İran rejimi Ermənistana silah verməsəydi, fars idmançı öz qızıl medalını erməniyə hədiyyə etməzdi...
Biz Azərbaycan dövləti və xalqı olaraq bundan sonra İran İslam Respublikasından hər cür iyrənc hərəkəti gözləyə bilərik. Belə bir deyim var, qaradan o yana rəng yoxdur... Bu günlərdə İranda baş verənlər rəzalətin ən alçaq formasıdır.
Azərbaycan torpaqlarını 30 il işğalda saxlayan erməni əsgərinə iranlı idmançının öz qızıl medalını verməsi heç də həmin idmançının təşəbbüsu deyil, hətta bunun üçün o bədbəxt həyatı ilə risqə gedib. Çünki ölkə əhalisinin 60 faizi oğuz türklərindən ibarətdir. Türk torpaqlarında işğalçı qismində ölən əsgərin mükafatlandırılmasi İran hakimiyyətinin bütün türk dünyasına həqarətinin, nifrətinin göstəricisidir. Bütün türk xalqları bu faktdan yola çıxaraq İrana yönəlik münasibətlərini qurmalıdır.
Beləliklə, Ermənistan Respublikasının İran İslam Respublikasındakı səfirliyi xəbər verir ki, oktyabrın 20-də iranlı atlet (kyokuşin karate) Əhməd Baqeri Danimarkada bu yaxınlarda keçirilən yarışda qazandığı qızıl medalı Ermənistan Respublikasının İrandakı səfiri Arsen Apvakyana təhvil verib. O bunu Qarabağda baş verən 44 günlük müharibədə həlak olan dostu Artur Sukiasyanın xatirəsinə edib.
Arsən Avakyan iranlı idmançının hərəkətini yüksək qiymətləndirib, ona böyük idman uğurları arzulayıb və aldığı medalı Artur Sukiasyanın ailəsinə verəcəyini vəd edib.
Müsəlman farsın xristianların da qəbul etmədiyi ermənilərə məhəbbəti hardan qaynaqlanır?
Sədrəddin Soltan: "Təsəvvür edin ki, İran idmançısı Livan torpaqlarında həlak olmuş yəhudi əsgəri olan idmançı dostuna özünün laureatı olduğu qızıl medalı bağışlayır - buna İran hakimiyyəti necə baxardı?
Sualımızı cavablandıran politoloq Sədrəddin Soltan bildirdi ki, burda məsələ heç də xristian-müsəlman məsələsi deyil, bu, Tehran hakimiyyətinin siyasətidir: "Yəni bu, İran hakimiyyətinin apardığı siyasətin uzantılarıdır. Niyə bu iranlı idmançının dostu azərbaycanlı deyil, məhz ermənidir? Nədən iranlı idmançi 44 günlük müharibədə işğalçı ordunun özgə torpaqlarında ölən əsgərinə öz qiymətli mükafatını bu cür nümayişkaranə şəkildə ərmağan edir? Halbuki, Ermənistan özü 44 günlük müharibədə ölən erməni əsgərlərini anmır, yəni onların xatirəsini əziz tutmur. Çünki bu əsgərlər işğalçı ordunun əsgərləridir. Amma İranda işğalçı ordunun ölən əsgəri iranlı idmançi vasitəsi ilə mükafatlandırılır. Bu, İran İslam Respublikası tərəfindən çox ləyaqətsiz hərəkətdir. İran guya Fələstinin azadlığı uğrunda müsəlman təəssübkeşliyi ilə mübarizə aparır, İraqda, Livanda, Yəməndə və digər müsəlman ölkələrində təəssübkeşliyi çəkir. İranda isə müsəlman torpaqlarının işğalı zamanı ölən əsgərə iranlı idmançı öz medalını hədiyyə edir - təzada baxın. Bu, İran hakimiyyətinin apardığı siyasi təbliğatın təzahürüdür, bir əlamətidir. İran əvvəldən Ermənistanın Azərbaycan torpaqlarını işğal etməsini təbliğ etsəydi, bu gün İran idmançısı bu mövqedən çıxış etməzdi. Təsəvvür edin ki, İran idmançısı Livan torpaqlarında həlak olmuş yəhudi əsgəri olan idmançı dostuna özünün laureatı olduğu qızıl medalı bağışlayır - buna İran hakimiyyəti necə baxardı? Bu, Tehran hakimiyyətinin yanlış davranışının və yanlış təbliğatının nəticəsidir. Bu idmançı özünü Ermənistana yaxın göstərməklə hakimiyyətə yatınır, özünü hakimiyyətin gözünə soxmağa çalışır. Hər halı ilə bu təşkil olunmuş aksiyadı, yaxın zamanlarda həmin idmançı Ermənistana gedəcək və orada mükafatlandırılacaq. Bu işdə bəhs edilən kyokuşin karate idman federasiyası da məsuliyyət daşıyır. İran hökuməti idmandan və idmançıdan da siyasi alət kimi istifadə edir".
Dəniz NƏSİRLİ
