənab Prezidenti doğum günü münasibətilə mən də ürəkdən təbrik edirəm”.
Məhəmmədəli QƏRİBLİ
