İsrailin “Dəmir gümbəzi”, Türkiyə və Azərbaycan üçün “Polad gümbəz” - Ərdoğan hədəfi göstərdi...
Ramil Məmmədli: “Türkiyə istehsal etdiyi istənilən silahı Azərbaycandan əsirgəməyəcək”
Dünyanın ən böyük PUA istehsalçısı olan Türkiyə insansız və avtonom döyüş platformalarının inkişafına diqqət yetirəcək və hər hansı təhlükənin qarşısını almaq üçün çoxqatlı “Polad Gümbəz” hava hücumundan müdafiə sistemi yaradacaq.
Bunu Ankarada Prezident Rəcəb Tayyib Ərdoğan ilk milli çoxməqsədli T625 GÖKBEY helikopterinin jandarma qüvvələrinə təhvil verilməsi mərasimində deyib.
Ərdoğan bildirib ki, Türkiyə bir çox asimmetrik təhdidləri - terrorçuların ölkəyə soxulmasından tutmuş düşmən elementlərin hücumlarına qədər təhlükələri həll etmək üçün çoxsəviyyəli hava hücumundan müdafiə sistemlərini gücləndirməlidir: “Əgər onların (İsrail-red) “Dəmir Gümbəz”i varsa, bizim də “Polad Gümbəz”imiz olacaq. İndi biz “Polad Gümbəz” hava hücumundan müdafiə sistemi yaradırıq, həmçinin uzaqmənzilli raket imkanlarını inkişaf etdirəcəyik. Dostlarımızda inam və düşmənlərimizdə qorxu hissi yaradan çəkindirmə qabiliyyətinə nail olana qədər çalışacağıq”.
Maraqlıdır, belə “Polad Gümbəz” Azərbaycan üçün də ola bilərmi?
“Polad Günbəz” hava hücumundan müdafiə sistemi tam hazır olandan sonra bu sistemi ölkəmizə də verəcəklər”
Sözügedən məsələni “Bakı-Xəbər”ə şərh edən hərbi ekspert Ramil Məmmədli bunu istisna etmədi: “Məsələ ondadır ki, Türkiyənin uğuru bizim uğurumuzdur. O cümlədən, bizim uğurumuz Türkiyənin uğurudur. Yəni iki ölkə arasında münasibətlər o dərəcədə yüksək səviyyədədir. Türkiyə istehsal etdiyi istənilən silahı Azərbaycana verməyi əsirgəməyəcək. O baxımdan, “Polad Gümbəz” hava hücumundan müdafiə sistemi tam hazır olandan sonra bu sistemi Azərbaycana da verəcəklər. Bu da hava hücumundan müdafiə imkanlarımızı daha da gücləndirəcək. O üzdən, Türkiyənin müdafiə sənayesində uğurları önəmli hadisədir. ABŞ Türkiyəyə “Petriot” hava hücumundan müdafiə vasitələrini vermədi. Halbuki, Türkiyə NATO-nun önəmli dövlətidir. Belə olan halda Türkiyə Rusiyadan “S-400” raketlərini aldı. Məlumata görə, Türkiyə Rusiyadan iki “S-400” kompleksi və 120-dən çox uzaqmənzilli raket alıb. Üstəlik, öz imkanları hesabına milli hava hücumundan müdafiə vasitələri yaradır. Ümumilikdə, Azərbaycanın güclü hava hücumundan müdafiə vasitələri var. Ordumuzun arsenalında Rusiya, İsrail, Belarus istehsalı olan vasitələr var. Məsələn, Azərbaycanda İsrail istehsalı olan “Barak-8” hava hücumundan müdafiə vasitələri var. Bu vasitələr 44 günlük Vətən müharibəsi vaxtı Ermənistan raketlərinin zərərsizləşdirilməsində mühüm rol oynayıb. Müharibədən sonra da Azərbaycan hava hücumundan müdafiə vasitələrini təkmilləşdirir. Məlumatlara görə, İsrail istehsalı olan "Barak MX" raketləri alınıb. "Barak MX" raket və aviasiya təhdidləri ilə mübarizə üçün nəzərdə tutulmuş modul tipli hava hücumundan müdafiə sistemidir. O, həm dəniz platformalarında, həm də quruda fəaliyyət göstərir. Bu sistem "Barak" raket ailəsinin modernləşdirilmiş versiyasına aiddir. Bundan başqa, "Barak MX" 16 kilometrədək yüksəklikdə 35, 70 və 150 kilometr məsafəli 3 raket növündən istifadə edə bilər. Sistem təyyarələri, pilotsuz uçuş aparatlarını, raketləri müəyyən edə və vura bilir”.
Vidadi ORDAHALLI
