Çin, Hindistan, Fransa, ABŞ, İsrail və Rusiya liderləri COP29-a gəlməyəcək - “güclü dövlətlər üçün rüsvayçı səbəb”...
Firdovsi Şahbazov: “Həmin dövlət başçıları həqiqətən də qatılmayacaqlarsa, bu onlar üçün utancverici hal olacaq”
Hindistanın “The Hindustan Times” nəşri iddia edir ki, Çin, Hindistan, Fransa, ABŞ, İsrail və Rusiya liderləri COP29 tədbirinə qatılmaya bilər. Bildirilir ki, Hindistan nümayəndə heyətinə ətraf mühit və iqlim dəyişikliyi naziri Bhupender Yadavın rəhbərlik edəcəyi gözlənilir.
Məlum məsələdir ki, dövlət başçılarının tədbirə qatılması həm tədbirin nüfuzunu artırır, həm də əsas hədəf COP29-da iqlim diyişiklikləri ilə mübarizə üçün beynəlxalq bir maliyyə fondunun yaradılmasıdır. Halbuki, bu məsələ ilə bağlı mümkün qədər çox vəsaitin qoyulmasına ehtiyac var. Belə bir versiya var ki, sözügedən dövlətlərin başçılarının bu tədbirə məsafə saxlamaqda məqsədləri ölkələrinin adından həmin iqlim fonduna sanballı bir töhvə verməkdən yayınmaq niyyətindən irəli gəlir. Yəni fonda lazımı qədər pul qoymaq istəmirlər.
“Ola bilsin, digər dövlət başçılarının tədbirə qatılması ilə bağlı məlumatlar təhlükəsizlik səbəbindən gizli saxlanılır”
Sözügedən məsələni “Bakı-Xəbər”ə şərh edən iqtisad üzrə fəlsəfə doktoru Firdovsi Şahbazov buna birmənalı yanaşmadı: “Əvvəla, Hindistan mətbuatının yaydığı məlumatın həqiqətə uyğun olmasına şübhə ilə yanaşıram. Ona görə ki, adları çəkilən həmin ölkələrdən üçü ilə - Rusiya, Çin, İsraillə Azərbaycan çox yaxın münasibətlərə malikdir. Azərbaycanın yalnız Fransa ilə münasibətləri gərgindir ki, bu da bizim günahımız deyil. Çünki münasibətləri gərginləşdirən Fransadır. Fransa erməni separatizminə və işğalına haqq qazandırır. Ona görə də Fransanın prezident səviyyəsində tədbirə qatılmayacağı gözləniləndir. Ola bilsin, digər dövlət başçılarının tədbirə qatılması ilə bağlı məlumatlar təhlükəsizlik səbəbindən gizli saxlanılır. Bu da ola bilər. Yox, əgər həmin dövlət başçıları həqiqətən də qatılmayacaqlarsa, bu onlar üçün utancverici hal olacaq. Çünki həmin ölkələr üçün iqlim fonduna yardım etmək iqtisadi baxımdan çətin deyil. Belə olan halda həmin dövlətlərin bunu əsirgəməsi rüsvayçılıqdır. Başqa bir tərəfdən, Azərbaycan bu kimi məsələlərdə fəal olub və nəyisə əsirgəməyib. Məsələn, Azərbaycan Qoşulmama Hərəkatına rəhbərlik etdiyi dövrlərdə yoxsul dövlətlərə öz vəsaiti hesabına vaksin yardımı edib. O cümlədən, digər bu kimi humanitar məsələlərdə daha fəal olub və öz yardımını əsirgəməyib. O baxımdan hesab edirəm ki, bəzi dövlətlərin COP29-a münasibətdə belə davranması qəbuledilməzdir”.
Vidadi ORDAHALLI
