Neft ölkələrinə “yararsız ev sahibi” damğası vuranlara qarşı əla arqument - 28 ölkə...
Bəhruz Quliyev: “Bu gün Qərbin hazırladığı planların simptomları görünməkdədir”
“Neft ölkələrinə yararsız ev sahibləri damğası vurmaq riyakar oyunudur”. Bunu Prezidentin xarici məsələlər üzrə köməkçisi Hikmət Hacıyev “The Financial Times” qəzetinin dərc etdiyi “COP29 və Azərbaycanın yaşıl kamuflyajı” adlı redaksiya məqaləsinə cavabında yazıb.
Hikmət Hacıyev qeyd edib ki, Azərbaycanda gələn ay COP29 keçiriləcək və iqlim sammiti artıq 28 ildir neft və qaz istehsalçısı ölkədə gerçəkləşdirilir. İsveçrəni çıxmaqla, hər bir ev sahibi istehsalla məşğuldur, üstəlik, dünyanın hər bir ölkəsi, istisnasız, mədən yanacağı istehlakçısıdır. Prezident köməkçisi onu da vurğulayıb ki, builki COP mədən yanacağından qlobal keçidi reallaşdırmaq üçün maliyyə hədəfinin artırılmasına fokuslanacaq.
“COP29-a olan hücumlarda məqsəd də prosesi asanlaşdırmaq, tezləşdirməkdir”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, COP29-la bağlı Azərbaycana qarşı səslənən ittihamların əsası yoxdur: “Ermənistan üzərindən Cənubi Qafqaza yerləşmək, lövbər salmaq, möhkəmlənmək üçün Qərb əlində olan, gücü çatan bütün imkanlarını səfərbər etməkdədir. Bunun üçün ilk növbədə region ölkələrinin razılığı alınmalıdır. Kollektiv Qərbin bunu yumşaq siyasətlə əldə edə bilməyəcəyi halda zora, hərbi gücə, şantaja üstünlük verəcəyi gün kimi aydındır. Cənubi Qafqaz siyasətində də Qərb zor dilində danışmağa, güc faktorundan istifadə etməyə üstünlük verib. 30 ildir ki, real işğal faktını görməzdən gələn Qərb ölkələri münaqişənin həllində daim Ermənistanın yanında olublar. Bu da beynəlxalq qanunları yararsız hala gətirib, dünya birliyində etimadsızlıq mühiti yaradıb. Faktiki olaraq beynəlxalq qanunlar işləmir”.
Politoloq Bəhruz Quliyev onu da qeyd etdi ki, Qərbin COP29-dan istifadə edərək Azərbaycana qarşı kampaniya aparacağı əvvəlcədən bəlli idi: “Maraqlıdır, COP-un 28 tədbirinin 5-i Almaniyada, 3 dəfə Polşada, Fransada, Birləşmiş Krallıqda, Danimarkada, Niderlandda, Argentinada, İtaliyada, Meksikada və digər ölkələrdə keçirilib. Adıçəkilən ölkələrin əksəriyyətində dünyanın ən iri zavod və fabrikləri, nüvə enerjisi ilə işləyən qurğular, bir sözlə, atmosferin indiki dözülməz vəziyyətə gəlməsində böyük “xidmətləri” olan sənaye müəssisələri var və bu gün də havanı çirkləndirməkdədirlər. Azərbaycanda mövcud olan sənaye müəssisələri isə həmin ölkələrdəki analoji zavodlarla müqayisədə çox kiçikdir. Bəs, Qərb ölkələrini danışdıran, onları narahat edən nədir? Ermənistanmı, Qarabağdan köçən ermənilərmi, havanın çirklənməsimi? Bəlkə, Bakı həbsxanalarında törətdikləri bəşəri cinayətlərə görə istintaq altında olan separatçıların taleyindən narahatdırlar. Əlbəttə, yox, Qərbin dərdi bunların heç biri deyil. Əsas məsələ Rusiyanın Cənubi Qafqazdan tamamilə uzaqlaşdırılması, Cənubi Qafqaz ölkələrindən Rusiyaya qarşı ikinci cəbhənin açılmasında istifadə olunması və ən nəhayətdə Orta Dəhlizə ortaqsız nəzarət etməkdir. Ermənistan Qərbin ram etməkdə olduğu ilk region ölkəsidir, ikinci hədəf yenə də Gürcüstandır. Seçkilərin nəticələrini bəhanə edib Gürcüstanı vətəndaş müharibəsinə qədər aparmaq Qərbin planındadır. Sonra isə növbə Azərbaycana çatacaq. Bu gün Qərbin hazırladığı planların simptomları görünməkdədir. COP29-a olan hücumlarda məqsəd də prosesi asanlaşdırmaq, tezləşdirməkdir”.
Vidadi ORDAHALLI
