Putin namizədliyini niyə özü irəli sürdü - partiyasına inanmadı?..
Elşən Həsənov: “Böyük ehtimalla, Putin seçkilərə partiyanın namizədi kimi qatılacaq”
“Ədalətli Rusiya - Həqiqət naminə” partiyasının sədri Sergey Mironov bildirib ki, Rusiya prezidenti Vladimir Putin prezident seçkilərində heç bir partiyadan namizədliyini irəli sürmür, özünün namizədliyi ilə imza toplayacaq:
“Bu gün təşkilat komitəsinin iclasında onun heç bir partiyadan - nə Vahid Rusiyadan, nə də bizim partiyadan gəlmədiyi açıqlanacaq. O, imzaları toplayacaq”.
Mövcud qanunvericiliyə görə, özünü irəli sürən namizədlər seçkilərdə iştirak etmək üçün 300 min imza toplamalıdır. Dövlət Dumasında fraksiyaları olan beş partiyanın namizədləri bu prosedurdan azaddırlar. Millət vəkili olmayan partiyaların namizədləri Mərkəzi Seçki Komissiyasına 100 min imza təqdim etməlidirlər.
Vladimir Putin dekabrın 8-də beşinci dönəm prezidentliyə namizədliyini irəli sürmək planlarını açıqlayıb. Dekabrın 16-da Moskva Zaryadye konsert zalında onun namizədliyi ilə bağlı seçicilər qrupunun toplantısı keçirilib. Prezident seçkilərində səsvermə üç gün ərzində, 2024-cü il martın 15-dən 17-dək keçiriləcək.
Putin niyə özü tərəfindən irəli sürülür? Partiyasına inanmır, yoxsa təşəbbüs qrupu yarada bilmir?
Siyasi şərhçi Elşən Həsənov “Bakı-Xəbər”ə açıqlamasında bildirdi ki, burada ziddiyyətli məqamlar var: “Məndə olan məlumata görə, vəziyyət tam başqa cürdür. Bu gün Rusiyanın hakim Vahid Rusiya Partiyasının XXI qurultayı keçirilib. Qurultayda prezident Vladimir Putin də iştirak edib.
Vahid Rusiya Partiyasının qurultayı prezident seçkilərində Putinin namizədliyini yekdilliklə dəstəkləyib. Qurultayda çıxış edən Vahid Rusiya Partiyasının sədri Dmitri Medevdev Putinin Rusiya Federasiyasında keçirilən prezident seçkilərində qalib gəlməsi üçün hər şeyi edəcəyini söyləyib.
Rusiya xəbər agentlikləri isə məlumat yaymışdı ki, Vladimir Putin yenidən geniş dəstək bazası olan müstəqil namizəd kimi prezidentliyə namizəd olacaq, lakin partiya siyahısına görə deyil. Bildirilirdi ki, 700-dən çox siyasətçi, idman və mədəniyyət xadimindən ibarət təşəbbüs qrupu şənbə günü Moskvada görüşüb və Putinin müstəqil namizəd kimi irəli sürülməsini yekdilliklə dəstəkləyib. İyirmi ildən artıqdır prezident və ya baş nazir kimi hakimiyyətdə olan Putin qalib gələcəyi gözlənilən seçkilərdə növbəti mart ayında daha altı il müddətinə namizəd olacağını açıqladı.
Gözlənilirdi ki, Putin hakim "Vahid Rusiya" partiyasının namizədi kimi namizədliyini irəli sürəcək, ancaq ortada fərqli mənzərə var. Hər halda, Rusiyanın prezident administrasiyası bu məsələyə aydınlıq gətirmək üçün yekun açıqlama verəcək. Böyük ehtimalla, Putin seçkilərə partiyanın namizədi kimi qatılacaq”.
Məhəmmədəli QƏRİBLİ
