Astara Pedaqoji Kollecində COP29-la əlaqədar maarifləndirici tədbir keçirildi - FOTO
Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi haqqında Azərbaycan Respublikası Prezidenti İlham Əliyevin sərəncamı hər bir ölkə vətəndaşının ürəyincə oldu. Sərəncamın icrası ilə bağlı Astara Pedaqoji Kollecində də vaxtaşırı tədbirlər görülür. Kollecin “Yaşıl dünya naminə həmrəylik ili” və COP29-la əlaqədar növbəti tədbiri maarifləndirici xarakter daşıyırdı.
Vətən müharibəsi şəhidlərinin əziz xatirəsi bir dəqiqəlik sükutla anıldı, sonra söz çıxışçılara verildi. Astara Pedaqoji Kollecinin direktoru, filologiya elmlər doktoru Kamran Kazımov, Astara Rayon YAP təşkilatının sədri Həbib Cəfərov, Astara Rayon İcra Hakimiyyəti Başçısının Humanitar şöbə üzrə müavini Firəngiz Sadıxova, Astara Pedaqoji Kollecinin İctimai Şura sədri, istefada olan polkovnik-leytenant Rafiq Əliyev, 1 saylı Regional Ekologiya və Təbii Sərvətlər İdarəsinin əməkdaşı, yazıçı- ekoloq Bəxtiyar Hüseynov, kollecin turizm müəllimi Məryəm Babayeva, Ekologiya müəllimi Nicat İskəndərli çıxış etdilər.
Natiqlər 2024-cü ilin “Yaşıl dünya naminə həmrəylik ili” elan edilməsindən, ekoloji problemlərin həlli və ətraf mühitin qorunub saxlanmasının vacibliyindən, gənclərdə ekoloji şüurun inkişaf etdirilməsindən, ətraf mühitə qarşı həssas münasibətin formalaşdırılmasından, təbii, mədəni dəyərlərə hörmətlə yanaşılması ilə bağlı maarifləndirmə işlərinin aparılmasından, Azərbaycanın COP29-un ev sahibi olaraq iqlim yönümlü, bərabər və dayanıqlı gələcəyə nail olunması istiqamətində aparıcı rolundan, ölkəmiz tərəfindən iqlim dəyişikliyinin təsirləri ilə milli, regional və qlobal səviyyələrdə mübarizə istiqamətində göstərilən səylərdən, BMT təsisatları ilə iqlim dəyişikliyi sahəsində əməkdaşlığın vacibliyindən, iqtisadi fəaliyyətlərin inkişafında ətraf mühit amillərinin təşviqi sahəsində görülən işlərdən ətraflı danışdılar. Həmçinin Astara Pedaqoji Kollektivinin il ərzində “Yaşıl dünya naminə həmrəylik ili” və COP29-la bağlı rayonda təşkil olunan müxtəlif tədbirlərdə, eləcə rayon və kollecin ərazisində keçirilən ağacəkmə kompaniyasında fəal iştirakı xüsusilə qeyd olundu.
Sonra 1 saylı Regional Ekologiya və Təbii Sərvətlər İdarəsinin əməkdaşı, yazıçı - ekoloq Bəxtiyar Hüseynov “Yaşil dünya naminə” kitabını kollecin direktoru Kamran Kazımova və biologiya müəllimi Aygün Səfərovaya hədiyyə etdi.
Tədbir kollecin ərazisində ağacəkmə aksiyası ilə başa çatdı.
Zəfər ORUCOĞLU,
Azərbaycan Jurnalistlər Birliyinin üzvü
