Rusiya ilə İran “Müdafiə ittifaqı” yaradır...
Təbriz Musayev: “Ukrayna ilə müharibədən sonra Kreml bu kimi məsələlərə xüsusi önəm verir”
Yaxın gələcəkdə Rusiya və İran arasında yenilənmiş strateji tərəfdaşlıq sazişi imzalanacaq və bu sazişdə müdafiə məsələlərinə mühüm diqqət yetiriləcək.
Bu haqda Rusiyanın xarici işlər naziri Serqey Lavrov Belarusun paytaxtı Minskdə Avrasiya Təhlükəsizliyi üzrə Beynəlxalq Konfransda çıxışı zamanı bildirib.
Rusiyanın XİN rəhbəri sözügedən sazişin iki ölkə arasında əməkdaşlığı daha da dərinləşdirəcəyini deyib: “Rusiya və İran arasında hərtərəfli strateji tərəfdaşlıq haqqında gələcək saziş Rusiya-İran münasibətlərinin möhkəmlənməsi üçün ciddi amil olacaq. Saziş yaxın gələcəkdə imzalanması üçün hazırlanır. Sazişdə tərəflərin regional və qlobal səviyyədə sülh və təhlükəsizlik maraqlarından irəli gələrək müdafiə sahəsində daha sıx əməkdaşlıq və qarşılıqlı fəaliyyət istəyi təsdiqlənəcək”.
Belə görsənir ki, Rusiya-İran hərtərəfli strateji tərəfdaşlıq sazişi müdafiə sahəsində bir saziş rolunu oynayacaq. Çünki Lavrov bildirdi ki, bunu daha çox müdafiə sahəsindəki əməkdaşlığa yönəldiləcəyik. Belə çıxır ki, bu, əslində qarşılıqlı müdafiə sazişi rolunu oynayacaq.
“Şimali Koreya ilə imzalanan sazişin bənzərini Rusiya İranla da imzalamaq üzərində işləyir”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, Rusiyanın istəyi məhz müdafiə sazişinə önəm verməkdir: “O baxımdan bu, hardasa gözlənilən idi. Məsələ ondadır ki, Ukrayna ilə müharibədən və Qərbin sərt sanksiyalarından sonra Kreml bu kimi məsələlərə xüsusi önəm verir. Bunun ən bariz nümunəsi Rusiya prezidenti Vladimir Putinin bu ilin yayında Şimali Koreyaya rəsmi səfəri zamanı özünü göstərdi. Belə ki, Putinin Pxenyana səfəri zamanı Rusiya və KXDR arasında yeni Hərtərəfli Strateji Tərəfdaşlıq Sazişi imzalanıb. Sənədə əsasən, tərəflərdən biri hər hansı dövlət və ya bir neçə dövlət tərəfindən silahlı hücuma məruz qalarsa və müharibə vəziyyətində olarsa, qarşı tərəf BMT Nizamnaməsinin 51-ci maddəsinə, Rusiya Federasiyası və KXDR qanunvericiliyinə uyğun olaraq sərəncamında olan bütün vasitələrlə dərhal hərbi və digər yardım göstərəcək. Bundan əlavə, səkkizinci maddəyə əsasən, tərəflər müharibənin qarşısının alınması, regional və beynəlxalq sülh və təhlükəsizliyin təmin edilməsi maraqları naminə müdafiə qabiliyyətinin gücləndirilməsi məqsədilə birgə fəaliyyət mexanizmləri yaradırlar. Fikrimcə, Rusiya İranla da bənzər saziş imzalamaq üzərində işləyir. Lavrov açıqlamasında dolayı da olsa buna işarə edib. Nəzərə almaq lazımdır ki, İranın da buna ehtiyacı var. İsrailin bu günlərdə İrana endirdiyi hava zərbələri göstərdi ki, molla rejimi bu hücumları dəf etməkdə necə acizdir. Bu baxımdan, görünür, İran Rusiya ilə müdafiə sahəsində əməkdaşlığı genişləndirməklə özünü yaxınlaşan təhlükədən qorumağa çalışır. Fikrimcə, ABŞ-da keçiriləcək prezident seçkilərində Tramp qalib gələrsə, ABŞ-da İrana hücum və mövcud rejimin devrilməsi ehtimalı böyükdür. Bunu ən çox istəyən İsraildir. Bu səbəbdən, xüsusən Benyamin Netanyahu maraqlıdır ki, Tramp prezident seçilsin”.
Vidadi ORDAHALLI
