Qərbin Gürcüstanda gizli planları üzə çıxır...
Gürcüstanın hakim “Gürcü arzusu” partiyası 26 oktyabr parlament seçkilərində 1 milyondan çox səs toplamağı hədəfləyir. Bunu Gürcüstanın baş naziri İrakli Kobaxidze deyib. O, hakim partiyanın yalnız dövlət işçiləri tərəfindən deyil, cəmiyyətin böyük əksəriyyəti tərəfindən dəstəkləndiyini qeyd edib.
Amma bütün bunlar regiondan kənarda yerləşən müəyyən qüvvələri ciddi şəkildə narahat edir. Onlar Gürcüstanın təsir dairələrindən kənara çıxmasını hər vəchlə əngəlləməyə çalışırlar. Qeyd edək ki, müəyyən Qərb dairələri bu ssenarini Azərbaycanda da əbiq etməyə şalışıblar. Amma hansısa nəticə əldə edə bilməyiblər. İndi Gürcüstan əsas hədəf kimi götürülüb. Lakin bütün bunlara qarşı Gürcüstanın müqavimət gücü var. Bu prosesdə Azərbayca-Gürcüstan münasibətləri də öz sözünü deyir. Qeyd edilməlidir ki, ölkələrimiz arasında güclü siyasi-iqtisadi bağlar mövcuddur. Elə bunun sayəsində Gürcüstan müstəqi siyasi kurs yeritmək üçün lazımi imkanlar əldə edir. O da faktdır ki, prezident İlham Əliyevlə Gürcüstanın baş naziri İrakli Kobaxidze şəxsi təmaslar, qarşılıqlı səfərlər, görüşlər ili ölkə arasında münasibətlərin inkişafına əlavə təkan verir. Indi iş o yerə çatıb ki, bu gün Cənubi Qafqazın taleyini müəyyən edən əsas ölkələr Azərbaycan və Gürcüstandır. Buna xələl gətirmək istəyən müəyyən Qərb qüvvələri Gürcüstanı əsas hədəf kimi seçiblər. Bu fonda Gürcüstana qarşı ciddi təzyiqlər işə salınıb, müxtəlif sanksiyalar tətbiq edilir. Lakin İrakli Kobaxidze açıq mətnlə vurğualyır ki, Gürcüstana qarşı sanksiyalar səmərəsizdir. O, sanksiya tətbiq edilən iki yüksək vəzifəli polis zabitinin 2008-ci ildə Rusiyaya qarşı müharibədə iştirak etdiyini qeyd edib: “Sanksiyalar səmərəsizdir, 2008-ci il müharibəsində iştirak edən iki yüksək vəzifəli polis zabiti də sanksiyalara məruz qalıb. Bu cür qərar verənlər belə səhvlərə yol verməməlidirlər. Hamı görür ki, sanksiyalar səmərəsizdir, ona görə də düşünürəm ki, gələcəkdə daha praqmatik qərarlar veriləcək”. Amma hazırda görünən budur ki, Qərb belə praqmatik qərarların verilməsində acizdir. Rusiyalı politoloq Yevgeni Mixaylov isə bildirir ki, Qərbin bütün cəhdlərinə baxmayaraq, “Gürcü arzusu” partiyası 26 oktyabr parlament seçkilərində qalib olacaq: “İnanıram ki, Gürcüstanda bu il oktyabrın 26-da keçiriləcək seçkilərdə “Gürcü arzusu” partiyası qalib gələcək. Başqa cür ola da bilməz. Xalq çox gözəl başa düşür ki, “Gürcü arzusu” partiyası hər addımda düzgün siyasət yürüdür, xüsusən də milli maraqları və ənənələri qoruyan qanunlar qəbul edir. Buna müvafiq olaraq, hesab edirəm ki, heç bir xüsusi problem olmayacaq”. Elə GORBI Beynəlxalq İctimai Rəyi Araşdırma Mərkəzinin keçirdiyi sonuncu rəy sorğularının nəticələri də müxalifətin gerilədiyini göstərir. Mərkəz “Oktyabrın 26-da keçiriləcək parlament seçkilərində hansı partiyaya səs verəcəksiniz?” sualı əsasında rəy sorğusu keçirib. Hakim "Gürcü Arzusu" - Demokratik Gürcüstan Partiyasına respondentlərin 59,5 faizi səs verib. Üç müxalif siyasi təşkilatın yaratdığı “Birlik" - Milli Hərəkat Partiyasına isə sonuncu rəy sorğusunda 13,6 faiz səs verib. Mərkəzin keçirdiyi rəy sorğusunun nəticələrinə əsasən, belə ehtimal etmək olar ki, hakim partiya bu il seçki göstəricilərini daha da yaxşılaşdıra bilər.
Bütün bunlardan isə Qərbdə ciddi narahatlıq duyulur. Yevgeni Mixaylov un sözlərinə görə, Gürcüstanda fəaliyyət göstərən bütün Qərb QHT-lərinə nəzarət və onlara maliyyə axınının monitorinqi haqqında qanun qəbul edilsə də, başa düşmək lazımdır ki, sabitliyi pozmaq üçün çoxlu nağd pul Ermənistandan gələ bilər: “Çünki amerikalılar sözdə demokratik transformasiyaları dəstəkləmək bəhanəsi ilə aktiv rusofobiya fonunda oraya böyük məbləğdə vəsait köçürürlər. Bu pulun bir hissəsi sabitliyi pozmaq üçün nağd formada Gürcüstana aparılıb. Düşünürəm ki, gürcü xalqı dözəcək, “Gürcü arzusu” partiyası, hətta qarşısında hansısa güclü müxalifət olsa belə, qətiyyət nümayiş etdirəcək. Çünki hökumətin təslim olması, hay-küyçülərin arxasınca getməsi, sonda “tammiqyaslı maydan” əldə etməsi və daha sonra dövləti fəlakətə aparan həmin qüvvələrin hakimiyyətə gəlməsi ilə bağlı nümunələrin şahidiyik. Gürcüstan özü üçün belə bir aqibət arzulamır”. Eyni zamanda, ekspert əlavə edib ki, sabitliyə nail olmaq çox çətin olacaq: “Gürcü arzusu”nun qalib gələcəyinə şübhəm yoxdur. Amma səslərin hesablanmasından sonra və ya indi, seçkilər zamanı nə baş verəcəyi böyük sual altındadır. Hesab edirəm ki, respublika daxilində sabitliyi pozmağa cəhdlər olacaq”. Rusiyalı politoloq əmin olduğunu bildirib ki, amerikalıların Gürcüstanın siyasi arenasında sabitliyi pozmağa yönəlmiş bütün cəhdləri, ilk növbədə, Gürcüstanla Rusiya arasında yaxınlaşma tendensiyası ilə bağlıdır: “Bunlar, ümumiyyətlə, Qərbin “Gürcü arzusu” partiyasına qarşı irəli sürdüyü əsas ittihamlardır. Müvafiq olaraq, amerikalılar Gürcüstanda dönüş yaratmaq üçün mümkün olan hər şeyi edəcəklər. Onlar son bir ildə sanksiyalar tətbiq edərək daxili siyasi vəziyyəti pozmağa cəhd edirlər. Hələ ki, buna nail olmayıblar”. Bu arada Gürcüstan Dövlət Təhlükəsizlik Xidməti seçkilər ərəfəsində planlaşdırılan mümkün təxribatlar barədə xalqa xəbərdarlıq edib. Qurumun məlumatında deyilir ki, siyasi dairələrlə əlaqəli qruplar Gürcüstan hökumətinin nümayəndələrinin səslərindən və videogörüntülərindən istifadə edilərək saxta video və audioyazılarını yaymağı planlaşdırırlar. Saxtalaşdırılmış audioyazılar Dövlət Təhlükəsizlik Xidmətindən sızdırılmış məlumatlar kimi təqdim ediləcək. Bu saxta məlumatın yayılmasının məqsədi hakimiyyət qolları arasında qarşıdurma, hökumətlə Pravoslav Kilsəsi arasında düşmənçilik yaratmaq və hökumətlə Qərb tərəfdaşları arasında münasibətləri pisləşdirməkdir. Lakin hesab olunur ki, bütün bu cəhdlər hansısa nəticə verməyəcək. gürcü xalqı yenə doğru seçim edəcək.
Tahir TAĞIYEV
