Ermənistanın "Moskvadan qaçış" kursunu hətta Putin də malaladı... Niyə?
![Image](/uploads/posts/2023-12/1702650645_putin-pasik.webp)
Elşən Mustafayev: “Nikol müəyyən dönəmdə Rusiya ilə balans saxlamağa çalışsa da, görünür, Qərbdəki dostları onu radikal kurs seçməyə vadar ediblər”
Rusiya Prezidenti Vladimir Putin deyib ki, MDB, Avrasiya İqtisadi Birliyi və KTMT-yə üzvlüyünü hansısa yolla ləğv etmək Ermənistanın marağındadır:
“Bütün hallarda seçim dövlətindir. Ermənistan baş nazirinin (Nikol Paşinyan) ümumi tədbirlərdə iştirak etməməsinə gəlincə, bunun ən azı Ermənistandakı proseslərlə bağlı olduğunu, inteqrasiya birliklərində işi davam etdirmək istəyi və ya olmaması ilə əlaqəli olmadığını bilirik. Görək, vəziyyət necə inkişaf edəcək”.
Göründüyü kimi, Putin deyir ki, Ermənistanda ölkənin KTMT və MDB-dən çıxması müzakirə olunmur. Rəhbərliyin də həmin tədbirlərə qatılmaması Ermənistandakı daxili vəziyyətlə bağlıdır. Ancaq görünən budur ki, Ermənistan buna can atır. Bəlkə Putin doğrudan da real vəziyyət barədə tam səmimi danışır. Ola bilərmi ki, Paşinyan doğrudan da Qərblə “oynayır”, Rusiyaya qarşı sərt ritorikanı onlardan pul qoparmaq üçün sərgiləyir? Belə deyilsə, onda niyə əlində kifayət qədər informasiyası olan Putin Paşinyanın addımlarını malalamaq yolunu tutur?
Polotoloq Elşən Mustafayev “Bakı-Xəbər”ə açıqlamasında bildirdi ki, Ermənistan hakimiyyəti yönünü konkret müəyyənləşdirib: “Onlar KTMT-dən çıxmağın təhlükəli olduğunu bilir. Ancaq xalqa belə çatdırırlar ki, KTMT-də qalma risqləri bununla eynidir. Ermənistan çox cəhd etdi ki, KTMT – ni Azərbaycanla üz – üzə qoysun. Ancaq alınmadı. Artıq Ermənistan bir sıra körpüləri yandırıb. Qərblə əməkdaşlıq istiqamətində xeyli yol qət edib. Müşahidəçi adı ilə ərazisinə qoşun yığıb. KTMT tədbirinə getməyib, ancaq ABŞ – la birgə tədbir keçirib. ABŞ səfirliyinin əməkdaşlarının sayını artırıb. İndi isə başlıca istiqaməti Rusiya hərbi bazasının ölkədən çıxarılmasına yönəldib. Qarabağdakı tam məğlubiyyətdən sonra Ermənistanın Rusiyanın nəzarəti altında olan qurumlardan narazı qaldığı bəllidir. Əslində bu narazılıq Rusiyaya yönəldilib. Putin bunu hamıdan yaxşı bilir. Onda dəqiq məlumat var ki, Ermənistan anti-Rusiya yoluna çıxıb və bu istiqamətdə xeyli addımlayıb. Onun könlünü almaq üçün belə ifadələr işlədir. Ermənistanı ümidləndirmək istəyir ki, prosesi bir qədər yavaşıtsın. Ancaq bilir ki, Ermənistan bu yolu tutsa belə, onun üçün çətin olacaq. Rusiya bu cığallığı elə-belə həzm edə bilməz. Bütün mümkün təzyiq vasitələrindən istifadə edəcək. Ola bilər ki, Ermənistanda hakimiyyət dəyişikliyinə nail olunsun. Bu baş verərsə, yeni münasibətlər sistemi formalaşa bilər. Rusiya – Ermənistan gərginliyi bizə sərf edir. Çünki Rusiyanın təzyiqləri Ermənistanı konstruktiv olmağa vadar edir. Nikol Paşinyan növbəti dəfə Kollektiv Təhlükəsizlik Müqaviləsi Təşkilatının sammitinə qatılmaqdan imtina etməklə, açıq mövqe ortaya qoymuş olub. Nikol müəyyən dönəmdə Rusiya ilə balans saxlamağa çalışsa da, görünür, Qərbdəki dostları onu radikal kurs seçməyə vadar ediblər.
Paşinyanın anti-Rusiya siyasəti Ermənistanın növbəti Ukraynaya çevrilməsi ehtimallarını artırır. Düşünürəm ki, Ermənistan bu xətti davam etdirsə, Ukraynada baş verənlər təkrarlanacaq. Bəli, Ermənistana NATO gəlir, bunu birbaşa demək lazımdır. Heç bir sülhməramlı, müşahidə missiyası-filan yox, birbaşa NATO gəlir. Düşünürəm ki, yaxın vaxtlarda Ermənistan üçün vəziyyət daha da pisləşəcək”.
Məhəmmədəli QƏRİBLİ