Kazan görüşünün dərhal ardınca Əliyev və Xaçaturyan imzaladılar - təsadüf, ya...
Azər Həsrət: “Görünən odur ki, sülh sazişi ilə bağlı proses sürətləndirilir”
Oktyabrın 25-də Prezident İlham Əliyev "Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının və Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın birgə fəaliyyəti haqqında Əsasnamə"nin təsdiq edilməsi haqqında fərman imzalayıb.
Həmin gün həm də Ermənistan prezidenti Vaaqn Xaçaturyan Azərbaycanla sərhədlərin delimitasiyası üzrə komissiyaların fəaliyyəti ilə bağlı reqlamenti imzalayıb. Qeyd edək ki, oktyabrın 23-də Ermənistan parlamenti Ermənistan-Azərbaycan Sərhədlərinin Delimitasiyası və Demarkasiyası üzrə Komissiyaların Reqlamenti haqqında qanun layihəsini təsdiqləyib.
Onu da əlavə edək ki, oktyabrın 24-də Rusiyanın Kazan şəhərində XVI BRİCS sammitində Prezident İlham Əliyevlə Ermənistanın Baş naziri Nikol Paşinyanın görüşü baş tutub. Dövlət başçılarının görüşündə iki ölkənin xarici işlər nazirləri, baş nazirin müavinləri və xarici siyasət üzrə köməkçilər də iştirak ediblər. Əliyev və Paşinyan xarici işlər nazirlərinə “Sülh və Dövlətlərarası Münasibətlərin Qurulması haqqında” Saziş üzərində işlərin tez bir zamanda yekunlaşdırılması və imzalanması üçün təlimat veriblər.
Bütün bunların məhz Kazan görüşündən sonra baş verməsi diqqəti cəlb edir. Nə gözlənilir?
Sözügedən məsələyə aydınlıq gətirən siyasi şərhçi Azər Həsrət baki-xeber.com-a açıqlamasında bununla bağlı bir sıra məqamlara toxundu: “Ümumiyyətlə, biz hər zaman demişik ki, Azərbaycanla Ermənistan arasında birbaşa təmaslar məsələlərin daha sürətlə və daha effektiv həllinə yardımçı olur. Bu, praktikada da özünü göstərir. Həqiqətən də Azərbaycan Prezidenti ilə Ermənistan baş naziri ikili görüşdükdə və yaxud da bu dövlətlərin ikili heyətləri müzakirələr apardıqda nəticə olur. Yəni bütün bu görüşlər nəticə verir. Ancaq üçüncü tərəflər müdaxilə etdikdə, bu və ya digər şəkildə iştirak etdikdə isə, proseslər əngəllənir. Nəinki əngəllənir, hətta geri gedir. Ona görə də Kazanda Əliyevin Paşinyanla açıq, səmimi müzakirə aparması bu nəticəni verir. Görünən odur ki, sülh sazişi ilə bağlı proses sürətləndirilir. Azərbaycan dəfələrlə bəyan edib ki, biz Ermənistanla münasibətlərin normallaşmasında çox maraqlıyıq və bunun mümkün qədər tez edilməsini istəyirik. Ermənistan tərəfi də bununla bağlı fikirlərini bildirib, amma bir çox hallarda müəyyən bəhanələrlə prosesi uzadıblar. Görünür Prezident Əliyev ikili təmaslarda Paşinyana izah edə bilib ki, süni uzatma Ermənistanın zərərinə olacaq. Nə qədər tez məsələlər həll edilərsə, bu, bir o qədər yaxşıdır. Ona görə də Azərbaycan tərəfinin bu sənədi təsdiqləməsi, paralel şəkildə Ermənistan tərəfinin də bunu etməsi yeni ümidlər yaradır. Həm də hesab edirəm ki, COP29 ərəfəsində tərəflər çox güman ki, bəlli bir sənədi imzalayacaqlar. O sənədin imzalanmasının ardından da Ermənistan baş naziri Bakıya gələcək və COP29-da iştirak edəcək. Bu isə ümumiyyətlə Ermənistan-Azərbaycan normallaşmasına əlavə stimul verəcək bir sıçrayışa səbəb olacaq. Hər halda 3-cü tərəflər yenə də müdaxilə etməzsə, Ermənistanı yolundan sapdırmağa çalışmazsa, proses çox sürətlə yaxşılığa doğru gedəcək. Təbii ki, Fransanın timsalında Avropa İttifaqı destruktiv fəaliyyətini artırmazsa, müsbət irəliləyiş ola bilər”.
Vidadi ORDAHALLI
