Paşinyandan yeni absurd istək - Azərbaycan ərazi bütövlüyünün tanınmasına nə izah verməlidir?!..
![Image](/uploads/posts/2023-12/pasinyan2.webp)
Mətin Məmmədli: “Ermənistan Azərbaycanın anklav kəndlərini qatarmalıdır”
Ermənistanın baş naziri Nikol Paşinyan yenə də öz ampluasındadır. Sülh müqaviləsinin imzalanmasından söz düşən kimi, məsuliyyəti öz üzərindən atmağa çalışır. Məlumdur ki, Ermənistan Azərbaycanın, Azərbaycan da Ermənistanın ərazi bütövlüyünü tanıyıb.
“Armenpress”in verdiyi məlumata görə, N.Paşinyan bildirib ki, Azərbaycan Ermənistanın ərazi bütövlüyünü tanıdığını bəyan etsə də, onun Ermənistanın ərazi bütövlüyü dedikdə nəyi nəzərdə tutduğunu aydınlaşdırmaq lazımdır. “Bu məsələlərin aydınlaşdırılması qarşıdan gələn danışıqlar prosesində əsas problemdir və biz onu həll etməyə çalışmalıyıq”, - deyə Nikol Paşinyan bildirib.
Paşinyan deyib ki, Azərbaycan onlara həm də izah verməlidir, Ermənistanın ərazi bütövlüyü deyəndə nəyi nəzərdə tutur? "Azərbaycan Ermənistanın ərazi bütövlüyü deyiləndə nəyi nəzərdə tutur məsələsinə izah verməlidir" nə deməkdir ?
Siyasi ekspertlərin fikrincə, Azərbaycanın nəyi nəzərdə tutduğunu Paşinyan özü də yaxşı bilir, sadəcə oyun oynayır. Azərbaycan onu nəzərdə tutur ki, Qarabağ sənin deyil, Ermənistan işğalında olan anklav kəndlərimizi, torpaqlarımızı qaytarmalıdır. O nəzərdə tutulur ki, Naxçıvanın Kərki kəndini qaytarıb verməlisən. Məsələ bu qədər aydın görsəndiyi halda Azərbaycan buna niyə izah verməlidir ki?
“Bizim mövqeyimiz aydındır və əlavə izaha ehtiyac yoxdur”
Məsələyə şərh verən Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru, dosent Mətin Məmmədli “Bakı-Xəbər”ə şərhində “Əlbəttə, Paşinyan yenə də ənənəvi ziddiyyətli açıqlamalarını davam etdirir. Azərbaycanın mövqeyi aydındır. Azərbaycan 1992-ci ildə hansı sərhədlərlə BMT-yə daxil olub o sərhədləri nəzərdə tutur, o cümlədən də Ermənistan hansı sərhədllərlə BMT-yə qəbul edilib o sərhədləri nəzərdə tutur. Azərbaycan və Ermənistan BMT-yə Sovet Azərbaycanın və Sovet Ermənistanının sərhədləri çərçivəsində qəbul edilib. Bildiyiniz kimi, vaxtilə Ermənistan Qazaxın 7 kəndini və Naxçıvanın Kərki kəndini işğal edib. Ermənistan Azərbaycanın anklav kəndlərini qatarmalıdır”-deyə bildirdi.
M.Məmmədli qeyd etdi ki, bu anklavlar Azərbaycanın de-yure beynəlxalq səviyyədə tanınan ərazisidir. “Ermənistan hökuməti hər hansı bir əlavə şərt irəli sürmədən həmin əraziləri geri qaytarmalıdır. Bizim mövqeyimiz aydındır və əlavə izaha ehtiyac yoxdur. Fikrimcə, Nikol Paşinyan növbəti dəfə belə ziddiyyətli açıqlama verməklə danışıqlar prosesinə mənfi təsir göstərir. O bu cür açıqlamaları ilə sülh prosesinə mane olur. Biz sülh müqaviləsi bağlamaq istəyiriksə, ilk növbədə tərəflər konstruktiv, beynəlxalq hüquq nornalarına uyğun olaraq mövqe nümayiş etdirməlidirlər. Necə ki, Azərbaycan bu mövqeni nümayiş etdirir, biz eyni mövqeyini də Ermənistandan gözləyirik”-deyə M.Məmmədli qeyd etdi.
İradə SARIYEVA