İsrailin İrana hücum planları sızdırıldı - Netanyahu planı təsdiqlədi, Bayden İranın nə vaxt vurulacağını bildiyini açıqladı...
İranın yüzlərlə raketlə İsrailə hücumu dünya gündəmindən düşmür. Apreldən sonra həyata keçirilən hücumda ilk dəfə olaraq hipersəs raketlərindən istifadə edilib və İsrailin kritik hərbi bazaları vurulub. Hücumdan sonra dünya diqqətini Yaxın Şərqdə böyük müharibəyə səbəb ola biləcək cavab hücumuna yönəldib.
İsrailin baş naziri Benyamin Netanyahu ayın əvvəlindən gözlənilən cavab tədbirləri çərçivəsində İranda hücuma məruz qalacaq hədəflərin siyahısını təsdiqləyib. ABC News-a danışan israilli mənbə də bildirib ki, Netanyahu İrana qarşı cavab hücumunu təsdiqləyib. Lakin hədəflər haqqında əlavə məlumat verilmir. Bu hədəflərin sırf hərbi hədəflər olub-olmadığı da bildirilməyib. Cavab hücumunun qrafikinin hələ müəyyən edilmədiyi də vurğulanıb.
İsrailin müdafiə naziri Yoav Qallant oktyabrın 1-də baş verən hücumdan sonra İrana "ölümcül, qəti və gözlənilməz" cavab veriləcəyində israr edir.
İsrail rəsmiləri İranın enerji infrastrukturuna, o cümlədən nüvə obyektlərinə dağıdıcı hücumlar etməyə çağırıblar.
Rəsmi səfər çərçivəsində Berlində olan ABŞ prezidenti Bayden də deyib ki, İsrail İrana nə vaxt və necə hücum edəcəyini bilir. Jurnalistlərin "Bizə deyə bilərsinizmi?" sualına Bayden "xeyr və yox" cavabını verib.
Bu həftənin əvvəlində Amerikanın “Washington Post” qəzeti iddia edib ki, Netanyahu ABŞ prezidenti Baydenə İsrailin yalnız İranın hərbi obyektlərinə hücum edəcəyini vəd edib. Bayden isə İsrail liderini Tehranın neft və ya nüvə infrastrukturuna hücumdan çəkinməyə çağırıb. Netanyahunun ofisindən, İsrailin ABŞ-ı dinləyəcəyi, lakin qərarlarını milli maraqlarına uyğun verəcəyi bildirilib.
Bu arada, İsrailin İrana qarşı hazırlıqlarına dair ABŞ kəşfiyyat sənədləri sızdırılıb. Sızdırılan sənədlərdə İsrail Hərbi Hava Qüvvələrinin İranın hücumlarını imitasiya edən təlimləri haqqında ətraflı məlumat yer alır. Sənədlərə görə, İsrailin planlarına uzunmənzilli ballistik raketlər və pilotsuz uçuş aparatları da daxildir.
TAHİR
