Ermənistan Qafqazın texnoloji mərkəzidir? - Bəs sənaye inqilabında Azərbaycanın rolu?..
İlkin Əsədli: “Bununla da Qərb ölkələri Ermənistana süni şəkildə reputasiya qazandırır”
Amerikanın “Forbes” jurnalı yazır ki, Ermənistan qlobal oyunçuların iştirakı və dinamik startap ekosistemi ilə regionun texnoloji mərkəzinə çevrilib:
“Müxtəlif indekslər Ermənistanı Cənubi Qafqaz regionunda inkişaf etməkdə olan texnoloji mərkəz kimi göstərir, onun Sovet İttifaqının aparıcı texnologiya mərkəzlərindən biri kimi rolunun mirası – SSRİ-də ilk ümumi təyinatlı kompüterlər orada 1960-cı illərin əvvəllərində hazırlanmışdır .
“Forbes”in məlumatına görə, Ermənistanda innovasiya sektoru vençur fondları və erməni əsilli sahibkarların dəstəyi sayəsində daha müstəqil olur.
“Prelaunach” platformasının baş direktoru Narek Vardanyan jurnala deyib: “Əvvəllər erməni şirkətləri ilkin mərhələdə maliyyə almaq üçün Silikon Vadisinə getməli idilər, indi isə biz erməni fondlarının köməyi ilə 2-3 milyon dollar toplaya bilərik”. Məqalənin müəllifi Kreyq Smit İrəvanın 90-cı illərin iqtisadi böhranının nəticələrini aradan qaldırmaq hekayəsindən danışıb və ölkənin texnoloji potensialının bərpasında diasporun rolunu vurğulayıb.
Məqalədə qeyd edilir ki, ermənilər “şəbəkə milləti” mexanizmindən istifadə edərək qarşılıqlı əlaqədə olur və innovasiyaları güclü dəstəkləyirlər. “Ermənistanın iqtisadi inkişafının gələcəyi yüksək texnoloji, yüksək gəlirli məhsullardadır”, - deyə ölkənin yüksək texnologiya sənayesi naziri Robert Xaçatryan jurnala bildirib və bunu ölkənin coğrafi şəraiti ilə əlaqədar iqtisadiyyatın digər sektorlarındakı problemləri ilə izah edib.
Maraqlıdır, niyə “Forbes” Ermənistanı regionun İKT sahəsindəki lideri kimi təqdim edir? Bəs Azərbaycan? Davos Forumunun 4-cü sənaye inqlabının regional ofisi Bakıda açılırsa, Azərbaycan işğaldan azad edilən ərazilərdə “Ağlıllı şəhər” layihələri icra edirsə, “Asan Xidmət” modeli ilə bizdən nə isə öyrənmək istəyən ölkələr varsa, niyə dünyaca məşhur dərgi məhz Ermənistanı tərifləyir?
İKT üzrə ekspert İlkin Əsədli “Bakı -Xəbər”ə açıqlamasında bildirdi ki, “Forbes”in yazdıqları reallığı əks etdirmir: “Sanki Cənubi Koreya, Sinqapur, Malayziya kimi inkişaf edən ölkələrdən bəhs olunur. Doğrudan da gülməlidir. Bizdən yaxşı Ermənistana bələd olan yoxdur. Belə inkişaf varsa, niyə ölkədə katastrofik demoqrafiya vəziyyəti var? Ermənilər sürətlə ölkəni tərk edirsə, deməli, deyilən qətiyyən doğru deyil. Ermənistan SSRİ vaxtı kompüter istehsal edən ölkə kimi deyil, konyakı, ayaqqabısı ilə məşhur olub.
İkinci Qarabağ savaşı zamanı Ermənistan prezidenti Armen Sarkisyan bir müsahibəsində bildirmişdi ki, biz elə bilirdik informasiya texnologiyaları sahəsində Azərbaycandan daha irəlidəyik.
Rusiya-Ukrayna müharibəsi başlayandan sonra Gürcüstan və Ermənistana ümumilikdə 20 mindən çox İKT mütəxəssisinin gəldiyi haqqında müxtəlif mediya mənbələrində məlumatlar yayılıb. Ermənistan İKT rəsmilərinin çıxışlarından görmək olar ki, bu ölkəyə bütöv İKT şirkətlər miqrasiya edir. İkinci Qarabağ savaşı zamanı Ermənistan prezidenti Armen Sarkisyan bir müsahibəsində bildirmişdi ki, biz elə bilirdik informasiya texnologiyaları sahəsində Azərbaycandan daha irəlidəyik : “Amma sonra bildim ki, məni bu sahədə də aldadıblar”. Yəni Azərbaycanın İKT sahəsində istifadə etdiyi texnoloji imkanlar, ermənilərə bu istiqamətdə güc göstərməsi Ermənistan prezidentini dilə gətirdi. Hazırda sual olunur ki, İKT sektorunda olan Avropanın inkişaf etmiş şirkətləri nəyə görə indi öz ofislərini məhz Ermənistanda açır? Xüsusən Rusiya–Ukrayna müharibəsi nəticəsində Rusiyaya sanksiyalar tətbiq olunduqdan sonra bir çox xarici şirkətlər Rusiyadakı ofislərini bağladılar. Hazırda isə həmin şirkətlərin bəziləri Ermənistanda ofis açırlar. Bu, Avropa ölkələrinin planlanmış şəkildə aparadığı siyasətdir. Ermənistana olan mütəxəssis axını planlanmış bir aksiyadır. Bununla da Qərb ölkələri Ermənistana süni şəkildə reputasiya qazandırır. Real vəziyyət bundan ibarətdir”.
Məhəmmədəli QƏRİBLİ
