Xətai rayonunu 1.2 milyon manata sökən "RAMCO" QSC nə şirkətdir?
"RAMCO" QSC Kənd Təsərrüfatı Nazirliyinin tenderlərinin favoritidir
Bakıda daha çox söküntü işlərı ilə məşğul olan şirkət kimi tanınan "RAMCO" QSC heç də yalnız söküntü işləri ilə məşğul olmurmuş. Əslində QSC 24 il əvvəl tikinti şirkəti kimi fəaliyyətə başlayıb. "RAMCO" QSC 2020-ci idə koronavirusla mübarizə fonduna ianə köçürən şirkətlər sırasında da yer alıb. QSC fonda nə az, nə çox, 50 min manat pul köçürüb.
Bakının Xətai rayonu, Babək prospekti, Xəqani Rüstəmov, Süleyman Vəzirov və Yavər Əliyev küçələrinin ətrafındakı yaşayış və qeyri-yaşayış sahələrinin sökülməsinə 1 milyon 296 min 436,17 manat xərclənəcək.
Dövlət satınalmalarının vahid internet portalının məlumatına görə, 2025-ci ilin sonunadək başa çatdırılması planlaşdırılan tikinti işləri Xətai Rayon İcra Hakimiyyətinin elan etdiyi tenderin qalibi olan "RAMCO" QSC tərəfindən aparılacaq.
Müqavilənin predmeti olan işin dəyəri smeta qiymətindən 438 min manat (25%) az göstərilib. Lakin bu cür qaranlıq hesablara malik şirkətin udduğu tenderlər bununla yekunlaşmır.
Ötən ilin iyul ayında Ağdam rayonu, Sarıcalı yaşayış məntəqəsinin tikintisi məqsədilə I faza üzrə şaquli planlaşdırma və söküntü işlərinin satın alınmasını nəzərdə tutan tenderdə"RAMCO" QSC qalib seçilib. Tenderin nəticənə görə qalib şirkətə 680 612 manat ödənilib.
Bununla yanaşı, "RAMCO" QSC əvvəlki illərdə aşağıdakı tenderlərin qalibi olub.
29.10.2019-cu il tarixdə Maliyyə Nazirliyinin inzibati binasında cari təmir işlərinin aparılmasının satın alınması üzrə tender keçirilib. Tenderdə "RAMCO" QSC qalib elan edilib və tenderin nəticələrinə görə "RAMCO" QSC-nin hesabına 273 559 manat vəsait köçürülüb.
13.11.2020-ci il tarixində Kənd Təsərrüfatı Nazirliyi tərəfindən "Əkinçilik Elmi-Tədqiqat İnstitutunun Cəlilabad Bölgə Təcrübə Stansiyasında hasarın çəkilişi və yaşıllıq işlərinin aparılması" işinin satın alınması üzrə tender keçirilib. "RAMCO" QSC qalib elan edilib və tenderin nəticələrinə görə şirkətin hesabına 189 769 manat vəsait köçrülüb.
18.05.2021- ci il tarixdə Kənd Təsərrüfatı Nazirliyi tərəfindən "Əkinçilik ETİ-nin Tərtər Bölgə Təcrübə Stansiyasının xarici elektrik təchizatı" işinin satın alınması üzrə tender keçirilib. "RAMCO" QSC qalib elan edilib və tenderin nəticələrinə görə şirkətin hesabına 24 399 manat vəsait köçürülüb.
Kənd Təsərrüfatı Nazirliyi tərəfindən "Əkinçilik ETİ-nin Cəlilabad Bölgə Təcrübə Stansiyasının xarici elektrik təchizatı" işinin satın alınması üzrə tender keçirilib. Tenderdə "RAMCO" QSC qalib elan edilib və tenderin nəticələrinə görə şirkətin hesabına 27 699 manat vəsait köçürülüb.
30.06.2021-ci il tarixində Kənd Təsərrüfatı Nazirliyi tərəfindən "Əkinçilik ETİ-nin Tərtər Bölgə Təcrübə Stansiyasında təmir və abadlıq işlərinin aparılması" işinin satın alınması üzrə tender keçrilib. Tenderdə "RAMCO" QSC qalib elan edilib və tenderin nəticələrinə görə şirkətin hesabına 179 789 manat vəsait köçürülüb.
23.08.2021-ci il tarixdə Kənd Təsərrüfatı Nazirliyi tərəfindən "Salyan rayonu Pambıqkənd kəndinin ərazisində Pambıq emalı sexinə giriş-çıxış yolunun çəkilməsi" işinin satın alınması üzrə tender keçirilib. Tenderdə "RAMCO" QSC qalib elan edilib və tenderin nəticələrinə görə şirkətin hesabına 284 799 manat vəsait köçürülüb.
22.09.2021-ci il tarixdə Kənd Təsərrüfatı Nazirliyi tərəfindən "Əkinçilik ETİ-nin Tərtər Bölgə Təcrübə Stansiyasında sahədaxili kommunikasiya xətlərinin çəkilməsi və əlavə tikinti-quraşdırma işlərinin görülməsi" işinin satın alınması üzrə tender keçirilib. Tenderdə "RAMCO" QSC qalib elan edilib və tenderin nəticələrinə görə şirkətin hesabına 225 917 manat vəsait köçürülüb.
10.11.2021-ci il tarixdə Kənd Təsərrüfatı Nazirliyi tərəfindən "Salyan rayonu Pambıqkənd kəndinin ərazisində yerləşən Pambıq emalı sexinin xarici elektrik təchizatı" işinin satın alınması üzrə tender keçirilib. Tenderdə "RAMCO" QSC qalib elan edilib və tenderin nəticələrinə görə şirkətin hesabına 39 994 manat vəsait köçürülüb.
Onu da qeyd edək ki, bu ilin iyul ayında "RAMCO" QSC siyasi, sosial və əmək hüquqlarını pozması səbəbindən inzibati xəta üzrə məhkəməyə verilib. Sirkətin əmək müqaviləsi bağlanmadan işçiləri əmək münasibətlərinə cəlb etdiyi aşkarlanıb.
"RAMCO" QSC-nin rəsmi səhfəsində qeyd edilir ki, şirkətin əsası 2010-cu ildə qoyulub. "RAMCO" QSC-nin başlıca məqsədi ölkəmizdə və ölkə hüdudlarından kənarda, sənaye və mülki obyektlərin, müxtəlif təyinatlı yolların, tunellərin, hidrotexniki və meliorasiya qurğularının tikintisinin peşəkarcasına həyata keçirilməsidir. Şirkətin hədəfi idarəetmədə aşkarlıq və hesabatlılıq prinsiplərini rəhbər tutaraq daima təkmilləşmək və tikinti sektorunda respublikamızın öndə gələn şirkətlərindən birinə çevrilməkdir.
Rəsmi səhifədə şirkətin rəhbərliyi barədə heç bir məlumat verilmir. Şirkətin kimə məxsus olması və Kənd Təsərrüfatı Nazirliyinin tender favoritinin olmasının səbəblərini araşdırmaqda davam edirik.
Akif NƏSİRLİ
