Elektrik avtomobili olan hər bir azərbaycanlı bu təhlükəni nəzərə almalıdır...
Aslan Əsədov: “Hər hansı bir nəqliyyat vasitəsinin batareyasında problem varsa, o zaman partlama ola bilər”
Hazırda dünyanın əksər ölkəsində olduğu kimi, Azərbaycanda da elektriklə işləyən nəqliyyat vasitələrinə maraq getdikcə artır. Bu səbəbdən də ölkəmizdə elektromobillərdən istifadənin genişləndirilməsi istiqamətində mühüm addımlar atılır.
Prezident İlham Əliyevin müvafiq sərəncamı ilə təsdiq edilmiş “Azərbaycan 2030: sosial-iqtisadi inkişafa dair Milli Prioritetlər”də də ekoloji cəhətdən təmiz nəqliyyat vasitələrinin təşviqini gücləndirmək üçün bir sıra tədbirlər nəzərdə tutulur. Bununla yanaşı, 2024-cü il martın 7-də isə dövlət başçısı “Elektrik mühərrikli nəqliyyat vasitələrindən istifadənin təşviq edilməsi haqqında” sərəncam imzalayıb. Sözügedən sənədə əsasən, hökumətə bir ay ərzində elektrik şarj stansiyalarının yerləşdirilməsi və quraşdırılması yerlərini müəyyən etmək tapşırılıb.
Qeyd etdiyimiz kimi, bu nəqliyyat növlərinin sayı ölkəmizdə və qonşu ölkələrdə günü-gündən artır. Bu maşının müsbət tərəfi ilə yanaşı, mənfə cəhəti də var. Belə ki, İngiltərədə bir ailə lüks elektrik avtomobilini evlərinin qarşısında şarj edərkən maşın partlayıb. Skott və Corcina Baylis cütlüyünün EQA model avtomobili evin qarşısında əvvəlcə yanmağa başlayıb, daha sonra isə partlayıb.
Ölkəmizdə bu hal qeydə alınmayıb. Ancaq xarici ölkələrdə tez-tez elektrik maşınlarının enerji yığarkən partlaması ilə bağlı məlumatlara rast gəlirik. Maraqlıdır, bu nəqliyyat növlərinin partlamasına səbəb nədir?
“Elektrik avtomobillərinin enerji yığarkən partlaması halı xaricdə baş verib, ancaq bu o demək deyil ki, bizdə olmayacaq”
Nəqliyyat eksperti Aslan Əsədov "Bakı-Xəbər"ə şərhində bildirdi ki, avtomobil elektrik enerjisi yığan zaman batareya dolma rejimində olanda nəsə problem yaranırsa bu, batareyanın özündən asılıdır: "Hər hansı bir nəqliyyat vasitəsinin batareyasında problem varsa o zaman partlama ola bilər. Partlama bir çox hallarda avtomobilin yanmasına səbəb olur. Bu kimi hadisələrdən qorunmaq üçün nəqliyyat vasitəsi sığortalanmalıdır".
Həmsöhbətimiz bildirdi ki, avtomobil akkumulyatorunun balonları, onun daxili quruluşunun düzgün seçilməməsi və ya keyfiyyətsiz materiallardan istifadə olunmasına diqqət edilməlidir. Elektrik avtomobillərinin enerji yığarkən partlaması halı xaricdə baş verib. Ancaq bu o demək deyil ki, bizdə olmayacaq: "Çünki ölkəyə gətirilən avtomobillər hər hansı bir təcrübədən keçmir. Bu səbəbdən də insanlar adıçəkilən nəqliyyat vasitələrindən istifadə edərkən ehtiyatlı olmalıdır".
Günel CƏLİLOVA
